پائم دے پربندھ ہیٹھ شہید حکیم محمد سعیددی یاد وچ تقریب

شہید حکیم محمد سعید سرسید احمد خان قائداعظم تے علامہ اقبال توں بعد قوم لئی رول ماڈل نیں: مقررین
شہید حکیم محمد سعید محسن ملک و ملت نیں، اوہناں دی خدمات ہمیشہ یاد رکھیاں جان گئیاں: رَلتی

رپورٹ: آفاق بٹ

پائم دے زیر اہتمام شہید حکیم محمد سعید دی یاد وچ تقریب دا انعقاد کیتا گیا۔ پروگرام دی صدارت محترمہ سعدیہ راشد صدر ہمدرد فائونڈیشن پاکستان نے کیتی،مقررین وچ ڈاکٹر حکیم عبدالحنان صدر پائم،حکیم راحت نسیم سوہدروی، حکیم بشیر بھیروی،حکیم حامد نظامی، عائشہ مسعود، طبیبہ طاھرہ بخاری، حکیم سرفراز بھٹی حکیم سجاد زخمی،،حکیم امیر احمد خان،حکیم عبدالرحیم ھاشمی حکیم افتحار مبین عرشی،حکیم امین بیگ،حکیم حارث نسیم مولانا محبوب الرحمن تے دیگر نے اپنے خطاب وچ کہیا کہ شہید حکیم محمد سعید اپنی بے پناہ خدمات تے اعلیٰ شخصیت دا لازوال نقش جریدہ عالم اُتے چھڈ گئے نیں۔

اوہناں نے جنہاں مقصد دا تعین کیتا ایہناں لئی ہر دم ہر لحظہ گرم دم جستجو رہے۔ اوہ اعلیٰ اخلاق تے وضع داری دا نمونہ سن، جہد مسلسل دے ذریعے بے شمار کامیابیاں حاصل کیتیاں اوہناں نے ثابت کر دتا کہ کسطرح اک بندا بے سروسامانی وچ وی اپنی علمی روایات دی حفاظت کر سکدا اے۔ اوہ اپنی مثال آپ سن۔ کوئی ہور ایہناں جہیا نہیں سی اوہ دولت، شہرت تے آرام و آرائش دی جملہ کثافتاں نال بوہت بلند تے بے نیاز ہو چکے سن۔ ڈاکٹر و حکیم عبدالحنان نے کہیا کہ اوہ طب مشرق نوں علمی و عالمی تقاضیاں دے مطابق لے جانا چاہندے سن۔ طب دا مقدمہ دنیا بھر وچ اپڑایا، پاکستان وچ طب دی تعلیم و تحقیق نوں عالمی معیارات دے مطابق بنایا۔ عالمی ادارہ صحت توں طب نوں تسلیم کرایا۔ ایہناں نوں عظمت طب تے رفعت اطباء توں قلبی لگائو سی۔ اج طب دنیا بھر وچ موضوع فکر و تحقیق اے۔حکیم محمد سعید نوں خراج عقیدت پیش کرن دا بہتر طریقہ ایہہ اے کہ اسیں طب نوں ایس دا حقیقی مقام دلائو۔ سینئر نائب صدر پیم حکیم راحت نسیم سوہدروی نے کہیا کہ شہید حکیم محمد سعید کثیر الجہات شخصیت سن پر ایہناں دا بنیادی تشخص طب تے طبیب دا سی، عہد حاضر وچ طب نوں ثقافت بنا دیندا ایہناں دا کارنامہ اے، شہید حکیم محمد سعید نے طب مشرقی دے فروغ تے اطباء لئی کم کیتا تے اوہ کامیاب رہے، ایس دے نال نال اوہناں نے استحکام پاکستان لئی کم کیتا تعمیر اذہان ملت لئی بے شمار علمی تحریکاں شروع کیتیاں۔ شہر علم و ثقافت مدینۃ الحکمہ بسایا تے تعلیمی ادارے قائم کیتے تے وقت دے سرسید اکھوائے۔ ویکھیا جائے تے ایہناں نوں موت نے اک نویں زندگی دتی جیہڑی ہمیشہ رہے گی بلکہ ایس وچ تابندگی آندی رہوے گی۔ عائشہ مسعود کالم نگار نے کہیا کہ شہید حکیم محمد سعید اپنی ذات وچ اک ادارہ، اک انجمن تے اک تحریک سن ملک و ملت لئی ایہناں دی خدمات دا اعتراف ہمیشہ کیتا جاندا رہے گا۔ ایہناں جہے بندے صدیا بعد جنم لیندے نیں۔ شہید حکیم محمد سعید نے قوم دی جیہڑی خدمت کیتی ایس دی کوئی دوجی مثال نہیں۔

