Pervaiz Elahi Always Prevails (2)

گوگلی سیاست دی جادو گری اسیں چودھری پرویز الٰہی دی شکل وچ ویکھی تے ایہہ
زمانہ اے مشرف دے زوال دا، پر ایہہ زمانہ پرویز الٰہی دے عروج دا ثابت ہویا

اسد اللہ غالب

کرکٹ وچ گوگلی انداز وچ عبدالقادر نوں عروج اُتے اپڑایا۔ گوگلی سیاست دی جادو گری اسیں چودھری پرویز الٰہی دی شکل وچ ویکھی تے ایہہ زمانہ اے مشرف دے زوال دا، پر ایہہ زمانہ پرویز الٰہی دے عروج دا ثابت ہویا۔ تے ایہہ سب کجھ میری سمجھ توں باہر تے بالاتر اے۔ کیہ صرف ایہہ کہہ دتا جائے کہ قسمت قسمت دی گل اے۔ اللہ جنہوں چاہے چھپڑ پھاڑ کے دیوے پر نہیں ایہہ پرویز الٰہی دی انج دی کرشماتی صلاحیتاں دا ظہور سی جیہڑا ہن تیکر اوہناںدے ذہن وچ لُکیاں سن۔ شطرنج دی چالاں تے سیاست دیاں چالاں وچ بوہت زیادہ فرق نہیں۔ پرویز الٰہی نے گوگلی اُتے گوگلی ماری۔ کنج، دنداں وچ اُنگل دبائو تے سن دے جائو۔
بےنظیر شہید ہوئیاں تے پتہ چلیا کہ اوہ مارک سیگل نوں اک ای میل پا گئیاں سن کہ میں شہید ہو جاواں تے جنہاں لوکاں اُتے مقدمہ چلے ایہناں وچ پرویز الٰہی نوں وی شامل کیتا جائے، لاڑکانہ وچ زرداری نے صف ماتم اُتے بیٹھے ہوئے کہیا کہ ق لیگ قاتل لیگ اے پر خدا دا کرنا اِنج ہویا کہ زرداری نوں اپنی حکومت بچان لئی بندیاں دی لوڑ پئے گئی، اوہ بھُل ای گیا کہ ایس نے ق لیگ نوں قاتل لیگ قرار دے رکھیا اے، بس چشم فلک نے اک حیرت انگیز منظر ویکھیا کہ پیپلز پارٹی نے ق لیگ ول دست تعاون ودھایا تے اگلے ای لمحے بے نظیر دی ای میل دا نامزد قاتل تے زرداری دے بقول قاتل لیگ دا لیڈر چوہدری پرویز الٰہی ، یوسف رضا گیلانی دے پہلو وچ ڈپٹی وزیراعظم بن کے براجمان ہو گیا۔ سیاسی تے حکومتی ضروریات وڈے وڈیاں دا ذہنی خمار جھگ وانگوں بٹھا دیندیاں نیں کجھ ایہو صورتحال اٹھارہ دے الیکشن دے بعد ویکھن وچ آئی۔ جدوں تحریک انصاف نوں مرکز تے پنجاب وچ حکومتاں بنان لئی بندیاں دی لوڑ پئی، زرداری وانگوں عمران خان نوں وی اپنی ماضی دیاں گلاں بھُلانیاں پئیاں کیوں جے جدوں اوہناں نے اسلام آباد دے ڈی چوک وچ دھرنا دے رکھیا سی تے اوہ اپنی ہر تقریر دے کلائیمیکس اُتے ایہہ طعنہ ضرور دیندے کہ پرویز الٰہی پنجاب دا سب توں وڈا ڈاکو اے ۔ سیاسی تقریراں تے حکومتی تقاضے بالکل وکھری وکھری گلاں نیں۔ عمران خان نوں پرویز الٰہی ولوں دست تعاون ودھانا پیا، پرویز الٰہی نوں اک سنہری موقع ہتھ آیا سی۔ اوہناں نے عمران خان دا ہتھ جھٹکیا نہیں، ایہنوں اگے ودھ کے پھڑ لیا۔ پرویز الٰہی نے مرکز وچ عمران خان نوں وزیراعظم بنن وچ مدد دتی تے پنجاب وچ بزدار دی حکومت نوں سہارا دتا۔ ایس تعاون دے صلے وچ عمران خان نے کجھ وعدے کیتے سن، اک وعدہ تے فوراً ایفا کر دتا کہ پرویز الٰہی نوں پنجاب دا اسپیکر بنا دتا، باقی وعدے، وعدے ای رہ گئے۔
