’’اشرافیہ اور عوام‘‘ نعرہ انالحق

آسی صاحب دی’’ اشرافیہ اور عوام‘‘ اُنج تے مختلف کالمیاں اُتے مبنی تخلیق اے پر قاری نوں پڑھن اتے پتہ چلدا اے کہ طباعت شدہ مواد دور اندیشی تے حکمت نال لبریز اے

کامران نسیم بٹالوی

جنہا اک پکا تے سچا لکھاری معاشرے دی نبض وریدی و نبض شناسی دا جوہر شعوری رکھدا اے یقینا کوئی دُجا معاشرے دا بندہ ایس زاویہ نگاہ نال اینھی دور اندیشی تے حکمت نہیں رکھدا۔ اُنج تے ہر زمانے دے ہم عصر لکھاریاں دا طبقہ اپنے اپنے ولوں تعمیر معاشرہ و قومی اصلاحی پہلو اُجاگر کرن وچ ہمہ تن گوش رہندا اے پر ایہناں وچوں کجھ اک ای اپنی کامل مشاہداتی و تجرباتی بصارت تے مجاہدانہ استقامت دی بنا اُتے تصنیفی تے تخلیقی اوج کمال حاصل کر پاندے نیں۔ جے انج دے لکھاریاں نوں معاشرے دا آئینہ گردانیا جائے تے بے جا نہ ہوئے گا جیہڑا کہ ہمیشہ اوہ ای وکھاندا جویں منظر نامہ ہوندا اے۔ تے انج دے لکھاری کسے خرقہ پوش توں گھٹ نہیں ہوندے جنہاں دا مقصد نعرہ اناالحق بلند کرنا ہوندا اے ۔غرضیکہ ایہناں نوں لکھ منصوری مصیبتاں ای کیوں نہ برداشت کرنیاں پین انج ای باکمال و زیرک نگاہ لکھاریاں دے تخلیقی شاہکاراں اُتے گل کرنا سورج نوں چراغ وکھان دے مترادف اے تے میرے جہے طالب علم دے تے گل کردے اُنج ای ہتھ پیر پھُل جاندے نیں جدوں میں اپنی ناقص تے ناپائیدار علمی بساط دے تحت وڈے لوکاں دے وڈے کماں اُتے رائے زنی دین دی کوشش کرنا واں پر کیہ کیتا جائے کیوں جے اعلیٰ ادبی خزینیاں نوں پڑھ کے متاثر ہون دے بعد انج دے لکھاریاں دی گوہر نایاب تحریراں دی توصیف و تعریف کیتے بغیر رہیا ای نہیں جاندا تے انج د ے ای نادر لکھاریاں وچوں اک سعید آسی صاحب دا ناں وی اے جنہاں دا شمار پاکستانی دبستان دے صفحہ اول دے لکھاریاں وچ ہوندا اے۔ حالیہ دناں ایہناں دے ادبی سرمایہ وچ ایہناں دی کتاب ’’اشرافیہ اور عوام‘‘ دا نواں اضافہ ہویا اے۔ کرونا وبا دے دوران لکھے جان والے ایہناں دے منتخب شدہ کالماں اُتے مشتمل ایہہ کتاب کسے شاہکار توں گھٹ نہیں۔ آسی صاحب دی’’ اشرافیہ اور عوام‘‘ اُنج تے مختلف کالمیاں اُتے مبنی تخلیق اے پر قاری نوں پڑھن اتے پتہ چلدا اے کہ طباعت شدہ مواد دور اندیشی تے حکمت نال لبریز اے کیوں جے بوہت سارے انج دے کالم پڑھن نوں مل دے نیں جس وچ حالات تے واقعات دی کسوٹی اُتے پرکھن دے بعد آسی صاحب نے ممکنہ پیشگی نتائج دس دتے سن اگرچے بوہت ساری پیش وقت تحریراں دو سالاں یا کئی مہینے پہلے ای لکھیاں گئیاں نیں پر اج دے تناظر وچ پورا پورا درست اتر رہیاں نیں تے ایہہ کسے وی باریک مشاہداتی حقائق و نتائج دے مظہر توں گھٹ ہن۔

