اپنے ہیروز نوں اپنیاں نوں بچائو

امرجلیل

ساڈے سب دے اپنے اپنے ہیرو ہوندے نیں۔ لفظ ساڈے توں میری مراد اے مسلمان‘ ہندو‘ سکھ‘ عیسائی‘ یہودی وغیرہ۔ ساریاں دے اپنے اپنے ہیرو ہوندے نیں۔ ساڈے ایتھے لفظ ہیرو نوں شوبز نال جوڑ دتا گیا اے۔ فظ ہیرو سن دیاں ای ساڈے ذہن وچ فلماں دے ہیرو آ جاندے نیں۔ ٹیلی ویژن ڈرامیاں وچ مرکزی کردار ادا کرن والیاں دیاں شکلاں دکھائی دین لگ پیندیاں نیں۔ نچ کد کے گانے تے نچن والیاں دے پروگرام خیالاں وچ ٹیلی کاسٹ ہون لگ پیندے نیں۔ ایس قسم دے ردعمل نے لفظ ہیرو دے معنی تے مفہوم نوں سطحی کر دتا اے۔ حالاں کہ لفظ ہیرو اوہناں لئی موزوں تے موافق ہوندا اے جو کجھ غیرمعمولی کر وکھاندے نیں۔ مثال دے طور تے کرکٹ دے کھیڈ وچ وکٹ کیپر بیٹس مین دے طور تے امتیاز احمد میرے ہیرو نیں۔ اج کل دے میچاں وچ محمد رضوان نوں بیٹنگ تے وکٹ کیپنگ کردے ہوئے ویکھ کے مینوں میرے ہیرو امتیاز احمد بڑے یاد آئوندے نیں۔ میں اوہناں نوں کھیڈدے ہوئے ویکھیا سی۔ کھیڈ دے میدان توں علاوہ میں اوہناں نوں روزمرہ دی زندگی وچ ویکھیا سی۔ اوہناں دے بارے بہت کجھ جانن لئی میں تحقیق کیتی سی۔ مطالعہ کیتا سی‘ اوہ مینوں اینے چنگے لگدے سن تے اج تک چنگے لگدے نیں کہ لگدا اے کہ میں اوہناں دی قربت وچ‘ اوہناں دے سائے وچ زندگی گزار رہیا واں۔ مینوں ایس گل دا احساس رہندا اے کہ میں انج دا کم نہ کراں جو امتیازاحمد نہیں سن کردے۔
اج توں سٹھ ستر ورھے پہلاں جدوں امتیازاحمد کرکٹ کھیڈدے سن اودوں ڈیجیٹل ڈیوائسز دا کھیڈاں وچ عمل دخل نہیں سی ہوندا۔ فاسٹ بالرز دی گیند تے بیٹس مین نوں ایل بی ڈبلیو قرار دینا‘ یاں وکٹ کیپر دے ہتھوں کیچ ہون دی اپیل دے بعد امپائر دا بیٹس مین نوں آئوٹ دینا اوکھا کم ہوندا سی۔ جے کدی گیند امتیازاحمد دے بیٹ نوں چھو کے وکٹ کیپر دے ہتھاں وچ چلی جاندی تے اوہ اک لمحے لئی وکٹ تے نہیں سن ٹھہردے۔ امپائر دے فیصلے توں پہلاں آپ پویلین ول ٹر جاندے سن۔ بڑی عقیدت تے احترام دے باوجود میں کدی غیرمنطقی گلاں امتیازاحمد نال نہیں جوڑیاں۔ اوس دور دے لوکاں نے اڑا رکھیا سی کہ امتیاز جدوں کورڈرائیو ہاک شاٹ کھیڈدے سن اودوں گیند ڈنگی کر دیندے سن تے امپائرز نوں کھیڈ روک کے گیند بدلنی پیندی سی انج دیاں مافوق الفطرت گلاں امتیازاحمد دے نال جوڑنا اودوں وی مینوں چنگا نہیں سی لگدا تے ہن وی چنگا نہیں لگدا۔ اڑان والیاں نے ایہ وی اڑا رکھیا سی کہ امتیازاحمد جدوں چھکا لاندے سن اودوں گیند گرائونڈوں باہر جا پیندی سی۔ کھلوتیاں تے چلدیاں گڈیاں وچ ڈینٹ پا دیندی سی۔ ایہ بھونڈیاں تے احمقانہ گلاں نیں۔ ایس قسم دے نامعقول تے ناروا قصیاں توں تسیں اپنے ہیرو دا قد کاٹھ نہیں ودھاندے سگوں آپ اپنے ہیرو دی تضحیک کر دیندے او۔ لوکاں نوں اپنے ہیرو تے ہسن دا موقع دیندے او۔ کجھ لوک اینے اگے ودھ جاندے نیں کہ بناں کسے جھجھک دے دعویٰ کردے سن کہ امتیازاحمد حکیم تے طبیب وی سن۔ اوہناں دے ہتھ وچ کراماتی شفاء سی۔ بیماراں دا فی سبیل اللہ علاج کردے سن۔