عمران خان نے چوہدری پرویز الٰہی دے صبر دا امتحان لینا چاہیا۔ چوہدری پرویز الٰہی نے کسے لمحے وی بے صبری دا مظاہرہ نہیں کیتا۔ جدوں وی کوئی نازک ویلا آیا تے بس اوہ عمران خان نوں ایہناں دے وعدے یاد دلا دیندے، اک باپ دے طور تے چوہدری پرویز الٰہی دی خواہش سی کہ ایہناں دا پتر مونس الٰہی وفاق وچ وزیر بنے، پنجاب دے گورنر چوہدری محمد سرور نے اک وار مونس الٰہی نال ملاقات وی کیتی تے یار لوکاں نے کہنا شروع کر دتا کہ مونس وزیر بنیا ای بنیا پر معاملہ ٹال مٹول دا شکار ہو کے رہ گیا۔ وفاقی حکومت اپنے ای بندیاں تے چہیتیاں دے ہتھی بحراناں دا شکار ہوئی تے چوہدری پرویز الٰہی دی امید دی کلی کھل اٹھی۔ اوہناں نے اپنی خاندانی تے روایتی وفاداری دا ثبوت دیندے ہوئے عمران خان دے نال کھڑے رہن دا اشارہ دتا۔ ایس اُتے مونس الٰہی نوں وفاقی کابینہ دا حلف دے دتا گیا۔ میں اپنی کم علمی تے ناقص فہم دا اعتراف کرنا واں کہ میں اپنے قارئین نوں ایہہ نہیں دس سکدا کہ مونس الٰہی نوں محکمہ کیہ دتا گیا۔ ایس صورتحال دے باوجود پرویز الٰہی نے عمران خان دا ہتھ تے ساتھ نہیں چھڈیا۔ وفاق تے پنجاب دی حکومت اُتے کڑا ویلا روز آندا اے تے پرویز الٰہی روز کہندے نیں کہ عمران خان اپنی حکومت دی ٹرم پوری کرے گا تے پنجاب دا وزیراعلیٰ بزدار وی کدھرے نہیں جائے گا۔ پرویز الٰہی نوں عمران خان نال گلے شکوے بوہت نیں، ایہناں دے وڈے بھراواں جہے چوہدری شجاعت حسین جرمنی وچ علاج کروان گئے تے صحت یاب ہو کے واپس آئے تے عمران خان ایہناں دا حال پچھن ایہناں دے گھر نہ جا سکے۔ ایس دا گلہ چوہدریاں نے کئی وار کیتا، اندر دی کہانی جانن والے کہندے نیں کہ عمران خان نوں گلہ اے کہ جدوں فضل الرحمن نے دھرنا دتا تے چوہدریاں نے اپنے گھر فضل الرحمن نوں کیوں ٹھہرایا تے ایس دی خاطر تواضع کیوں کیتی۔ چوہدری صاحبان دا کہنا اے کہ اوہناں نے جو کجھ کیتا اوہ وضع داری وچ کیتا تے عمران خان دے بھلے لئی کیتا کیوں جے ایہناں دی خاطر تواضع دے نتیجے وچ مولانا فضل الرحمن دھرنا ختم کر کے اسلام آباد توں واپس چلے گئے سن۔ چوہدری کہندے نیں کہ اسیں حکومت اُتے احسان کیتا تے حکومت نے الٹا ساڈے اُتے شک کیتا۔ کجھ عرصہ پہلاں اک ویڈیو وائرل ہوئی جیہڑی پرویز الٰہی دے گھر اُتے بنی سی۔ ایس ویڈیو وچ اوہ جہانگیر ترین دی خاطر تواضع کردے نظر آندے نیں۔دونویں حضرات بلند اواز نال ایہہ گلہ کردے سنائی دیندے نیں کہ پنجاب دے گورنر چوہدری سرور بلاوجہ ایہناں دونواں دے خلاف گلاں کردے رہندے نیں۔ہن اک ہور ویڈیو وائرل ہوئی اے جس وچ چوہدری سرور خوشی دے مارے کہندے نیں کہ ایہناں دی چوہدری پرویز الٰہی نال گاڑھی چھنتی اے سیاست دے بازار وچ اُتار چڑھائو کوئی غیر فطری تے غیر معمولی گل نہیں، سیاست دے سینے وچ دل نہیں ہوندا جے ہوندا وی اے تے اوہ موم جہیا کدی اک پیارا بن جاندا اے کدی دوجا پیارا لگن لگ جاندا اے۔ زرداری دے دور وچ چوہدری پرویز الٰہی دا ڈپٹی وزیراعظم بن جانا تے عمران خان دے دور وچ پنجاب اسمبلی دا اسپیکر بنن والا، عقل تے سمجھ وچ آن والی گلاں نہیں، تسیں ایہنوں مقدر دا کھیڈ کہہ لوئو، تسیں ایہنوں چوہدریاں دی وفاداری کہہ لوئو یا تسیں ایہنوں سودے بازی قرار دے دیو پر جو کجھ ہویا تے ہو رہیا اے اوہ سب دے اگے اے تے میں فیر کہنا واں کہ ایہہ عقل تے فہم توں ماورا اے۔
