جمہوریت دا خرچہ

اشرف شریف

اک وفاقی جمہوری تے عوامی جماعت نوں برباد کرن دا نتیجہ اے کہ پاکستان دے عوام سرمائے تے جعل سازی دے ملاپ نال ابھرن والے سیاستداناں دے نرغے وچ نیں۔ لہور دے حلقہ این اے 133 وچ ضمنی انتخاب دا مرحلہ سامنے اے۔ پی ٹی آئی امیدوا راپنی غلطی پاروں مقابلے توں باہر ہو چکے۔ مسلم لیگ (ن) دی امیدوار شائستہ پرویز عدت دے دیہاڑیاں وچ نیں۔ مسلم لیگ ن نے اجے تک حلقے وچ کوئی سیاسی سرگرمی شروع نہیں کیتی۔ پیپلزپارٹی دے امیدوار اسلم گل نیں جو روزانہ کئی کئی تھاواں تے انتخابی جلسے کر رہے نیں۔ اسلم گل نوں اک برتری ایہ حاصل اے کہ اوہ حلقے دے سکونتی نیں۔ ایہناں دے جلسیاں تے انتخابی مہم نوں کامیاب کرن لئی کئی مرکزی رہنما این اے 133 وچ بیٹھے نیں۔ سابق وزیراعظم راجہ پرویزاشرف سابق وفاقی وزیر رانا فاروق سعید تے سندھ توں شہلارضا‘ نوجوان تحریک انصاف توں مایوس ہو کے پیپلزپارٹی ول مائل ہو رہے نیں۔ ایس سارے عمل وچ فیصل میر تے پیپلزپارٹی لہور دے اوہناں کارکناں دا کردار اہم اے جو شہر وچ پی پی دا احیاء چاہندے نیں۔ اسٹیبلشمنٹ نے پیپلزپارٹی نوں نوازشریف دی دولت راہیں تباہ کیتا۔ دنیا بھر توں دولت اکٹھی کرکے نوازشریف نوں دتی گئی عورت دی حکمرانی دے مخالف نوازشریف دے اے ٹی ایم بنے دائیں بازو دی بالادستی برقرار رکھن دے خواہشمند نوازشریف دے مالی مددگار ٹھہرے نچلے طبقات دے مخالفین نے نوازشریف نوں پیسہ دتا دسیا گیا کہ بینظیر بھٹو سکیورٹی رسک نیں ملک نوں اوہناں توں بچان دے خواہش مند نوازشریف دی مدد نوں آئے۔دسیا گیا کہ پیپلزپارٹی سرمایہ داری نوں ختم کر دیوے گی۔ سارے سرمایہ دار ہتھ وچ چیک پھڑے تے بریف کیس پھڑے نوازشریف دی خدمت وچ حاضر کر دتے گئے۔ ایتھوں تک کہ جہاد دی مخالف دس کے عرب جہادیاں توں رقم ہتھیا لئی گئی۔ ایہ سارے ہتھ نوازشریف دی جیب وچ پیسے ٹھونس رہے سن جو کمی رہ گئی اوہ آئی جے آئی بنا کے پوری کر لئی گئی۔
پیپلزپارٹی دی اک کمزوری آصف علی زرداری سن۔ آصف علی زرداری نے کسے دی پروا کیتی نہ کسے نے اوہناں دی۔ اوہ بہت سارے سکینڈلز دا مرکزی کردار بنائے گئے۔ اپنے اُتے لگن والے الزامات دا وی جواب نہ دتا ایس لئی اج وی اوہناں دے مخالفین اوہناں نوں برے القابات نال یاد کرو تے اوہ نوٹس نہیں کردے۔ بینظیر بھٹو ذاتی طور تے اپنے عہد دے سیاستداناں وچ نسبتاً سمجھدار سن اوہناں دے ساتھی تے آل دوالے دے لوک کرپشن وچ ملوث رہے۔ تریجی دنیا دی جمہوریت کرپشن نال چلدی اے کیوں جے ریاست جمہوریت دا مالی بھار برداشت کرن دے قابل نہیں ہوندی۔ جمہوریت اپنا خرچ بھتے کمیشن تے کک بیکس چوں کڈھدی اے۔ پیپلزپارٹی دی قیادت جاگیردار اے پر جماعت وچ ہمیشہ متوسط تے نچلے طبقات دی نمائندگی باقی جماعتاں دی نسبت زیادہ رہی اے۔ اختیار ملن تے ایہ غریب لوک جمہوریت دا خرچ چلان لئی جو کرپشن کردے اوہنوں پی پی مخالف حلقے آصف علی زرداری نال جوڑ دیندے۔ ایس طرح بینظیر تے اوہناں دے ساتھیاں دی جدوجہد نوں حقیر بنا دتا گیا۔ مسلم لیگ ن نے جمہوریت دا خرچ وکھووکھ ادوار وچ وکھووکھ ذریعاں نال پورا کیتا۔ اوہ کہانی تے سنی ہووے گی: جنگل دے نیڑے بستی وچ اک شکاری آیا۔ بستی والیاں نوں پیش کش کیتی کہ اک باندر پھ ڑکے لیائو تے سو روپیے ملن گے۔ فارغ نوجوان گئے تے کجھ باندر شکار کر لیائے۔ شکاری نے اگلے دن اعلان کیتا کہ اک باندر دے بدلے پنج سو ملن گے۔ ایہ سن کے ادھی بستی باندر پھڑن ٹر گئی۔ دو چار دن وچ جنگل چوں سارے باندر شکاری دے پنجرے وچ بد ہو گئے۔ ہن شکاری نے اعلان کیتا کہ اک باندر دے بدلے ست سو روپیے ملن گے۔ ساری بستی دے لوک جنگل دے کونے کونے وچ پھیل گئے پر کوئی باندر نہ ملیا۔ شکاری دے کارندیاں نے شہر وچ اک دکان تے باندر ویچنا شروع کر دتے۔ اک باندر دی قیمت پنج سو رکھی۔ اک کارندے نے عام بندے دا بھیس وٹا کے بستی والیاں نوں پنج سو روپیے وچ باندر ملن دی خبر دتی۔ لوک پنج سو دا باندر خرید کے ست سو روپیے وچ ویچن دے لالچ وچ سارے باندر خرید لیائے۔ ہن ٹھگ شکاری دا کم پورا ہو چکیا سی۔ لوک باندر لے کے بیٹھے رہ گئے۔ مسلم لیگ ن نے اے ایس آئی تے پٹواری مفت وچ بھرتی کیتے فیر نایب قاصد توں لے کے گزیٹڈ افسراں تک دیاں اسامیاں دے مُل مقرر ہو گئے۔ قریبی لوگ جمہوریت دا خرچہ پورا کردے رہے۔ عام لوکاں دے بچیاں تے ملازمت بین لایا جاندا رہیا۔ ایہ طریقہ بدنام ہویا تے پلاٹاں تے قبضے شروع ہو گئے۔ کئی پلاٹاں تے قبضے وچ براہ راست حکمران شہزادے دا ناں آیا۔ فیروزپور روڈ تے ماڈل ٹائون موڑ دے کول اوہ پلاٹ ہن وی چاردیواری دے نال پیا اے جہدے تے اقتدار دے آخری دیہاڑیاں قبضہ ہویا۔ اقتدار رہندا تے ہن تک پلازہ تعمیر ہو چکیا ہوندا۔ ایس عہد وچ پراپرٹی ڈیلر تے بلڈراں دی وڈی گنتی مسلم لیگ وچ آئی۔ اسلام آباد تے لہور وچ سارے ن لیگی نمائندے پراپرٹی ڈیلر نیں۔ ایہ کم زیادہ محفوظ سی‘ گڑبڑ دا الزام مقامی بدمعاشاں تے پراپرٹی ڈیلراں تے آندا۔ قیادت اپنے لوکاں دے جرائم توں لاتعلقی دا اظہار کر دیندی۔ اک ہور طریقہ موٹروے دی تعمیر دوران ازمایا گیا۔ کہیا جاندا اے کہ ایسے کمیشن توں لندن دے فلیٹ خریدے گئے۔ میٹروبس تے اورنج ٹرین دے معاملے وی‘ میٹروبس منصوبے دا ریکارڈ ایل ڈی اے پلازہ وچ محفوظ سی اوتھے اگ لا دتی گئی۔ کجھ ریکارڈ سیکرٹریٹ وچ سی‘ اوہ وی سڑ گیا۔ ایس مسلم لیگ ن نوں مقبول تے نیک نام دسن لئی اسٹیبلشمنٹ نے کیہ کجھ نہ کیتا۔ کہڑے کہڑے پاپڑ نہیں ویلے گئے۔ اک سیانے رابرٹ گلبرٹ نے کہیا سی: پہلے اسیں عادتاں بنانے آں فیر عادتاں سانوں بناندیاں نیں۔ اپنیاں بریاں عادتاں تے قابو پائو نہیں تے اوہ تہاڈے تے قابو پا لین گئیاں جمہوریت کیویں دی وی ہووے اوہدی اقدار کیویں دیاں وی ہون‘ اسیں غلط روایت دی پرورش کیتی۔ ہن اسٹیبلشمنٹ دے گلے نوازشریف پے گیا اے تے کجھ شرمندگی دا اظہار‘ تاسف‘ معذرت تے بن دی اے۔