خالد حسین تھتھا ل ہوراں آسطے ہِرکھ اِکٹھ

اِکٹھ وچ اوہناں دی نویں چھپن والی کتاب ’’جیون جوبن رُت بہار‘‘ دی مُکھ وکھالی وی کیتی گئی

رپورٹ: آفاق بٹ

پنجابی یونین دے پربندھ ہیٹھ پنجابی دے معروف شاعر تے دانشور خالد حسین تھتھال دے تعزیتی ریفرنس تے اوہناں دی غزلاں تے نظماں اُتے مشتمل کتاب ’’جیون جوبن رُت بہار‘‘ دی تقریب رونمائی پنجاب ہائوس وچ منعقد ہوئی جس دی صدارت پنجابی ادبی بورڈ دی سیکرٹری پروین ملک نے کیتی۔

مہمانان خصوصی پنجابی تحریک دے چیف آرگنائزر معروف صحافی و دانشور الیاس گھمن،خالدحسین تھتھال دے بھائی نعیم طارق تھتھال ،رائے محمد خاں ناصر،ڈاکٹر اظہر محمودچوہدری تے پنجابی شاعر سید آصف شاہکار سن۔ تقریب وچ پنجابی ادب نال تعلق رکھن والی نامور شخصیات کلیان سنگھ، جاوید آفتاب ،پنجابی میڈیا گروپ دے صدر ندیم رضا،رفیق چوہدری دے علاوہ مختلف لوکاں دی وڈی تعداد نے رلت کیتی۔ تقریب دے آغاز اُتے پنجابی یونین دے چیئر مین مدثر اقبال بٹ نے کہیا کہ پنجاب ہائوس دے قیام دا مقصد پنجابی ادب، پنجابی زبان تے پنجاب لئی کم کرن والیاں دی حوصلہ افزائی لئی تقریبات تے ریسرچ ورک کرن دے موقعے فراہم کرنا اے اوہناں نے کہیا کہ اج توں 30 سال پہلاں پنجابی دی گل کرنا غداری دے زمرے وچ آندا سی پر ہن حالات بدل چکے نیں آن والے دناں وچ مزید بہتری آئے گی۔ اوہناں نے کہیا کہ اسیں پنجاب ہائوس نوں اجیہا سینٹر بنانا چاہنے آں جتھے پرنٹ، الیکٹرانک تے سوشل میڈیا دی ساری سہولتاں میسر ہون تے ایتھے پنجابی ادب تے پنجاب دی تاریخ اُتے تحقیق کرن والیاں نوں ساری سہولتاں میسر ہون۔ اوہناں نے کہیا کہ میں اسلم گھمن دے پیراں دے نشاناں اُتے پنجابی لئی چلنا سکھیا اے اوہناں نے کہیا کہ اسیں پنجاب ہائوس وچ گورمکھی سکھان دیاں کلاساں دا آغاز کر دتا اے جس لئی کلیان سنگھ دی خدمات حاصل کر لئی اے۔ ایس سلسلے وچ شرکت کر کے امتحان وچ نمایا پوزیشنز حاصل کرن والیاں نوں انعامات وی دتے جان گے ۔ اوہناں نے کہیا کہ خالد حسین تھتھال پنجابی دے منفرد شاعر سن اوہ اج ساڈے وچ موجود نہیں پر اوہ کتاب دی صورت وچ ساڈے نال موجود نیں۔ کلیان سنگھ نے کہیا کہ خالد حسین تھتھال نے اپنی کتاب دی پہلی نظم وچ ای ماں بولی پنجابی دے تحفظ دا عزم کیتا اے۔گورمکھی دیاں کلاساں شروع کرن اُتے مدثر بٹ دا شکر گزار آں کہ اوہ پنجابی دے فروغ لئی بوہت وڈا کم کر رہے نیں۔ 1980 توں اسلم گھمن نوں گورمکھی لئی کم کردے ہوئے ویکھ رہیا واں۔ جاوید آفتاب نے کہیا کہ میں پیدا لہور وچ ہویا واں کراچی چلا گیا سی واپس آیا تے لہور والیاں نے اینا پیار دتا کہ ایتھے دا ہو کے رہ گیا واں۔ جنہی زباناں نیں سب قابل احترام نیں تے قومی زباناں نیں۔ پنجابی میڈیا گروپ دے صدر ندیم رضا نے کہیا کہ میرے لئی سب توں قیمتی شے کتاب اے۔ زاہد حسین توں خالد حسین تھتھال دی کتاب لے کے پڑھی تے میرا ایہناں نال پہلا تعارف ہویا۔ جیہڑا ادب پڑھنا تے سکھنا چاہندااے ایس دی بدقسمتی اے کہ اج خالد حسین تھتھال ساڈے وچ نہیں۔ ایہناں دی شاعری وچ اینی وسعت اے کہ ایس وچ مشرق تے مغرب دے دونویں رنگ تے فلسفہ وکھائی دیندا اے۔

