پنجاب آرٹس کونسل ضلع شیخوپورا دی چھماہی رپورٹ

سکھ مذہب دے بانی ’’گرونانک دیو‘‘ نے اپنا علمی، ادبی تے مذہبی پندھ شیخوپورا دے نواحی پنڈ ’’سچا سودا‘‘ توں شروع کیتا سی

جاوید پنچھی

پنجاب کونسل آف دی آرٹس انفارمیشن اینڈ کلچر ڈیپارٹمنٹ پورے پنجاب وچ ثقافتی، فنی تے ادبی سرگرمیاں تے کم رہی اے۔ فنون لطیفا تے ثقافت کسے وی قوم دیاں تخلیقی صلاحیتاں دامونہ مہاندرا ہوندے نیں۔ پنجاب دی ثقافت، رہتل، ذرائع ابلاغ ، رکھ رکھائو، تے رسم و رواج دیاں جڑاں بہت ڈونگھیاں نیں۔
اُنج تے شیخوپورا شہر دی تاریخ بہت پرانی اے تے ایہ شہر بڑے حوالیاں نال مشہور اے۔ مثال طور تے:
سکھ مذہب دے بانی ’’گرونانک دیو‘‘ نے اپنا علمی، ادبی تے مذہبی پندھ شیخوپورا دے نواحی پنڈ ’’سچا سودا‘‘ توں شروع کیتا سی۔

ایہ انکھی لوکاں دا شہر اے جسراں دُلّا بھٹی۔
ایہ شہر مغل بادشاہواں دے فنی طرز تعمیر جسراں قلعہ، ہرن مینار تے شکار گاہ پاروں وی مشہور اے۔
جے ادب و ثقافت تے فنون لطیفا دے اعتبار نال شیخوپورا دی گل کیتی جائے تے فیر ایہ دھرتی بڑی زرخیز اے۔ مثال دے طور تے شاعری دے حوالے نال مشہور پنجابی لوک داستان ’’ہیر رانجھا‘‘ دے خالق تے مزاحمتی صوفی شاعرحضرت سید وارث شاہ رحمۃ اللہ علیہ، تے مشہور اسلامی عشقیا قصا ’’یوسف زلیخا‘‘ دے خالق حضرت مولوی عبدالستار رحمۃ اللہ علیہ، عالمی پدھر دے شاعر ہوئے نیں۔ جہڑے کہ شیخوپورا دی دھرتی دے سپتر نیں۔

اجوکے دور وچ ، جہناں شاعراں نے عالمی لیول دیاں کانفرساں وچ کروائے گئے مشاعریاں وچ رلت کیتی اوہناں وچ ،ڈاکٹر میاں ظفر مقبول (پی ایچ ڈی) تے پروفیسر غلام رسول آزاد(مرحوم) دے ناں شامل نیں۔
صوفی گائیک جناب حسنین اکبر ہوری وی گواہنڈی ملک بھارت دے پنجاب وچ کئی وار اپنے فن دے جوہر وکھا کے عالمی پدھر دے دانشوراں توں داد لے چُکے نیں۔
ایس توں وکھ ضلع شیخوپورا وچ تقریباً دو سو(۲۰۰) توں ودھ لکھاری موجود نیں ۔جہناں نے شاعری تے نثر لکھ کے اپنا تے اپنی مٹی دا ناں اُچا کیتا اے۔
شیخوپورا دے ادبی، ثقافتی ٹیلنٹ نوں مُکھ رکھدیاں پنجاب دے سارے ضلعیاں وانگ شیخوپورا وچ وی آرٹس کونسل بنائی گئی ۔ پنجاب سرکار نے سارے پنجاب دیاں ساریاں ڈویژناں وچ آرٹس کونسل بنائی جدوں کہ ضلع بھکھر وانگوں شیخوپورا وچ وی ادب و ثقافت تے فن دے ودھارے واسطے آرٹس کونسل فعال کیتی گئی۔اج اسیں آرٹس کونسل شیخوپورا دی کارکردگی تے اِک نظر مارنے آں۔
پنجاب ٹیلنٹ ہنٹ پروگرام 2020-21وچ آرٹس کونسل دی چھتر چھاویں وکھ وکھ نوعیت دے پروگرامز (مقابلے) ہوئے۔ پوری ’’لاہور ڈویژن‘‘ وچ ضلع شیخوپورا نے ست پوزیشناں جِت کے پورے پنجاب وچ اپناناں اُچا کر لیا اے۔
شیخوپورا آرٹس کونسل ولوں اکٹھاں دی شروعات ’’مقابلا حُسن و قرأت‘‘ توں ہوئی تے 11جولائی 2021نوں ’’آبادی دیہاڑ‘‘ دے حوالے نال سیمینار تے ’’آگاہی واک‘‘ ہوئی۔
ہفتا رحمۃ العلمین ﷺ بارے گل کیتی جائے تے پنجاب سرکار ولوں جاری کیتے گئے مراسلے مطابق شیخوپورا آرٹس کونسل دی چھتر چھاویں کئی اکٹھ کیتے گئے۔ جہناں وچ ’’عورتاں دا مشاعرا، قوالی، سیرت النبی ﷺ کانفرنس، سیمینار تے لکھائی (خطاطی) دا مقابلا وی کروایا گیا۔ ایہ ہفتاوار پروگرام بڑی کامیابی نال مُکے ۔ ایہناں سارے اکٹھاں وچ اُچیچے پروہنے صوبائی وزیر قدرتی آفات میاں خالد محمود، اوہناں دی بیگم تے ڈپٹی کمشنر ضلع شیخوپورا جناب رانا محمد شکیل اسلم سن۔ جدوں کہ پروگرامز دے چیف کوآرڈینیٹر دی ذمے واری ایڈیشنل ڈپٹی کمشنر (جنرل) شیخوپورا ڈاکٹر احسان الحق ضیاء نے نبھائی۔ ایہناں اکٹھاں دی کامیابی تے اسسٹنٹ ڈائریکٹر محمد عمران نوں ضلعی انتظامیا ، ادبی تے ثقافتی حلقیاں ولوں مبارکاں دے ڈھیر لگ گئے تے شیخوپورا آرٹس کونسل دی کارکردگی نوں سراہیا گیا۔
ایس توں وکھ مختلف تھاواں تے وکھ وکھ تاریخاں نوں کامیاب مشاعرے کروائے گے تے کشمیر دے حوالے نال ’’کالا دیہاڑ‘‘ تے سیمینار دے نال ریلی وی کڈھی گئی۔
ایس توں بعد ’’ادبی بیٹھک‘‘ جہڑی کہ ادب ، فن تے ثقافت نال جُڑت رکھن والی لوکائی واسطے ریڑھ دی ہڈی سمجھی جاندی اے تے ذوق رکھن والے حلقیاں نوں اِک دوجے نال جوڑی رکھدی اے، شیخوپورا آرٹس کونسل نے اجہی ’’ادبی بیٹھک ‘‘ وی شروع کیتی اے۔
پاکستان دے مشہور شاعر سید الطاف حسین بخاری جہڑے اج کل امریکی ریاست ٹیکساس وچ رہندے نیں ۔ اوہناں نوں دعوت دتی گئی تے اوہناں دی کتاب ’’رقص آوارگی‘‘ دا مُکھ وکھالی اکٹھ وی کروایا گیا۔ پنجاب آرٹس کونسل شیخوپورا وی ڈویژنل آرٹس کونسلز وانگوں ادب، فن تے ثقافت دی ترویج واسطے لگاتار کم کر رہی اے۔

