چانن تے ہنیرا

امین خیال

چانن مینوں میلا لگدا ہنھیرا سُنج مسان
چانن جیویں گلاں کردا ہنھیرا چُپ تے چان
چانن دے وچ سیک حرارت چانن اک پریت
ہنھیرا موت خوف سہم اک ہنھیرا ٹھنڈا سِیت
چانن نِگھ محبت چانن سجن پکا ٹیٹ
ہنھیرا نہج پلیت، لالچی، ہنھیرا ویری ڈھیٹ
چانن ٹھنڈ دلے دی چانن اک پروائی جال
ہنھیرا ہسٹروٹ جماسا ہنھیرا دلدل کال
چانن بُھلے رستے پاوے چانن کرے پیار
ہنھیرا ظالم ہنھیر مچا دے ہنھیرا کردا خوار
ہنھیرا وحشی گرگ درندہ ہنھیرا اک حیوان
چانن سوہل ملوک شہزادہ چانن اک انسان
چانن مہک کھلارے ہر سو چانن رنگ خُشبو
ہنھیرا کوڑا دُھوں اک سنگھنا ہنھیرا دُھخدا چو
ہنھیرا ٹھر دی رات مانگھ دی چانن بھخدا ہاڑ
چانن کومل نازک ہرنی ہنھیرا اے بگھیاڑ
چانن نام وفا دا یارو چانن نیک خصال
ہنھیرا ڈاکو چور اچکا، ہنھیرا اے کنگال
چانن علم جہالت ہنھیرا کہن سیانے ٹھیک
جتھوں تیکن ہنھیرا جاوے چانن اوتھوں تیک
علم دا چانن لا اوئے بندیا دیوے بتیاں بال
ہنھیرا جہالت دُور بھجا کے سوچ خیال اُجال