قدرت اللہ چوہدری ۔۔۔ اک عہد ساز شخصیت

چوہدری صاحب صحافت وچ شرافت،امانت، دیانت تے صداقت دی علامت سن

تحریر:صدام ساگر

قدرت اللہ چوہدری عہدِ نو دا لیجنڈ صحافی ای نہیں سی اک شخصیت سی، اک بندا سی، نکتہ داں، نکتہ بیں، نکتہ آفریں، نکتہ چیں، بذلہ سنج، حاضر جواب، زود فہم، کم گو، سخن پرور، سخن طراز، صاحبِ فن، اصول پرست،خوش لباس، خوش گفتار ،صاف گو، مردِ درویش ، محبت پرور تے واقعتا اک عظیم انسان سن۔ صحافت وچ شرافت،امانت، دیانت تے صداقت دی علامت سن۔ اوہ اک بے باک صحافی تے حق گو قلم کار سن اوہناں نے قلم دی عزت و عظمت نوں ماں بھین دی عزت و عظمت وانگوں عزیز جان رکھیا اوہناں نے اصولاں دی خاطر کسے سودے بازی نوں قبول نہ کیتا۔ حق و قدامت دا جھنڈا اُچا کرن لئی اوہناں نے ہمیشہ دیانتداری توں کم لیا۔

