چڑیاں دی موت تے گنواراں دا ہاسا

ابرار ندیم

اخبارات تے نیوز ٹی وی چینلز دے نال ہن سوشل میڈیا تے وی اجیہاں دل خراش خبراں پڑھن‘ سنن تے ویکھن نوں ملدیاں نیں جہناں نوں پڑھ‘ سن تے ویکھ کے ہر اوس بندے دا دل کمب جاندا اے جہدے اندر انسانیت دا تھوڑا جناں وی درد اے۔ کجھ مہینے پہلاں انج دی اک دل دہلا دین والی خبر اے جو ممکن اے تہاڈیاں نظراں توں وی گزری ہووے تے جے کسے وجہ نال تسیں ہن تک ایس خبر توں ناواقف او تے تسیں ہن ای ایہنوں گوگل تے دل دہلا دین والا واقعہ دے ناں توں سرچ کر سکدے او پر کمزور دل حضرات نوں میرا مشورہ اے کہ اوہ ایس اندوہناک خبر دی تفصیل جانن توں ای پرہیز کرن تے ایہ اوہناں دے حق وچ بہتر اے۔ نہیں تے ایس خبر دا تفصیلی احوال جان کے اوہناں دے دل تے وی اوہو قیامت گزر سکدی اے جو آزمائش دی ایہناں گھڑیاں وچ ایس خبر دے مرکزی کردار تے گزری ہووے گی۔ ہن اپنے دل تے ہتھ رکھ کے ذرا ایہ خبر پڑھو جو کجھ ایس طرح اے کہ جہلم دے علاقہ کالاگجراں دے رہائشی سجاد دا دوجا ویاہ اوہدے روحانی پیر نے سوہاوہ دے پنڈ وچ اپنے مریداں دے گھر رشیدہ بی بی نال کروایا جو رخصتی دے بعد کھسرا عبدالرشید نکل آیا جہدے تے ایس بنارسی دھوکہ دہی دے خلاف دولہا نے اک مقامی اخبار دے رپورٹر نوں اپنا دکھڑا سناندے ہوئے دسیا کہ اوہدی پہلی بیوی دی وفات پندراں مہینے پہلاں ہوئی جہدے وچوں اوہدے دو بچے نیں جہناں دی دیکھ بھال لئی اوہدے پیر نے اوہدا رشتہ اپنے مریداں دے گھر رشیدہ نامی لڑکی نال کروایا جہدے بعد اوہ مقررہ تریخ نوں بینڈباجے دے نال بڑی دھوم دھام نال اپنی جنج لے کے سوہاوہ گیا تے خوشی خوشی دلہن لے کے واپس آیا پر اوس ویلے اوہدے ہوش اڈ گئے جدوں اوہدے تے ویاہ دی پہلی رات ای ایہ انکشاف ہویا کہ اوہدی ووہٹی عورت نہیں سگوں مردانہ ہڈاں پیراں والا اک کھسرا اے۔ اگلے دیہاڑے اوہنے گھر آئے پروہنیاں تے محلے داراں دے سامنے شرمندگی توں بچن لئی مجبوراً ولیمہ وی کیتا پر ایہدے بعد اوہنے اپنے ہون والے ایس نویں نویلے دلہن دا ترلا منت کرکے اوہنوں واپس اوہدے میکے گھل دتا۔
ایہ خبر اپنے متن دے اعتبار نال جتھے انوکھی اے اوتھے بڑی دل شکن وی اے پر ایہدے باوجود ممکن اے ایس واقعے وچ دن دیہاڑے لٹ جان والے دولہے دے دل تے گزرن والی قیامت دا اندازہ کیتے بناں کجھ نادان پنجابی محاورے چڑیاں دی موت تے گنواراں دا ہاسا دے عین مطابق ایویں ای دولہے دی بچارگی دا مخول اڑان پر اجہے کسے وی بندے اگے میں ایہ مودبانہ گزارش کراں گا کہ اوہ کجھ لمحیاں لئی اپنی ساری شوخی تے بے حسی نوں ذرا دیر لئی اک پاسے رکھ کے پوری ایمانداری نال ایہ دسے کہ ساڈے ایتھے عام طور تے ہون والے کسے وی ویاہ دے شروع توں تکمیل تک دے سارے مرحلے جہناں وچ کسے وچولے دی وساطت نال رشتے لئی دوہاں خانداناں وچ ابتدائی گل بات‘ وکھووکھ شرطاں دی بنیاد تے رشتے لئی فریقین دی آپسی رضامندی‘ مایوں‘ مہندی‘ بینڈباجے دے نال بارات دی روانگی‘ اللہ اللہ کرکے نکاح‘ سالیاں دی جتی چھپائی تے ددھ پلائی ورگے چنگے بھلے خرچے تے وختے والیاں ساریاں رسماں چوں گزر کے ویاہ والی رات جے اوہدے تے ایہ کھلے کہ اوہدی نویں نویلی دلہن عورت نہیں اک کھسرا اے تے اوہدی کیہ حالت ہووے گی۔ مینوں سوچ کے ای رونا آ رہیا اے کہ وچارے دلہا میاں نے حجلہ عروسی وچ کہڑے ارماناں نال فلم ’’کبھی کبھی‘‘ دا گیت گنگناندے ہوئے عروسی جوڑے وچ ملبوس کھسریاں نوں اپنی دلہن رانی سمجھ کے اوہدا گھونگھٹ چکیا ہووے گا۔ ایہدے بعد ایس خیال نال تے مینوں ہور وی وحشت ہو رہی اے کہ گھونگھٹ چکن تے اوس کھسرے نے کس طرح اپنے کھردرے ہتھاں تے ودھی ہوئی شیو والے میک اپ زدہ چہرے نوں اپنے مجازی خدا توں چھپان لئی شرم و حیا دی بھونڈی جہی اداکاری کردے ہوئے سمٹن دی نکام کوشش کیتی ہووے گی۔ میرا کلیجہ تے ایہ سوچ کے وی منہ نوں آ رہیا اے کہ قسمت دے مارے دلہے نے کیویں پیار بھرے مکالمے دہراندے ہوئے اپنی دلہن رانی دے نال اکٹھے جین مرن دیاں قسماں کھادیاں ہون گئیاں تے فیر جدوں عین موقعے تے دولہا میاں تے ایہ جان لیوا انکشاف ہویا ہووے گا کہ اوہدے سپنیاں دی رانی اوہدی دلہن کوئی عورت نہیں کھسرا اے تے اوہ وچارہ ماہی بے آب وانگوں کیویں ایس حجلہ مایوسی وچ تڑفیا ہووے گا۔ خیر اوس رات جبر وچ ایس مسکین دولہے تے جو قیامت گزری اوہدے لئی اسیں اوہدے حق وچ صرف صبر دی دعا ای کر سکنے آں پر ایس بدترین واقعے توں اسیں سارے اک سبق ضرور سکھ سکنے آں اوہ ایہہ وے کہ سانوں اپنے روزانہ دے کسے وی چھوٹے موٹے کم توں لے کے حیاتی دے اہم ترین فیصلیاں تک عمل کرن توں پہلاں کسے وچولے یاں پیر تے انھے واہ اعتبار کرن دی تھاں اپنی عقل تے شعور دے مطابق اوہدی چنگی طرح چھان بین ضرور کر لینی چاہیدی اے نہیں تے بعد وچ بھاویں کوئی بندہ وی ہووے یاں ادارہ کسے دے نال وی ایس واقعے ورگی مضحکہ خیز صورتحال پیش آ سکدی اے۔٭٭