تحریک لبیک پاکستان دے سربراہ سعد رضوی رہا

لہور( پنجابی میڈیا گروپ)تحریک لبیک پاکستان(ٹی ایل پی)دے سربراہ حافظ محمد سعد رضوی نوں رہا کر دتا گیا۔تفصیل دے مطابق تحریک لبیک پاکستان(ٹی ایل پی)دے سربراہ حافظ محمد سعد حسین رضوی نوں صوبائی دارالحکومت لہور دی کوٹ لکھپت جیل توں رہا کیتا گیا۔ترجمان ٹی ایل پی داکہنا ایکہ سعد رضوی نوں11اپریل والے دن لہور توں گرفتار کیتا گیا سی، کارکناں دی وڈھی تعداد جامع مسجد رحم اللعالمین اپڑ گئی،کارکناں اپنے قائد دا استقبال کرن لئی بے تاب نیں۔خیال رہے کہ تحریک لبیک نے حکومت نوں فرانسیسی سفیر ملک بدر کرن لئی20اپریل تک داوقت دتا سی تے اینج نہ کرن دی صورت وچ ملک گیر مظاہرے تے احتجاج کرندا اعلان کیتا سی۔تحریک لبیک ولوں ممکنہ مظاہریاں نوں مدنظر رکھدیاں ہویاں امن و امان دی صورتحال برقرار رکھن لئی11اپریل والے دن سعد رضوی نوں حراست وچ لیا سی۔اوہناں دی گرفتاری توں بعد ملک وچ احتجاج دا سلسلہ شروع ہوگیا سی جس توں بعد پر تشدد صورت اختیار کرلئی سی جس دے پیشِ نظر حکومت نے تحریک لبیک پاکستان اُتے پابندی عائد کردتی گئی سی،حافظ سعد حسین رضوی نوں ابتدائی طور اُتے3مہینے تک حراست وچ رکھیا گیا تے فیر10جولائی نوں دوبارہ انسداد دہشت گردی ایکٹ دے تحت وفاقی جائزہ بورڈ تشکیل دتا گیا جس وچ23اکتوبر نوں اوہناں دے خلاف حکومتی ریفرنس لیایا گیا۔یکم اکتوبر نوں لہور ہائی کورٹ دے سنگل بینچ نے سعد رضوی دی نظر بندی نوں کالعدم قرار دے دتا سی جس دے خلاف حکومت نے اپیل دائر کیتی سی لیکن لہور ہائی کورٹ دا ڈویژن بینچ اجے تک تشکیل نہیں دتا گیا۔بعدازاں حکومت پنجاب نے سپریم کورٹ توں رجوع کیتا سی جس اُتے عدالت نے12اکتوبر نوں سنگل بینچ دے حکم اُتے عمل درآمد معطل کردتا سی تے ڈویژن بینچ دے نویں فیصلے لئی کیس دا ریمانڈ دتا سی۔لیکن19اکتوبر نوں عید میلاد النبی ۖ دے موقع اُتے کڈے گئے جلوس نوں ٹی ایل پی نے حافظ سعد رضوی دی رہائی لئی احتجاجی دھرنے دی شکل دے دتی سی۔لیکن3دن تک لہور وچ یتیم خانہ چوک اُتے مسجد رحمت اللعالمین دے ساہمنے دھرنا دین توں بعد ٹی ایل پی نے اسلام آباد ولوںلانگ مارچ کرن دااعلان کیتا سی۔23اکتوبر نوں لہور وچ کالعدم ٹی ایل پی دے قائدین تے کارکناں دے پلس نال تصادم دے نتیجے وچ3پلس اہلکار شہید تے کئ یزخمی ہو گئے سن۔بعدازاں28اکتوبر نوں وی مریدکے تے سادھوکی دے نیڑے مشتعل کارکناں دی پلس نال جھڑپاں وچ4اہلکار شہید تے263زخمی ہوگئے سن۔پچھلے مہینے حکومت تے تحریک لبیک پاکستان دے درمیان معاہدہ طے پایا سی جس وچ طے ہویا سیکہ ٹی ایل پی لانگ مارچ تے پُر تشدد مظاہریاں نوں چھڈ کے ملکی سیاست وچ حصہ لین لئ آزاد ہوئے گی۔مذاکرات وچ وفاقی وزیر خارجہ شاہ محمود قریشی،علی محمد خان،ممتاز عالم دین مفتی منیب الرحمان سنے ہور علمائے کرام شریک سن۔مذاکرات کامیاب ہون توں بعد وفاقی کابینہ ولوں تحریک لبیک پاکستان(ٹی ایل پی) نوں کالعدم تنظیم دی فہرست توں کڈ دتاگیا سی۔

اپنا تبصرہ گھلو