پنجاب حکومت تے سیاحت و ثقافت

عثمان بزدار حکومت نے عوامی فلاح تے پنجابی ثقافت و سیاحت لئی انج دے کم کیتے نیں جنہاں دی ماضی وچ مثال نہیں ملدی

عتیق انور راجا

اج کل ملک وچ سیاست دا بازار خوب گرم ہو رہیا اے۔ حکومت مخالف سیاسی جماعتاں ملکی عوام لئی کجھ زیادہ ای پریشان نظر آن لگیاں نیں۔ ایس دی وجہ آن والے الیکشن نیں۔ اپوزیشن جماعتاں اپنے دور حکومت وچ عوامی فلاح لئی جو کجھ کردیاں رہیاں نیں اوہ ایس توں بخوبی آگاہ نیں تے ایہناں نوں ایہہ احساس اے کہ جے ایس حکومت لئی مشکلات نہ کھڑی کیتیاں تے آن والے دو ورھیاں وچ عوامی خدمت نال ایہہ لوک اک وار فیر توں اقتدار سنبھالن وچ کامیاب ہو سکدے نیں۔ اک تے جدوں مرکزی حکومت ولوں پٹرولیم دیاں قیمتاں ودھیاں نیں تے فیر حکومت لکھ چاہے ہر جنس دی قیمت خودبخود ودھ جاندی اے تے دوجا انج لگدا اے ک میرے ملک دے بوہت سارے کاروباری لوک پٹرولیم مصنوعات دیاں قیمتاں وچ وادھے نوں اپنے مفاد وچ استعمال کرن دی تیاری کیتے بیٹھے ہوندے نیں خیر تنقید کرنی ہوئے تے اسیں کسے اُتے وی کر سکنے آں پر جے مثبت سوچ نال ویکھیے تے عثمان بزدار حکومت نے عوامی فلاح تے پنجابی ثقافت و سیاحت لئی انج دے کم کیتے نیں جنہاں دی ماضی وچ مثال نہیں ملدی۔ پنجاب حکومت نے صوبے دی سیاحت دے فروغ دے حوالے نال بھرپور کم کیتا اے تے ہن لوک اپنے مصروف دن رات توں کجھ ویلا کڈ کے سیر لئی شمالی علاقیاں دے نال پنجاب دے بوہت سارے علاقیاں وچ وی سکون دی تلاش وچ جان دے دے عادی ہو رہے نیں تے اسیں جاننے آں کہ ایسے حکومت نے تاریخ وچ پہلی وار صوبہ پنجاب دی سیاحت پالیسی دا مسودہ تیار کیتا اے۔ جس دے بعد صوبے بھر وچ اٹھ نویں سیاحتی مقامات دی نشاندہی کیتی گئی۔ ثقافتی، تاریخی، مذہبی تے جغرافیائی طور تے پنجاب اپنے اندر ہر اوہ کشش رکھدا اے جیہڑا اک سیاح نوں اپنے ول کھچ لوے۔ صرف حکومت دا کم اے کہ تھوڑی توجہ نال سیاحواں نوں ایس پاسے راغب کرن دی کوشش کرے۔ پنجاب وچ تاریخی قلعے وچ ، دریا نیں، ریگستانی سلسلے نیں۔ خوبصورت باغات نیں۔ پہاڑی سلسلے نیں تے پنجاب اپنے صحت بخش تے مزیدار کھابیاں دی وجہ نال وی دنیا بھر وچ مشہور اے۔ ایس دے علاوہ موجودہ حکومت ولوں کوٹلی، ستیاں، چکوال، کوہ سلیمان ، اٹک، کالا باغ، خوشاب، بہاولپور تے جہلم وچ نویں سیاحتی مقامات عوام لئی کھولن دا عندیہ وی اک چنگی خبر ہوئے گا۔ سکھاں دی مذہبی تے ثقافتی سیاحت خصوصاً ننکانہ صاحب، ایمن آباد تے کرتار پور راہداری نال وی پنجاب دی سیاحت نوں بھرپور فروغ ملن دی امید اے۔پنجاب دے میلے وی آباد کرنا بوہت ضروری اے کیوں جے ایہناں میلیاں نوں ویکھن وی کدی سیاح دنیا بھر توں ایتھے آیا کردے سن پنجاب دی ثقافت دا اک بوہت خوبصورت رنگ پنجاب بھر وچ سجن والے میلے ہویا کردے سن کیوں جے ایہہ میلے وی ساڈی سیاحت نوں فروغ دین وچ اہم کردار ادا کیتا کردے سن۔ ایہناں میلیاں وچ ہون والے کھیڈ تماشیاں نوں ویکھن لئی دور دور توں لوک آیا کردے سن۔ موجودہ حکومت نے سرکاری گیسٹ ہائوسز نوں سیاحواں لئی رہائش گاہواں بنان دے حوالے نال جیہڑے اقدامات کیتے نیں اوہ اک بہترین کوشش اے اپنے بالاں دے بہتر مستقبل لئی سانوں وڈے وڈے نیشنل پارکس بنان اُتے خصوصی توجہ دین دی لوڑ اے۔ ملک وچ بوہت حد تیکر امن و امان دی فضا بن چکی اے ایسے وجہ نال اج پاکستان وچ سیاحت فروغ پا رہی اے۔ ویزہ پالیسی وچ نرمی تے سیاحواں لئی آسانیاں فراہم کیتے جان دے اعلانات دے بعد غیر ملکی سیاحواں دی پاکستان وچ سیاحت دے حوالے نال دلچسپی ودھ چکی اے۔
سیاحت نال دنیا وچ پاکستان دا چنگا ناں بنے گا۔ دنیا نال ساڈے رابطے بہتر توں بہتر ہون لگن گے تے مقامی لوکاں نوں بہتر روزگار میسر ہوئے گا۔ سرمایہ کاری وچ وادھا ہوئے گا، ساڈی معیشت بہتر ہوئے گی، بہار دا موسم شروع ہون وچ ہجے بوہت ویلا باقی اے پر خزاں دا موسم وی لنگھنا ای اے، ثقافت دے فروغ لئی حکومت دے نال نال عوام تے میڈیا نوں وی اپنا اپنا کردار ادا کرنا ہوئے گا۔ ساڈا پرنٹ میڈیا تے اپنی ثقافت دے رنگ اپنے صفحیاں اُتے کھلاردا رہندا اے بوہت لوڑ اے کہ ساڈا الیکٹرانک میڈیا وی ثقافت دی پرموشن نوں اپنی ترجیحات وچ رکھ لوے۔ حکومت پنجاب نوں پنجابی ثقافتی رنگاں نوں دنیا دے ساہمنے موثر انداز وچ لیان لئی اک پنجابی ٹی وی وی شروع کر دینا چاہیدا اے۔ اسیں تے سمجھنے آں کہ پنجاب اج وی باقی صوبیاں توں زیادہ ڈلیور کر رہیا اے۔ پنجاب وچ اِکا دُکا واقعات نوں چھڈ کے حالات قابو وچ نیں پر میڈیا کیوں جے زیادہ پنجاب نال محبت کردا اے ایس لئی پنجاب وچ حکومت تبدیلی دے خاب ویکھنا وکھانا اپنا فرض اولین سمجھدا اے۔