پنجاب ہائوس وچ ایہناں دی کتاب دی تقریب رونمائی اعزاز دی گل اے تے اک انج دی کتاب آئی اے جیہڑی نویں تاریخ رقم کرے گی۔ خالد حسین تھتھال دے بھرا نعیم طارق تھتھال نے کہیا کہ میں پنجابی یونین تے مدثر بٹ دا شکر گزار آں کہ اوہناں نے اینی پروقار تقریب دا انعقاد کیتا ۔ خالد حسین تھتھال دی بے شمار یاداں نیں ایہناں نوں ما ں بولی نال بوہت پیار سی جیہڑا سکون اپنی دھرتی اُتے ہوندا اے اوہ دنیا دے کسے کونے وچ نہیں ملدا ایہناں دی خواہش سی کہ ایہناں دے دیس دے سارے لوک آرام تے سکون دے نال جین۔ ایہناں دی پہلی کتاب 1985 وچ شائع ہوئی سی خالد حسین تھتھال اکھاں توں اوجھل ہوئے نیں پر ساڈے دل و دماغ توں اوجھل نہیں ہوئے۔ پنجابی لئی ایہناں دی خدمات ایہناں نوں ہمیشہ زندہ رکھن گئیاں۔ رائے محمد خاں ناصر نے کہیا کہ خالد حسین تھتھال نال میری بڑی مختصر جہی ملاقات ہوئی سی ایہناں دا کم بولدا اے جس دا کم بولے اوہ مردا نہیں۔ رفیق چوہدری نے کہیا کہ خالد دی کہانیاں تے نظماں وچ احمد چک جہے میم چک وی کہندے نیں دیاں گلاں ملدیاں نیں اوہ ساڈے ساریاں توں ودھ صحت مند تے تگڑا سی پر جلدی چلا گیا۔ غزالہ نظام دین نے کہیا کہ ایس توں وڈی ہور کیہ گل ہو سکدی اے کہ ایہناں دی غیر موجودگی وچ ایہناں دی کتاب دی تقریب منعقد ہوئی اے تے سب ایہناں دی تعریفاں کر رہے نیں۔
ڈاکٹر اظہر محمود چوہدری نے کہیا کہ خالد حسین تھتھال وچ اینی خوبیاں سن کہ سمجھ نہیں آ رہی کہ ایہناں دی کس کس خوبی دا ذکر کراں اوہ اپنی کتاباں نوں باغیچہ تے شعراں تے نظماں نوں پھُل پتیاں کہندے سن۔ اوہ ایس مزاج دے بندے سن کہ کسے نالوںدوستی دا رشتہ ٹُٹن نہیں دیندے سن۔ اوہ لفظاں نوں اپنے کلام وچ ایس طرح استعمال کردے کہ سخت لفظ وی پیارے لگن لگدے سن۔ سید آصف شاہکار نے کہیا کہ خالد حسین تھتھال دی زندگی دے دو پہلو نیں اوہ وطن نال محبت کرن والے بے وطن سن اوہ ایس ملک وچ آئے تے ایہناں دا استقبال محبت بھری بانہواں نے نہیں کیتا بلکہ ایہناں نوں گولیاں ملیاں تے ایہناں نوں واپس ناروے وچ ای پناہ لینی پئی میں 54 سال توں ناروے وچ آں پر فیر وی ناروے میرا وطن نہیں بن سکیا ایہو خالد دے نال ہویا کہ ایس نال اوہدے توں اوہدا دیس کھویا گیا۔ ایس وچ اینی خوبیاں سن کہ سب دا بیان ممکن نہیں۔ پنجابی تحریک دے چیف آرگنازرمعروف صحافی و دانشور الیاس گھمن نے کہیا کہ خالد حسین تھتھال نے ناروے وچ رہندے ہوئے وی پنجابی دا اک لفظ وی نہیں بھُلیا۔میرا داخلہ کراچی یونیورسٹی وچ اوس ویلے ہویا جدوں بھٹو نوں پھانسی دے بعد اوتھے حالات بوہت خراب سن ایس ویلے مینوں اوہناں نے کہیا کہ مزا تے ایسے وچ اے کہ بت خانے وچ اذان دتی جائے۔ اسیں پہلا پنجابی رسالہ وی کراچی توں کڈیا اوہناں نے 1980,81 وچ ناروے وچ پنجابی دے مشاعریاں تے پروگراماں دا آغاز کروایا۔ تقریب دے اختتام اُتے پنجابی ادبی بورڈ دی سیکرٹری پروین ملک نے کہیا کہ خالد حسین تھتھال انتہائی سادہ سن نہ اپنی شاعری دی تعریف کردے نہ باہر رہن دا رعب پاندے سن۔ ایہناں نوں پنجاب ایس دی زمین تے ہواواں نال جنون دی حد تیکر پیار سی۔
اوہناں نے کہیا کہ خالد حسین تھتھال ساڈے توں دور نیں اسیں ایہناں نوں روواں گے نہیں ایہناں دی یاداں نوں زندہ تے تازہ رکھاں گے۔ اسٹیج سیکرٹری زاہد حسن نے مختلف موقعے اُتے خالد حسین تھتھال دی ادبی خدمات ایہناں دی شاعری تے ایہناں دی ذات دے وکھو وکھ پَکھاں اُتے روشنی پاندے ہوئے کہیا کہ اوہ سانوں بیماریاں توں بچن لئی کہندے سن حالانکہ اوہ ساڈے سب توں زیادہ صحت مند سن پر اج اوہ ساڈے وچ نہیں تے ایہناں دی غیر موجودگی وچ ایہناں دی کتاب دی تقریب ہو رہی اے کجھ ورھیاں وچ بوہت چنگا لکھن والے ساڈے توں جدا ہو گئے نیں پنجابی عوام تے صوفیاں دی زبان اے ایہہ کدی نہیں مر سکدی۔ تقریب دے دوران ڈاکٹر اظہر محمود نے خالد حسین دیاں نظماں تے صوفیا دا کلام ترنم دے نال پڑھ کے سماں بنھ دتا تے شرکاء نے دل کھول کے ایہناں نوں داد دتی۔ تقریب دے اختتام اُتے مہماناں دی پُرتکلف کھانیاں نال تواضع کیتی گئی۔