غزل
بابا نجمی
ظالم کولوں غم دا دارو لبھنا واں
سپ دی اکھ چوں اپنا اتھرو لبھنا واں
بھگیاڑاں دی جوہ چوں ٹولا ہرناں دا
چنڈو خانے وچوں گبھرو لبھنا واں
سنگل پنجرے لبھنا واں انساناں لئی
ڈنگراں دے لئی پھمن گھنگرو لبھنا واں
وارث بلھا ورثے وچ فرید پیا
فر وی افلاطون ارسطو لبھنا واں
جنڈ کریراں اُتوں پھُل گلاباں دے
سرکڑیاں چوں گندلاں باتھو لبھنا واں
جس دے اکھر تخت ہلاون ظالم دا
ایہو جیہا میں اک لکھیرو لبھنا واں
پچھے کوئی تے دساں بابا کاہدے لئی
بھگت سنگھ تے دُلا جبرو لبھنا واں
