حساب کون دیوے گا ؟

حکومت نال ہون والے معاہدے دے بعد گرفتار کارکناں نوں رہا جد کہ ایس تنظیم دا ناں وی کالعدم تنظیماں دی لسٹ توں کڈ دتا گیا اے، جس دے بعد ٹی ایل پی نے وزیرآباد دھرنا ختم کر کے واپس لہور دا رخ کر لیا اے

رقیہ غزل

بالآخر کفر ٹٹیا خدا خدا کر کے کہ تحریک لبیک تبدیلی سرکار توں اپنے مطالبات منوان وچ کامیاب ہو گئی تے ملک اک بوہت وڈے فساد توں بچ گیا ۔ پنجاب حکومت نے مذہبی و سیاسی جماعت تحریک لبیک دے سربراہ مولانا سعد رضوی سنے تحریک لبیک نال منسلک درجناں بندیاں دے ناں فورتھ شیڈول لسٹ توں کڈن دا نوٹیفکیشن جاری کر دتا اے۔ فورتھ شیڈول اک انج دی لسٹ اے جس وچ انج دے بندیاں دے ناں پائے جاندے نیں جنہاں اُتے انسداد دہشت گردی ایکٹ 1997 دے تحت دہشت گردی یا فرقہ واریت پھیلان دا الزام ہوئے۔ واضح رہوے کہ تحریک لبیک کارکنان نے پچھلے کئی دن توں لہور وچ دھرنا دے رکھیا سی تے فیر اسلام آباد یلغار دی دھمکی دیندے ہوئے اگے ودھنا شرو کر دتا سی جنہاں نوں وزیر آباد روکدے ہوئے مذاکرات دی کوشش کیتی جا رہی سی تے حکومت نال ہون والے معاہدے دے بعد گرفتار کارکناں نوں رہا جد کہ ایس تنظیم دا ناں وی کالعدم تنظیماں دی لسٹ توں کڈ دتا گیا اے۔ جس دے بعد ٹی ایل پی نے وزیرآباد دھرنا ختم کر کے واپس لہور دا رخ کر لیا اے ۔ تحریک لبیک پاکستان نوں کالعدم تنظماں دی لسٹ توں کڈن دے متعلق حکومت دا کہنا اے کہ ایس قدم نال جماعت نوں قومی دھارے وچ لیان وچ مدد ملے گی کیوں جے ایس جماعت نے ملکی آئین تے قانون دی پاسداری کرن دے نال نال مستقبل وچ ایس طرح دے احتجاجی مظاہرے نہ کرن دی یقین دہانی کروائی اے جد کہ تحریک لبیک دے اکابرین دا کہنا اے کہ ساڈی تحریک دا ناں کالعدم جماعتاں دی لسٹ توں نکل چکیا اے تے فرانسیسی سفیر دی بے دخلی لئی کمیٹی دے قیام اُتے کم شروع ہو چکیا اے پر جدوں تیکر جماعت دے سارے کارکنان رہا تے ایہناں دے بینک اکائونٹس عملی طور تے بحال نہیں ہو جاندے اودوں تیکر تحریک دے تحفظات دور نہیں ہون گے۔سانوں مننا پئے گا کہ تحریک مولانا طاہر القادری دی ہوئے یا لبیک دی دونویں اینی جاندار ہوندیاں نیں کہ تخت لہور لرزدا ہویا محسوس ہوندا اے بظاہر ایہو لگدا اے کہ ’’جل بھی چکے پروانے ،ہو بھی چکی رسوائی ۔۔اب خاک اڑانے کو بیٹھے ہیں تماشائی ‘‘۔پر ذاتی مفادات دے حصول دی جنگ وچ کوئی ناکام نہیں ہوندا۔ باقی کس نوں کیہ ملیا تے مذکورہ معاہدیاں دی حیثیت کیہ اے ایہہ تے ویلا دسے گا کیوں جے کل تیکر اینے سخت بیانات داغے جا رہے سن کہ تحریک لبیک دہشت گردی مچا رہی اے پر ہن سننے آں کہ مذہبی لوکاں نال ٹکرائو نہیں چاہندے تے ریاست دا کم ڈنڈا چلانا نہیں یقینا ریاست ماں ہوندی اے تے ماں دا کم ڈنڈا چلانا نہیں ہوندا ایہو اسیں دھرنے دے آغاز وچ لکھیا سی کہ مذہبی و ملکی معاملات وچ ہٹ دھرمیاں نہیں افہام و تفہیم دی پالیسی کارگر ہوندی اے پر بدقسمتی نال آمریت توں جمہوریت دا سفر طے ہو گیا پر ایہہ جمہوریت تے آمریت توں وی بدتر ٹھہری کہ جدوں تیکر لاشے نہیں اٹھدے اودوں تیکر قانون و انصاف تے حکومت دے کناں اُتے جوں تیکر نہیں رینگدی۔