ایس وچ کوئی دو رائے نہیں کہ ’’اشرافیہ اور عوام ‘‘ صحافتی نصاب تعلیم وچ اک سند دے طور تے شمار ہوئے گی جس وچ مصنف نے اپنی علمی مہارت دے نال کالم نگاری اختیار کرن والیاں تے اداریہ نویساں لئی واضح خطوط فراہم کیتے نیں جنہاں اُتے چلدے ہوئے پروفیشنل لکھاری سکھ سکن گے کہ کنج سنجیدہ تے تعمیری و تنقیدی صحافت نوں اپنا شعار بنایا جا سکدا اے کیوں جے ہر تحریر پس منظر توں پیش منظر تیکر خوبصورت لڑی وچ پروئی ہوئی اے۔ ایہناں تحریراں وچ نہ کوئی ذاتی حملے نظر آندے نیں تے نہ ای محض اختلاف رائے دے ناں اُتے دوجیاں دی دل آزاری کیتی گئی اے۔ کتاب اُنج تے بوہت سارے پہلوئواں دے لحاظ نال انفرادیت رکھدی اے پر آسی صاحب نے ’’اشرافیہ اور عوام ‘‘ دا انتساب قدرے روایت توں ہٹ کے بیان کیتا اے۔ میری نظر توں کتاباں تے بوہت ساری لنگھیاں نیں پر آسی صاحب بطور پہلے مصنف ویکھن نوں ملے جنہاں نے دیگر مصنفین حتیٰ کہ اپنی وی پچھلے تصانیف توں ہٹ کے وڈے بزرگاں یا اکابرین دی بجائے اک نکی بچی صوفیہ شاہد جیہڑی کہ ایہناں دی پوتی اے دے ناں کیتی جس توں بخوبی اندازہ ہوندا اے کہ جدوں ہونہار برواکہ چکنے چکنے پات ہون دے نال نال اوہ جستجو دے متلاشی وی ہون تے وڈے بزرگ وی ایہناں توں انسپیریشن لے سکدے نیں کتاب اپنے قاری نوں انتساب دے توسط سوچ دی اک نویں جہت فراہم کردی اے۔ ’’اشرافیہ اور عوام ‘‘ دے پیش لفظ وچ ای آسی صاحب نے دریا نوں کوزے وچ بند کر دتا اے تے ایہو حروف آغاز ایہناں دی ادبی و پیشہ ور ساری تخلیقات دا مرکزی فکر تے تھیم دا غماز اے۔ ویکھیا جائے تے آسی صاحب دی ساری صحافتی تحریراں تے بوہت ساری ادبی تخلیقات دا مرکز و محور تے لب لباب ایہناں دے اک جملے وچ محیط اے۔ ’’میں بہرصورت تکریم انسانیت دا داعی اور قائل آں ایس لئی تحقیر انسانیت اتے میرا دل کڑھدا ہے‘‘۔ کیہ عمدگی نال اوہناں نے انسانی عدم مساوات دے خلاف اپنی قلمی مقصدیت نوں بیان کر چھڈیا ایہو وجہ اے کہ ایس نسخہ تحریر وچ آسی صاحب آئین، انصاف تے قانون اُتے عمل درآمدگی دے نال نال انسانی کسمپرسی تے معاشی بے حالی و بدحالی دا مقدمہ لڑدے نظر آندے نیں۔ ’’اشرافیہ اور عوام ‘‘ حضرت انسان دی پیدا کردہ خود ساختہ کلاسفیکیشن لئی کھچی جان والی سطر دے خلاف اک جاندار اواز اے تے ایس کتاب دی ہر تحریر ایہہ باور کروا رہی اے کہ ترقی پذیر ملک پاکستان دے عوام جیہڑے کہ ملت دے حقیقی وارث نیں، دے لگاتار استحصال تے اشرافیہ جیہڑا کہ ہوندی تے گنی چنی ای اے پر چہرے تے واریاں بدلدی رہندی اقتدار وچ ای اے تے محض طاقت دی بنا اُتے انسانی وسائل دی خوب لُٹ مار کردی اے نتیجتاً اپنے بنیادی حقوق توں محرومی تے محکمومانہ طرز زندگی عوام دا مقدر بن جاندا اے تے پاکستانیاں لئی ایہہ اک دائمی المیہ اے۔ آسی صاحب دا دوجا اہم نقطہ تکبر توں نفی تے عاجزی دی رغبت و فکر اے تے ایہو دو اہم نقطے انسانی اقدار دے اعلیٰ معیار نوں دوام بخش دے نیں نہ صرف ایہہ بلکہ ایہناں سب کالماں وچ مشیت الٰہی دی پکار تے مکافات عمل توں بے بہرہ سنگدل اشرافیہ دی بے حسی و بے مروتی نوں کمال مہارت نال بے نقاب کیتا گیا اے۔ دعا اے کہ اللہ تبارک تعالیٰ وطن عزیز نوں آسی صاحب جہے حق گوئی دا علم بلند کرن والے محب وطن Pro Pakistani مصنفین تے نظریاتی محافظین نال مالا مال رکھے۔ آمین