بھارت دا مکروہ چہرہ

کشمیر سازش تے دھوکہ دہی نال ہتھیان توں بعد بھارت نے پاکستان نوں دولخت کرن دیاں سازشاں رچائیاں

علی انوار

بھارت نوں پاکستان دا ازلی دشمن کہیا جاندا اے تے ایہہ انج ای نہیں کہیا جاندا ایس دے پچھے نفرت، عداوت، سازش، کینہ پروری، دھوکہ دہی، ظلم و ستم تے بھارتی لُٹ مار دی اک مکمل تاریخ اے۔ بھارت نے پہلے دن توں ای پاکستان نوں کدی گجرات دے مسلماناں نوں گاجر مولی وانگوں کٹیا جاندا اے۔ پاکستان مخالف دا کوئی موقع ہتھ توں نہ جان دینا بھارت دی فطرت وچ رچ بس چکیا اے۔ اوہ سیاسی میدان ہوئے یا حربی میدان، کھیڈ دا گرائونڈ ہوئے یا دو طرفہ تعلقات بھارت نے پاکستان لئی ہمیشہ کنڈے ای بوئے نیں ۔ دنیا بھر وچ سپورٹس مین سپرٹ اک معنی رکھدی اے پر بھارت نے کھیڈ وچ وی ایس دشمنی نوں مقدم رکھیا اے۔ کرکٹ ہوئے یا کوئی ہور کھیڈ ہمیشہ پاکستان دے خلاف اوتھے سازشاں رچائیاں نیں جس دی تازہ مثال نیوزی لینڈ کرکٹ ٹیم دا دورہ پاکستان نوں ملتوی کرانا سی جس لئی انڈین سرزمین توں نیوزی لینڈ کرکٹ ٹیم نوں دھمکی آمیز خفیہ ای میلز گھلیاں گئیاں تاکہ پاکستان وچ کرکٹ دے ذریعے جیہڑا ایس دا مثبت تے سافٹ امیج دنیا دے ساہمنے آ رہیا اے اوہ متاثر ہوئے۔ بھارت وچ جے کسے نوں سوئی وی چبھ جائے تے ایس دا الزام آئی ایس آئی اُتے لا دتا جاندا اے جد کہ ایس دے مقابلے وچ پاکستان نے ہمیشہ تحمل مزاجی دا ثبوت دتا اے۔ بھارت نے تقسیم ہندوستان دے موقعے اُتے لارڈ ماوئنٹ بیٹن نال سازش رچا کے گرداس پور نوں انڈیا دے نال ملایا وگر نہ ریڈ کلف ایوارڈ گرداس پور نوں پاکستان وچ شامل کرن دی منظوری دے چکیا سی۔ کیوں جے گرداس پور کشمیر دا پورے بھارت دے نال واحد زمینی رستہ اے۔ کشمیر سازش تے دھوکہ دہی نال ہتھیان توں بعد بھارت نے پاکستان نوں دولخت کرن دی سازشاں رچائیاں۔ مغربی پاکستان تے مشرقی پاکستان وچ کیوں زمینی رستہ موجود نہیں سی جس دا ایس کینہ پرور دشمن نے فائدہ چکیا تے مشرقی پاکستان وچ مکتی باہنی جہی تنظیماں بنوائیاں تے بنگلہ دیش دی آزادی لئی پیسہ پانی وانگوں بہایا۔ پاکستان نوں دولخت کرن دی سازش کرن والے بھارت نوں اج نکسل تے مائو علیحدگی پسنداں دی جدوجہد دا ساہمنا اے جیہڑے بھارت توں آزادی منگ رہے نیں ہن تے خالصتان دا ریفرنڈم وی لندن وچ ہو چکیا اے جس وچ ہزاراں سکھاں نے بھارت توں علیحدگی دے حق وچ ووٹ دے کے مودی حکومت دیاں نینداں اڑا دتیاں نیں۔ مشرقی پاکستان توں علیحدگی اُتے وی بھارت نوں سکون نہیں آیا تے پاکستان اُتے حربی دبائو برقرار رکھن لئی ایٹم بم بنایا تاکہ پاکستان نوں وی مالدیپ تے نیپال وانگوں اپنا باج گزار بنایا جائے پر اوہ تے اللہ دا شکر اے کہ پاکستانی فوج تے سیاسی قیادت دی بصیرت نال پاکستان نے بھارت جہے وڈے دشمن دے مقابلے وچ ایٹم بم بنا کے نا صرف اپنا دفاع مضبوط بنایا بلکہ بھارت دا گھنائونا منصوبہ وی ناکام بنایا۔ بھارت وچ کوئی وڈا وزیر مشیر سیاست دان انج دا نہیں جس دے منہ توں کدی پاکستان لئی کلمہ خیر نکلیا ہوئے۔ بھارتیاں دے دلاں وچ پاکستان لئی اینی نفرت بھر دتی گئی اے کہ اوتھے پاکستان دشمنی دی بنیاد اُتے الیکشن لڑے جاندے نیں تے جتے جاندے نیں جس دی سب توں وڈی مثال مودی تے بی جے پی جہی جماعتاں نیں جیہڑی صرف مسلمان تے پاکستان مخالفت دی بنیاد اُتے پروان چڑھیاں نیں۔ انج تے پاکستان دے قیام ای نال بھارت پاکستان دی سلامتی استحکام تے ترقی دے بارے وچ حاسدانہ رویہ اختیار کیتے ہوئے پر اج کل ایس وچ مزید وادھا ہو چکیا اے کیوں جے پاکستان تے چین دی دوستی تے فیر سی پیک جہیا منصوبہ بھارت دیاں اکھاں وچ کنڈے وانگوں چبھ رہیا اے جس دی وجہ نال ایس دی سازشاں وچ مزید وادھا ہو چکیا اے۔ پاکستان تے چین دی دوستی خطے وچ امن تے خوشحالی دی علامت اے پر بھارت اپنی روایتی تنگ نظری دی بنا اُتے اقتصادی راہداری منصوبہ سبوتاژ کرن دے در تے وے تے اپنی ایسے روایتی ہٹ دھرمی دی وجہ نال اوہ ایس منصوبے وچ شریک نہ ہویا جس دی وجہ نال بھارت دے کروڑاں لوک ترقی توں محروم ہوئے نیں۔
بھارت دی پاکستان دشمنی دا اندازہ ایس گل توں لایا جا سکدا اے کہ چار ورہے پہلاں بھارتی وزیراعظم نریندر مودی آپ ایس گل دا اقرار کر چکے نیں کہ اوہ بنگلہ دیش دے قیام لئی بنائی گئی عسکری تنظیم مکتی باہنی دے حمایت وچ ستیہ گری تنظیم وچ شامل ہوئے تے مکتی باہنی دی مدد کیتی جدوں بھارت دا وزیراعظم برسر عام ایہہ اقرار کردا اے تے بخوبی اندازہ لایا جا سکدا اے کہ کس طرح سیکولرزازم دی آڑ وچ پاکستانیت مخالف جذبات اوتھے پائے جاندے ہون گے۔بھارت اک وڈا ملک اے تے ایہنوں وڈے پن دا مظاہرہ کرنا چاہیدا اے تے اپنے کروڑاں لوکاں دا خیال کرنا چاہیدا اے۔ جیہڑے وسائل پاکستان دے خلاف سازشاں وچ صرف کیتے جا رہے نیں اوہ ایہنوں اپنے بھُک نال بلکدے بالاں اُتے لانے چاہیدے نیں جیہڑا پیسہ پاکستان دیاں جڑاں کٹن و چ لایا جا رہیا اے ایہنوں اوہ اپنے کساناں اُتے خرچ کرنا چاہیدا اے جیہڑے چھ مہینے توں سڑکاں اُتے خوار ہو رہے نیں۔ ایہنوں اپنے وسائل غربت دے ہتھوں لکھاں خود کشیاں نوں روکن اُتے لانے چاہیدے نیں (اک رپورٹ دے مطابق بھارت وچ روزانہ چار سو بندے غربت دے ہتھوں مجبور ہو کے اپنی جان لے لیندے نیں)۔ بھارت نوں ہن ایہہ سازشی رویہ چھڈ کے اپنے فوجیاں دی حالت زار اُتے وی توجہ دینی چاہیدی اے جیہڑے کدی کھانا نہ ملن اُتے ویڈیو بنان اُتے مجبور ہوندے نیں تے کدی خودکشیاں کر کے بھارتی حکمراناں دا سازشی ذہن جگان دی کوشش کردے نیں۔ پاکستان تے ایس دی غیور عوام نے جس طرح پچھلے ستر ورھیاں توں بھارت دی کینہ پروری دا مقابلہ کیتا اے انشاء اللہ مستقبل وچ وی پاکستانی عوام، فوج تے ملک دا ہر شہری شانہ بشانہ مکروہ دشمن دے خلاف سیسہ پلائی ہوئی دیوار بن کے ایس دی سازش دا ڈٹ کے مقابلہ کردا رہوے گا۔