سوال تے ایہہ وے کہ ریاست معاملات دی نزاکت نوں سمجھدے ہوئے بروقت فیصلے کیوں نہیں کردی یا سانوں لاشے چکن دا شوق اے؟ رعونت تے انانیت سانوں ذاتی مفادات توں ہٹ کے کجھ سوچن ای نہیں دیندی ایہو وجہ اے کہ جیہڑا طاقتور ہوندا اے اوہ پا لیندا اے تے غریب عدالتاں دی پیشیاں بھگت بھگت کے مر جاندا اے۔ تاں ای تے ماہر نفسیات انتھونی سٹیونز نے کہیا سی کہ جنگاں پارلیمنٹ یا فوجی ہیڈ کوارٹر وچ نہیں بلکہ انسانی ذہناں توں شروع ہوندیاں نیں یعنی کسے دے خلاف جنگ لڑن دا محرک انسان دے اندر موجو د ہوندا اے تے ایہنوں تحریک اودوں ملدی اے جدوں ایہنوں باور کروایا جائے کہ اولاً ایس دی حق تلفی ہو رہی اے تے دوجا ایہ کہ ایس دے نال ہون والی ناانصافی اُتے کوئی وی پشیمان نہیں تاں اپنے حق نوں کھون لئی اوہ جو وی کرے گا اوہ جائز تے برحق ہوئے گا فیر سوال ایہہ اٹھدا اے کہ کیہ ایس جذبے دی بالیدگی بنی نوع انسان لئی واقعی خطرناک اے ؟ تے ایس دا جواب وی سانوں نسلی ارتقا دے ماہرین توں ملدا اے کہ جنسیت دی طرح جارحیت وی ہر نوع دی بقا لئی ناگزیر اے۔ جارحیت اوہ خوبی اے جیہڑی انسان وچ دھونس بازی تے اگے ودھن دی تحریک اجاگر کردی اے ایسے جارحانہ رویے دی وجہ نال انسان طاقتور نوں ہرا کے خوش ہوندا اے جس دا آغاز سکول وچ نمبر ون پوزیشن دے حصول نال ہو جاندا اے فیر زیست دی پرپیچ پگڈنڈیاں اُتے نسدے معاشی حصول، رہائش تے زندگی دے آسائش و آرام لئی کیتی جان والی تگ و دو ایسے تحریک دی بدولت ہوندی اے۔ دور مت جائو ایس دی مثال بھکاریاں توں مل جاندی اے کہ اوہناں نے وی اپنے لئی علاقے مختص کر رکھے نیں کہ ہر نویں آن والے بھکاری نوں اپنی تھاں بنان لئی ہمت وکھانی پیندی اے۔ ایہو برتری تے غالب آن دی خواہش اک عام بندے نوں رہنما بناندی اے یعنی ثابت ہویا کہ جارحیت نکے گروہ دا وڈے گروہ دے خلاف انج دا رد عمل اے جیہڑا طاقت دے توازن وچ کمی دی صورت وچ احساس محرومی دے نتیجے وچ پیدا ہوندا اے جس وچ مذکورہ بندا اپنے آپ نوں یا دوجیاں نوں لا شعوری طور تے نقصان اپڑاندا اے کیوں جے ایس دی سوچن سمجھن دی صلاحیت مفقود ہو جاندی اے تے جے ایس دی گل نہ سنی جائے تے اوہ تخریب کاری تے بد تہذہبی اُتے اتر آندا اے تے انج اک مظلوم اک ظالم بن جاندا اے جیہڑا اپنے انتقام دی اگ وچ اپنے آپ وی تے دوجیاں نوں وی ساڑ دیندا اے۔ پاکستان وچ بحراناں دے پچھے انج دے عوامل کار فرما ہوندے نیں بایں وجہ حل سڑکاں اُتے ہون لگیا اے۔ سوچن والی گل ایہہ وے کہ ایس ویلے جو ملک دا حال اے کہ مہنگائی ، بے روزگاری تے لٹ مارنے جینا دوبھر کر رکھیا اے کہ ہر دل دے اندر اگ لگی اے کیوں جے عوامی ریلیف لئ کوئی دھرنا دین، آواز چکن تے سنجیدہ اقدام کرن نوں تیار نہیں تے انج جیہڑا لاوا پک رہیا اے اوہ وگ پیا تے کیہ ہوئے گا؟ باقی ایہہ تے سچ اے کہ حکمراناں نے اپنے اقتدار نوں بچان دی تدبیراں کر لیاں نیں تے تحریک لبیک نے اپنی بقاء نوں یقینی بنا لیا اے پر اوہ جیہڑے سارے ناحق شہید کیتے گئے نیں ایہناں دا حساب کون دیوے گا؟ جتھوں تیکر اعلیٰ عدلیہ دا فرض اے ایہناں اُتے ایہہ بھاری ذمہ داری اے کہ اوہ ایہناں اُتے از خود نوٹس لین تے پاکستانی مسلماناں دے ہتھوں اپنے ای پاکستانی مسلماناں نوں شہید کرن والیاں تے ذمہ داران دے خلاف اپنی ایسے عہدہ داری تے ایسے زندگی وچ جلدی توں جلدی انصاف نوں یقینی بنان کدھرے انج نہ ہوئے ایہہ سب ذمہ داران وی ایس دنیا توں یا اپنے اپنے منصب توں فارغ ہو کے چلے جان تے سپریم کورٹ فیر ہتھیلی اُتے سرسوں جمان لئی سرگرم عمل ہو جائے۔