پنجاب آرٹس کونسل شیخوپورا دی چھتر چھاویں پیر بہار شاہ ایسوسی ایٹ کالج وچ ’’اقبال دیہاڑ سیمینار‘‘ کروایا گیا۔ جہدے وچ اچیچے پروہنے ایڈیشنل ڈپٹی کمشنر (فنانس اینڈ پلاننگ) میاں محمد نذیر دے علاوا مشہور شاعر، ادیب تے مزاح نگار اشفاق احمد ورک ، ڈاکٹر محمد اکرم سراء، ڈپٹی ڈائریکٹر پاپولیشن ویلفیئر محترمہ صائمہ شکور، تے اعزازی پروہنیاں وچ چودھری گلفام ورک، کالمسٹ تے سماجی کارکن عمران امین تے روز وار بھلیکھا لاہور دے بیوروچیف جاوید پنچھی وی شامل سن۔
اوس سیمیناز دے رلتیاں نوں خطاب کردیاں پرنسپل میڈم فرح نصیر نے ڈاکٹر علامہ محمد اقبال دی سیاسی، تعلیمی، معاشرتی تے مذہبی خدمات نوں سراہیا۔ کالج دیاں پڑھیارناں نے ڈاکٹر علامہ محمد اقبال ؒ ہوراں دے لکھے ہوئے ترانے پڑھ کے ’’ڈاکٹر محمداقبال‘‘ ہوراں نوں خراج عقیدت پیش کیتا۔اوس تقریب دے آخر تے اسسٹنٹ ڈائریکٹر آرٹس کونسل شیخوپورا محمد عمران رضا نے اچیچے پروہنیاں تے اعزازی پروہنیاں دا شکریہ ادا کردیاں ہویاں، ادبی، ثقافتی سرگرمیاں تیز کرن، تے ٹیلنٹ ہنٹ 2021-22دے حوالے نال دسدیاں آکھیا: ’’ایہناں ثقافتی سرگرمیاں دے پربندھ واسطے شیخوپورا آرٹس کونسل ہر طرحاں جتن کر رہی اے تاں جے شیخوپورا دی لوکائی نوں تعمیری تے معیاری تفریح دے کے اِک سازگار ماحول بنایا جا سکے تے اپنی دھرتی نال پیار کرن والیاں دا حوصلا ودھایا جا سکے ۔
تاں جے ایہ ورثا اگوں آئون والی نویں پیڑھی تک پوری طرحاں اپڑایا جا سکے۔ ایس گل دی بھریں آس اے کہ شیخوپورا آرٹس کونسل آئون والے ویلے وچ ادب، فن تے ثقافت دی بھرویں ترویج لئی اپنا کردار ادا کرے گی۔