شہید حکیم محمد سعیدبے شمار خوبیاں تے صلاحیتاں دے مالک سن اوہناں نے سب توں زیادہ تعلیم تے صحت لئی کم کیتا۔ خوشی کیتی گل اے کہ ایہناں دی صاحب زادی سعدیہ راشد ایہناں دے مشن نوں جاری رکھے ہوئے نیں۔ حکیم بشیر بھیروی نے کہیا کہ شہیدحکیم محمد سعید مجددطب سن، طب دا احیاء ایہناں دا کارنامہ اے اوہ محسن طب مشرقی نیں ایہناں دی وجہ نال طب نوں حیات نو ملی حکیم سعید نہ ہوندے تے اج طب ختم ہو چکی ہوندی۔ اوہ پاکستان دی قابل فخر شخصیت وچ نمایاں نیں۔ حکیم حامد نظامی نے کہیا کہ ایہناں دے تذکرہ دے بغیر پاکستان دی تاریخ طب محض چند سادہ اوراق رہ جاندی اے حکیم امن بیگ نے کہیا اوہ مجدد طب نیں حکیم عمران اجملی نے کہیا تعمیر پاکستان وچ ایہناں دا کردار ہمیشہ تاریخ دا عنوان جلی رہے گا۔ حکیم حارث نسیم نے کہیا کہ اوہ دنیا وی پاکستان دے غیر سرکاری سفیر سن اوہناں نے مسلماناں دا اپنے ماضی نال تعلق جوڑن دی سعی کیتی اوہناں نے ہمدرد نوں وقف ادارہ بنایا تے نونہالاں دے مستقبل اُتے خصوصی توجہ دی علم و ادب تے ثقافت اُتے جمہ جہت متوجہ رہے۔ اسلام پاکستان تے طب ایہناں دے خاص میدان عمل رہے اوہ وزیر تے گورنر سن پر کوئی حکومتی مراعات نہ لئی تے آپ مستعفی ہوئے ایہناں جہے بندے صدیاں بعد پیدا ہوندے نیں۔ حکیم صاحب نے طب نوں حیات نو بخشی تے جدید میڈیکل سائنس دے برابر لا کھڑا کرنا ایہناں دا کارنامہ اے ایہناں دے بغیر پاکستان دی طبی تاریخ محض کجھ سادہ اوراق رہ جاندی اے حکیم عبدالرحکیم ہاشمی نے کہیا کہ کارکنان پائم اپنے بانی پائم دے نظریات دے مطابق ترقی طب لئی جدوجہد جاری رکھن گے تے طب نوں دائرہ عطائیت وچ رکھن دے ذمہ داراں نوں بے نقاب کردے رہن گے۔ صدر مجلس سعدیہ راشد نے کہیا کہ حکیم سعید دا مشن بیماری غربت تے جہالت نال جنگ تعلیم تے علم و ادب دی خدمات جاری اے تے جاری رہے گا۔ مدینۃ الحکمہ ایہناں دا شاندار کارنامہ اے۔ ایہہ شہر علم و ثقافت اے مذاکرے وچ حکما دی وڈی تعداد نے شرکت کیتی۔