کیہ چوہدریاں نے ایس مفاہمتی سیاست دی وجہ نال لُٹ مار دا بازار گرم کیتا یا ملک نوں سیاسی استحکام بخشیا۔ ایہہ اک بوہت وڈا سوالیہ نشان اے۔ بظاہر چوہدریاں نے مشرف دا ساتھ نبھایا تے منتخب اداریاں نے اپنی آئینی ٹرم پوری کیتی، چوہدری تے مزید اگے جان نوں وی تیار سن اوہناں نے تے کہیا سی کہ اوہ جنرل مشرف نوں 10 وار وردی وچ صدر منتخب کروان گے۔ ایہہ وکھری گل اے کہ مشرف نے آپ ای راہ فرار اختیار کر لئی۔
چوہدریاں نے زرداری دا ساتھ نبھایا، اودوں وی منتخب اداریاں نے پنج سالہ آئینی ٹرم پوری کیتی ہن چوہدریاں دا گھرانہ عمران خان دے نال اے تے ہر بندا سینے اُتے ہتھ رکھ کے کہہ سکدا اے کہ اج تیکر عمران خان دی حکومت نوں ذرہ بھر نقصان نہیں اپڑیا۔ چوہدریاں نوں گلے پیدا ہو گئے نیں۔ چوہدری پرویز الٰہی نے تازہ ترین بیان وچ کہیا اے کہ پنجاب حکومت اتحادیاں دا ساتھ نہیں نبھا رہی جد کہ وزیراعلیٰ بزدار نے یقین دہانی کروائی اے کہ اسیں رَل کے چلاں گے۔ حالات ایس موڑ اُتے نیں کہ تاڑی وجے گی تے دونواں ہتھاں نال، اک ہتھ نال کدی نہیں وجدی۔ ایس ویلے وڈا فریق پی ٹی آئی اے ایس لئی ایہنوں سسٹم چلان لئی وڈے دل دا مظاہرہ کرنا ہوئے گا۔
کیہ تہانوں ایہہ گل عجیب نہیں لگدی کہ چوہدری شجاعت حسین نے اپنی اک آپ بیتی لکھی، ایس وچ اوہناں نے اپنی یاد گار تصویراں وی شامل کیتیاں پر نال ای پرویز الٰہی دی قصہ کہانی وی موجود اے تے ایہناں دے حکومتی کارنامیاں دی تفصیلات وی موجود اے۔ اصل قصہ ایہہ وے کہ چوہدری پرویز دی شخصیت سیاست اُتے اینی ای حاوی اے جنہی آپ چوہدری شجاعت حسین دی۔ایس لئی چوہدری پرویز الٰہی اپنے کزن دی کتاب اُتے وی حاوی نظر آندے نیں، آئو ذرا ویکھنے آں کتاب وچ کیہ کجھ اے۔
’’سچ تو یہ ہے‘‘ چودھری شجاعت حسین دی انتہائی جاندار آپ بیتی اے تے سچ تے ایہہ وے کہ ایس کتاب وچ اوہ سب کجھ موجود اے جس دا ساڈی سیاست دے ہر طالب علم نوں علم ہونا چاہیدا اے۔ کتاب دے مواد نوں زیادہ توں زیادہ اجاگر کرن تے آسان بنان لئی 20 ابواب وچ تقسیم کیتا گیا اے۔ ہر باب دا وکھرا عنوان اے تے ہر باب نوں مزید ضمنی ابواب وچ سرخیاں نال وَنڈیا گیا اے جس نال کتاب پڑھنا سمجھنا تے کوئی وی شے لبھنا نہایت آسان ہو جاندا اے۔ جس نفاست تے پذیرائی دا مظاہرہ چودھری برادران اپنے حلقہ احباب تے ملن جلن والیاں نال کردے نیں ایسے طرح اوہناں نے اپنے قارئین لئی وی بوہت ساری آسانیاں دا اہتمام کیتا اے جس اُتے اوہ مبارکباد دے مستحق نیں۔ پیش لفظ انتہائی مختصر پر جامع تے سلیس انداز وچ لکھیا گیا اے ۔ اک ای صفحے وچ گویا سمندر نوں کوزے وچ بند کر دتا گیا اے۔کتاب لکھن دی لوڑ کیوں پیش آئی، ایس حوالے نال اینا عمدہ تے اختصار دے نال پیش لفظ گھٹ ای ویکھیا گیا اے۔ باقاعدہ ابواب شروع کرن توں پہلے تمہید ہے تے تمہید وچ چودھری شجاعت نے اپنے شہید والد چودھری ظہور الٰہی نوں اپنا رہنما قرار دیندے ہوئے ایہناں دی استقامت، شجاعت تے فیر شہادت دے واقعات قلم بند کیتے نیں۔ چودھری شجاعت حسین اج جس مقام اُتے نیں ایس وچ ایہناں دے والد دا بوہت وڈا تے نمایاں کردار اے۔ ایہناں دی ابتدائی زندگی وچ کہ جدوں اوہ 11-12 سال دے نکے بچے سن دو انج دے واقعے پیش آئے سن جنہاں نے ایہناں دی بنیاد مضبوط کرن، ایہناں نوں حوصلہ مند بنان تے ایہناں وچ جرات پیدا کرن وچ اہم کردار ادا کیتا اے۔ پہلا واقعہ 1985 وچ پیش آیا کہ کس طرح دن دیہاڑے ایہناں دے گھر دی دیواراں ڈیگ دتیاں گئیاں تے ایہناں دے والد چودھری ظہور الٰہی نوں گرفتار کر لیا گیا تے ایہہ سب 10سال دے بچے نے ویکھیا تے ایہہ وی کہ ایہناں دے والد دے چہرے اُتے ذرا وی پریشانی دے آثار نمایاں نہیں ہوئے تے اوہناں نے سکھ لیا کہ جے بندے دی زندگی دا کوئی نصب العین اے تے فیر ایس دے حصول دی راہ وچ کوئی مشکل وی آ جائے تے گھبرانا نہیں چاہیدا بلکہ ایس دا مردانہ وار مقابلہ کرنا چا ہیدا اے۔ چودھری شجاعت لکھدے نیں کہ والد صاحب دی شہادت دے بعد میرے لئی سب کجھ ای بدل گیا تے مینوں عملی سیاست وچ آنا پیا۔ عملی سیاست دے ہر موڑ اُتے میرے لئی میرے والددا کردار مشعل راہ رہیا اے۔ ایہناں دے اصول سیاست ہر موڑ اُتے میری رہنمائی کردے رہے نیں۔ ایہناں دا یمان سی کہ زندگی تے موت اللہ دے ہتھ وچ اے تے ایہناں دا ایہہ پختہ ایمان میری زندگی دے سفر وچ چراغ راہ دا کم دیندارہیا اے۔ا یہناں دی تقلید وچ، میں وی اپنی زندگی وچ کلمہ حق دی سربلندی تے مخلوق خدا دی خدمت نوں اپنا نصب العین بنایا اے۔ میں ایس وچ کس حد تیکر کامیاب ہویا واں، ایس دا حتمی فیصلہ بہرحال میں نہیں، عوام نے کرنا اے۔ تاں میں اپنی زندگی تے ایس دے نشیب و فراز دی کہانی جیہڑی پچھلے ستر سال اُتے پھیلی ہوئی اے، اج اپنے عوام دے اگے رکھ رہیا واں ایہہ کہانی دریائے چناب دے کنارے گجرات دے اک نکے پنڈ ’’نت وڑائچ‘‘ توں شروع ہوندی اے۔
پہلا باب ’’میں اور میرا خاندان‘‘ دے عنوان توں اے۔ ایس وچ چودھری صاحبان دے پردادا، دادا، اہل خانہ، کاروبار تے خاندان دی سماجی خدمات دا ذکر اے۔ باب دوم ایوب خان دے دور حکومت متعلق اے جس وچ چودھری ظہور الٰہی دی سیاست تے جنرل ایوب خان دے دور دا ذکر اے۔ باب تن وچ 1970ء دے انتخابی معرکے دی تفصیل بیان کیتی گئی اے۔ باب چار انتہائی اہم تے دلچسپ اے۔ ایس وچ مشہور بھینس چوری دے مقدمے دے علاوہ عراقی اسلحے تے باغیانہ تقریر دے مقدمات تے ایہناں دے پس منظر نوں بیان کیتا گیا اے۔ چودھری شجاعت تے چودھری پرویز الٰہی دی گرفتاری وی ایس دور وچ ہوئی فیر معاشی دبائو دا وی ایہناں نوں ساہمنا کرنا پیا۔ ایس دوران تحریک ختم نبوت وی چلی۔ متحدہ جمہوری محاذ دی تشکیل ہوئی ایہناں سب دا تذکرہ باب چار وچ موجود اے۔ باب پنجم الیکشن ستتر تے پی این اے دی تحریک تے بھٹو حکومت دے خاتمے اُتے مشتمل اے۔ باب چھ وچ جنرل ضیاء الحق دے مارشل لا دے ابتدائی دور تے ایس نال جڑے اہم واقعات دا ذکر اے۔ چودھری شجاعت دی نواز شریف نال پہلی ملاقات دا وی تذکرہ اے۔ باب ست وچ نواز شریف دی مسلسل عہد شکنی توں پردہ چکیا گیا اے۔ اوہ پہلے وزیراعلیٰ کنج تے کیوں بنے تے فیر تحریک عدم اعتماد دا آنا ایہہ سب ایسے باب دا حصہ اے۔باب اٹھ وچ محمد خان جونیجو دے دور حکومت اُتے روشنی پائی گئی اے۔ ایسے دور وچ سانحہ اوجڑی کیمپ وی ہویا سی فیر جونیجو صاحب نوں جس طرح برطرف کیتا گیا، ایس اُتے چودھری شجاعت حسین نے بغیر لگی پلٹی رکھے اپنے دل دیاں گلاں کھرے الفاظ وچ بیان کر دتیاں نیں۔ باب نو بےنظیر دے پہلے دور حکومت بارے اے۔ باب 10 اسلامی جمہوری اتحاد دی حکومت تے ایس متعلقہ واقعات نال مزین اے۔ باب 11 وچ بےنظیر بھٹو دے دوجے دور حکومت دے خاتمے جد کہ باب 12 وچ نواز شریف دے دوجے دور حکومت دے خاتمے دی وجوہات تے پس پردہ واقعات نوں بیان کیتا گیا اے۔ جنرل مشرف دا ٹیک اوور تے ایس نال جڑے پراسرار واقعات باب تیرہ وچ نیں۔ باب چودہ وچ اوس مشرف نواز ڈیل دا ذکر اے جس نوں نواز شریف نے اک عرصے تیکر لُکایا تے فیر ایس دی خلاف ورزی وی کیتی۔ باب پندرہ پاکستان مسلم لیگ ق دے دور حکومت اُتے مشتمل اے۔ ایہہ ایس کتاب دا سب توں تفصیلی باب تے ایسے دور وچ پاکستان دی تاریخ دے اہم ترین فیصلے وی کیتے گئے، وڈے وڈے منصوبے وی شروع کیتے گئے۔ باب سولہ وچ چودھری شجاعت نے اپنی وزارت عظمیٰ دا تذکرہ کیتا اے۔ باب سترہ پنجاب وچ چودھری پرویز الٰہی دے دور حکومت اُتے مشتمل اے۔ بلاشبہ چودھری پرویز الٰہی دے ایس دور نوں سنہری الفاظ وچ یاد کیتا جاندا اے کہ جس وچ 1122 ایمرجنسی سروس بنی جیہڑی اج تیکر چل رہی اے۔ ارفع ٹیکنالوجی پارک بنیا، ‘قرآن بورڈ تے سیرت اکیڈمی دا قیام عمل وچ آیا۔ زراعت تے صنعت وچ انقلاب وی ایسے دور وچ آیا۔ ایس باب وچ ڈیڑھ درجن توں ودھ وڈے منصوبیاں دا ذکر اے۔ باب اٹھارہ چیف جسٹس افتخار چودھری دی معزولی تے لال مسجد اپریشن متعلق اے۔ باب 19وچ این آر او دا تنازعہ تے باب 20 وچ الیکشن دو ہزار اٹھ وچ ہون والی دھاندلیاں تے بوہت سارے رازاں توں پردہ چکیا گیا اے۔
سچ تے ایہہ وے کہ 328 صفحیاں اُتے مشتمل ایس کتاب نے چودھری شجاعت حسین دی شخصیت تے ایہناں دے کارنامیاں نوں چار چن لا دتے نیں۔ چودھری برادران نیک سیرت، با اخلاق تے وضع دار شخصیات دے طور تے معروف نیں۔
چودھری شجاعت حسین دی ایہہ خودنوشت ایہناں دی سماجی تے سیاسی خدمات دے نال اک ادبی تے صحافتی خدمت دے طور تے اک شاندار وادھا اے جس اُتے ایہناں نوں ڈھیراں مبارکباد۔
(ختم شد)