اک ہیرو نوں چاہن ولیاں وچ کجھ پڑھے لکھے‘ دانشور‘ پروفیسر‘ ڈاکٹر‘ انجینئر‘ سائنسدان‘ ادیب‘ شاعر تے فہم و ادراک دے دھنی ہوندے نیں تے بہت وڈی گنتی وچ میرے ورگے گھٹ پڑھے لکھے‘ ذہنی طور تے نامعقول‘ جو اپنے ہیرو دے بارے سنی سنائی‘ مافوق الفطرت گلاں تے قصیاں تے یقین رکھدے نیں تے منطق توں ہٹ کے کارنامیاں تے انھے واہ اعتبار تے عقیدہ رکھدے نیں۔ اوہ ناقابل فہم گلاں نوں مرچ مسالے لا کے اگے ودھاندے نیں۔ اپنے گھڑے ہوئے قصے کہانیاں نوں معتبر سمجھدے نیں۔ چھوٹا موٹا شک ظاہر کرن والے نو ںاپنے ہیرو دا دشمن تے مخالف سمجھدے نیں تے اوہنوں سبق سکھان تے ٹھکانے لان تے تل جاندے نیں۔ ہیرو دے گھٹ پڑھے ہوئے معتقد تے چاہن والے گنتی وچ اینے زیادہ ہوندے نیں کہ ہیرو دے پڑھے لکھے‘ دانشور معتقدان نوں‘ منطق توں ہٹ کے گلاں توں منع کرن دی جرأت نہیں رکھدے۔ اوہ ان پڑھ یاں گھٹ پڑھے لکھے معتقد نوں قائل نہیں کر سکدے کہ وہ انپے ہیرو دے بارے مبالغے توں کم نہ لین۔ تسیں سمجھان بمجھان لئی اوہناں نو ںایہ نہیں آکھ سکدے کہ ایہ لغو گلاں نیں کہ امتیاز احمد جدوں بیٹنگ کرن آئوندے سن اودوں لوک اپنیاں گڈیاں سٹیڈیم توں بڑی دور پارک کردے سن کیو ںجے امتیازاحمد جدوں چھکا لاندے اودوں گیند سٹڈیم دے آل دوالے پارک کیتیاں گڈیاں تے جا پیندی سی تے گڈیاں وچ ڈینٹ پا دیندی سی۔ بڑھاوے دیاں گلاں توں روکن تے اوہ مرن مارن تے آ جاندے نیں۔ اوہ ہن وی اک دیومالائی گل تے اعتبار کردے نیں کہ کئی واری جدوں امتیاز احمد نے چھکا لایا سی‘ اودوں گیند پرت کے زمین تے آن دی تھاں اسمان وچ غایب ہو جاندی سی۔ معتقداں نے علامہ اقبال نوں ایناں سیاست وچ گھسیٹیا اے کہ اوہنا ںدی حیثیت بطور شاعر گھٹ کے رہ گئی۔ عام بندے لئی اوہ صرف سیاستدان ہو کے رہ گئے نیں اوہ اوس اقبال نوں نہیں جان دے جنہے کہیا سی
تو رہ نور دشوق ہے منزل نہ کر قبول
لیلیٰ بھی ہم نشیں ہو تو محمل نہ کر قبول
کئی واری انج وی ہوندا رہیا اے کہ ہیرو دی شہرت تو ںمتاثر ہو کے میرے ورگے گھٹ پڑھے لکھے اوہدے معتقد ہو جاندے نیں۔ اوہناں دے بارے سنی سنائیاں گلاں نوں مرچ مسالے لا کے اگے ودھاندے رہندے نیں۔ اک معتقد وجدانی کیفیت وچ لوکاں نو ںدس رہے سن کہ خلیل جبران روزے نماز دے پابند سن تہجد گزار سن۔ کئی واری حج تے عمرے دی سعادت حاصل کر چکے نیں۔ اوہناں دا اخلاص تے اخلاق ویکھ کے کئی عیسائی تے یہودی مسلمان ہو گئے سن۔ اللہ دے کسے بندے نے اوہناں دے کن وچ کہیا‘ بھائی صاحب خلیل جبران عیسائی سن۔ کجھ بعید نہیں کہ اجہے معتقد سانوں قائل کر دین کہ قائداعظم بہت وڈے پہلوان وی سن۔ اوہناں نے اپنے دور دے وڈے وڈے پہلواناں نوں پچھاڑ دتا سی۔ اللہ سانوں تے ساڈے ہیروز نوں اپنی پناہ وچ رکھے۔٭