آپ سچے مسلمان سن۔ اسلام نال والہانہ محبت دا جذبہ ای ایہناں دی کامیابی دا زینہ سی۔ ایہو وجہ اے کہ عزم شکن تے ایمان آزما دور وچ وی اوہناں نے اپنے نظریات وچ لچک نہ آن دتی۔ ایہناں دی تاریخ اُتے گہری نظر سی کہ کجھ ایہناں دی نگاہ توں عیاں نہیں سی تے ملکی سیاست اُتے تے چلدا پھردا اک انسیائکلوپیڈیا سن۔ حسن صورت تے حسن سیرت دے اعتبار نال بے پناہ خوبیاں دے ماہر تے اعلیٰ اخلاق دے پیکر سن۔ ایہناں دے ہم عمر قریبی ساتھی تے روزنامہ پاکستان لہور دے چیف ایڈیٹر مجیب الرحمن شامی دسدے نیں کہ قدرت اللہ چوہدری نال میرا 25 ورہے دا ساتھ سی۔ ایہہ 25 سال جیہڑے رفاقت دے نیں اوہ صحیح معنیاں وچ درویش سن کدی اوہناں نے اپنی کسے ذاتی مشکل یا ضرورت دا کوئی ذکر نہیں کیتا تنخواہ ویلے اُتے مل گئی یا نہیں ملی، گھٹ ملی، زیادہ ملی، کوئی مشکل درپیش ہے ، نہیں ہے، کدی حرف شکایت زبان اُتے نہیں آیا پر جدوں میرے نال ایہناں دی رفاقت قائم ہوئی اوہ فیر آخری ساہواں تیکر قائم رہی تے اسیں اک دوجے نال جُڑے رہے۔ دعویٰ تے بوہت سارے لوک کردے نیں درویشی دا پر اوہ دعویٰ نہیں کردے سن۔ اوہ خلوت دے بندے سن جیہڑے لوک ڈی اُتے کم کردے نیں جیہڑے اداریہ نویس ہوندے نیں ایہناں نوں اپنے دفتراں وچ جم کے بیٹھنا پیندا اے اوہ مجلس دے لوک نہیں ہوندے ایہناں دا دفتر ای ایہناں دی کائنات ہوندا اے۔ اوہ اپنے کم نال کم رکھدے نیں ایہہ صوفی لوک کم نال محبت کردے، چھٹی دے دن وی دفتر آ جاندے اک اک لفظ اُتے نظر سی اک اک شے نوں ویکھدے اک اک شے نوں پڑھدے۔ پر اج ایس دے جدا ہون نال دل بوہت بوجھل، اکھاں نم دیدہ، دل افسردہ تے غم دی حکمرانی اے۔ سچی گل اے ، بقول علامہ اقبال کہ:
مرنے والے مرتے ہیں لیکن فنا ہوتے نہیں
یہ حقیقت میں کبھی ہم سے جدا ہوتے نہیں
ایہناں دے وسیع مطالعے توں پتہ چلدا اے کہ قدرت نے جویں سارے علم دے خزانے ایہناں دے سینے وچ رکھ دتے نیں۔ ایہناں نوں پنجابی، اردو تے انگریزی زبان اُتے دسترس حاصل سی اوہ اسلام تے پاکستان دے سچے سپاہی سن۔ بقول شاعر
لکھے روز و شب جو چمن کے ترانے
میں ایسے قلم کی سیاہی بنوں گا
چوہدری صاحب 1948 نوں پیدا ہوئے۔گورنمنٹ کالج لہور توں انگلش لٹریچر وچ ماسٹر ز کیتا تے فیر شعبہ صحافت نال ہمیشہ لئی منسلک ہو گئے۔ اوہناں نے زندگی وچ وڈے وڈے اخباری اداریاں وچ کم کیتا جنہاں وچ روزنامہ ’’نوائے وقت‘‘، روزنامہ ’’جنگ‘‘، روزنامہ ’’دن‘‘ تے ’’روزنامہ ’’پاکستان‘‘ دے علاوہ دیگر قومی اخبارات و رسائل شامل نیں۔ کئی وڈے صحافتی ادارے ایہناں دے ’’نقشِ قدم‘‘ توں مزین و معطر ہوئے تے بے شمار نامی گرامی صحافی و کالم نگار ایہناں دے خوشہ چیں تے ایہناں دی شاگردی و رہنمائی توں ممتاز مقام دے حامل ٹھہرے۔
چوہدری صاحب نال میرا پہلا تعارف 2015ء دے لگ بھگ ایہناں دے قریبی دوست تے ساڈے استاد شاعر ناصر زیدہ مرحوم دے توسط نال ہویا۔ کالم نگاری دے شوق دا ایہناں نال ذکر کیتا تے اوہناں نے بھرپور حوصلہ افزائی کیتی۔ ایس دے بعد ملاقاتاں دا طویل سلسلہ چل پیا۔ مجلہ’’نوائے ادب‘‘ دا جدوں وی تازہ شمارہ شائع ہوندا تے میں جیل روڈ اُتے واقع روزنامہ ’’پاکستان‘‘ دے دفتر ایہناں نال ملن چلا جاندا۔ ایہناں دے کمرے وچ اینی خاموشی ویکھ کے گھنٹیاں تیکر خاموش بیٹھنا پیندا کہ گل کتھوں تے کنج شروع ہوئے۔ دیگر ملاقاتاں وچ ایہناں دے کمرے وچ چوہدری خادم حسین، پروفیسر خالد ہمایوں تے افضل عاجز جنہاں دی آمد نال اک محفل جہیا سما ہوندا۔
چوہدری صاحب توں مینوں خاکسار نوں بوہت کجھ سکھن دا موقع ملیا اوہ اکثر میرا کالم روک دیندے تے فرماندے ، تسیں کالم نوں دو تن وار پڑھ کے گھلیا کرو تہاڈے کالم وچ غلطیاں دے انبار لگے ہوندے نیں۔ ایس حوالے نال میری رہنمائی کرن وچ ایہناں دا بوہت وڈا ہتھ رہیا۔ میرے کالم دے لوگو دا ناں ’’صدائے ساگر‘‘ وی اوہناں نے ای تجویز کیتا ایہناں دے نال ملاقاتاں دا احوال جنہا وی بیان کیتا جائے گھٹ ہوئے گا اوہ اینے عظیم سن کہ ایہناں دے کول بیٹھن والا اپنے آپ نوں کدی نکا نہیں سمجھدا سی۔ مرد قلندر تے مرد درویش دی جیہڑی صفات کتب و جرائد وچ لکھیاں گئیاں نیں اوہ جے مجسم سمجھی ہوئے تے جناب قدرت اللہ چوہدری دی پُرکشش شخصیت وچ ’’پاکستان ‘‘بولدا سی۔

کہاں سے تُو نے اے اقبالؔ سیکھی ہے یہ درویشی
کہ چرچا پادشاہوں میں ہے تیری بے نیازی کا
ادھی صدی تیکر صحافت نال جڑے رہن والے قدرت اللہ چوہدری کرونا وبا پاروں سروسز ہسپتال وچ داخل سن کجھ طبیعت سنبھلی تے گھر شفٹ ہو گئے ودھدی کمزوری دی وجہ نال طبیعت زیادہ وگڑ گئی تے 3 نومبر 2021 نوں ہمیشہ ہمیشہ لئی ساڈے توں جدا ہو گئے۔ ایہناں دی وفات اُتے دل اُتے غم دی سدا حکمرانی رہوے گی۔ آخر وچ خالد شریف دے ایس شعر دے علاوہ ہور کیہ کہیا جائے۔
بچھڑا کچھ اس ادا سے کہ رُت ہی بدل گئی
اک شخص سارے شہر کو ویران کر گیا