آخری وزیراعظم!

مظہر برلاس

اپنے سارے حربیاں دے باوجود جگتوفرنٹ نکام ہو گیا۔ اوہدے سارے دعوے غلط ثابت ہوئے۔ جگتو فرنٹ دی فتح دی خش خبری سنان والا شور شرابا ستاراں نومبر نوں ڈب گیا۔ ہن ایہ کم گھٹو گھٹ چار چھ مہینے لئی ختم ہو گیااے۔ درجن بھر جماعتاں نوں اکلے عمران خان نے پچھاڑ کے رکھ دتا اے سارا رولا رپا نکام رہیا تے عمران خان دی حکمت عملی کامیاب رہی۔ پارلیمنٹ دے مشترکہ اجلاس وچ کئی بل منظور ہوئے پر اپوزیشن نوں سب توں ودھ تکلیف ای وی ایم تے اوورسیز پاکستانیاں دے ووٹ دی اے۔ ای وی ایم دے راہیں گھوسٹ ووٹاں دا خاتمہ ہو جاوے گا ایہو گھوسٹ ووٹ کئی لوکاں دی فتح نوں یقینی بناندے رہے نیں۔ کجھ مرے بندیاں دے ووٹ سن‘ ہن اوہ زندہ ہو کے کیویں ووٹ پان گے۔ اپوزیشن دیاں جماعتاں خاص طورتے ن لیگ دا واہوا نقصان ہو گیا اے۔ رہی سہی کسر تحریک لبیک پوری کر دیوے گی۔ اوورسیز پاکستانیاں دا لمے عرصے توں مطالبہ سی کہ اوہناں نوں ووٹ دا حق دتا جاوے۔ ساڈے کئی حکمراناں نے سمندر پار پاکستانیاں نوں ایس سلسلے وچ کئی واری چکر دتے پر عمران خان کتھے چکر مکر دے سکدا سی ایہ کم اوہو لوک کر سکدے نیں جو لمے عرصے توں کر رہے نیں۔ عمران خان نے اوورسیز پاکستانیاں دے نال کیتا ہویا وعدہ پورا کرکے نہ صرف اوہناں دے دل جت لئے نیں سگوں دھرتی نال پیار کرن والیاں دے دِلاں وچ وطن لئی محبت نوں ہور ودھا دتا اے۔ اوورسیز پاکستانیاں دے ووٹ دی سب توں وڈی مخالف مسلم لیگ ن سی۔ ایہدی وڈی وجہ ایہہ وے کہ ن لیگ دے رہنماواں نوں پتہ اے کہ اوورسیز پاکستانیاں وچ سب توں مقبول جماعت تحریک انصاف اے اوہناں نوں ایہ وی پتہ اے کہ اوورسیز پاکستانیاں دے 90فیصد ووٹ پی ٹی آئی دے نیں تے پنجاب دے ہر حلقے وچ پنجی تریہہ ہزار ووٹ اوورسیز پاکستانیاں دا اے سگوں کجھ حلقیاں وچ ووٹاں دی ایہ گنتی ستر اسی ہزار توں وی ودھ اے تے ایہ حلقے جی ٹی روڈ دے آل دوالے نیں۔ اوورسیز ووٹراں پاروں پی ٹی آئی جی ٹی روڈ دے سجے کھبے بڑی مضبوط ہو جاوے گی۔
ای وی ایم تے اوورسیز پاکستانیاں دے سلسلے وچ سجری قنون سازی دے بعد اوہ افواہ ساز ادارے وی چپ ہو جان گے جو مسلسل ایہہ کہہ رہے سن کہ اگلا وزیراعظم فلاں ہو سکدا اے سگوں اوہ بن رہیا اے۔ دوجے نال لندن وچ لوک جا جا کے مل رہے نیں کجھ ناسمجھ تے افواہواں دے بازار وچ ایتھوں تک کہہ گئے کہ اسٹیبلشمنٹ دے کجھ لوک لندن وچ کسے پاکستانی سیاستدان دے ترلے کر رہے نیں۔ بھلا انج کیویں ہو سکدا اے ایہ گل تے منی جا سکدی اے کہ اک جماعت دے رہنما پنڈی اسلام آباد دے چکر کٹ رہے نیں ترلے منتاں کر رہے نیں کہ کسے طرح سانوں گھاہ پا دیو۔ اطلاع ایہہ وے کہ ایس چکر کٹن والے سیاستدان نوں مسلسل نکامی دا منہ ویکھنا پے رہیا اے۔ عمران خان نے چومکھی جنگ لڑدے ہوئے اپنا راہ بنایا اے۔ پہلے ساڈیاں ساریاں جماعتاں رَل کے ایہ کوشش کردیاں رہیاں کہ عمران خان اقتدار تک نہ اپڑ سکے۔ جدوں اوہ اقتدار وچ آ گیا تے اوہناں نے اک مولانا دی اقتدار وچ ایہ کوشش شروع کر دتی کہ عمران خان دے کول زیادہ دیر اقتدار نہ رہوے‘ صبح و شام کردے کردے تن ورھے لنگھ گئے۔ ایس دوران کئی لوک ایہ سوچدے رہے کہ آخر ایہناں جماعتاں دے کہن تے لوک کیوں نہیں نکلدے‘ آخر وجہ کیہ اے؟ اپوزیشن دے جلسے وی جلسیاں بن کے رہ گئیاں نیں۔
میرا خیال اے کہ لوکاں نے ساریاں جماعتاں نوں آزما لیا اے آخری جماعت تحریک انصاف اے‘ ایہدی آزمائش جاری اے جے پرعزم عمران خان لوکاں نوں مشکلات وچوں کڈھن وچ کامیاب ہو گئے تے فیر اوہناں دے مقابلے وچ واقعی کوئی نہیں آ سکے گا تے جے مشکلات دا سلسلہ حالیہ مشکلات وانگوں رہیا تے فیر عمران خان لئی بڑیاں مشکلات پیدا ہو جان گئیاں۔ اپوزیشن نوں ایوان وچ ہران دا مطلب ایہ نہیں کہ تساں لوکاں دے دل جت لئے نیں۔ اوورسیز پاکستانیاں دے دل جتن دے نال نال ایتھے رہن والیاں دے دل جتنے وی ضروری نیں جے تسیں دلاں وچ بس جائو تے فیر تہاڈا مقابلہ کون کر سکدا اے؟ پچھلے پنجی تریہہ ورھیاں توں ویکھ رہیا واں کہ لوک ہولی ہولی موجودہ پارلیمانی نظام توں دور ہوندے جا رہے نیں کیوں جے ایس نظام نے لوکاں دے مسئلیاں وچ وادھا کیتا اے تے ایہ نظام سانوں تنزلی ول لے کے جا رہیا اے۔ ہن شاید ہور ایہ نظام نہیں چل سکدا۔ ایس لئی میرے خیال وچ عمران خان آخری وزیراعظم نیں جے ایہناں دے بعد کوئی وزیراعظم بنیا وی تے اوہ گھٹ مدت لئی ہووے گا۔ عمران خان آپ ای کسے ہور نظام دا رخ کر لین گے۔ پاکستان دا اگلا سیاسی نظام صدارتی ہووے گا چھوٹے دھڑیاں دی بلیک میلنگ تے لوکاں دیاں بددعاواں پارلیمانی نظام کھا گئیاں نیں بقول وصی شاہ:
زندگی!اب کے مرا نام نہ شامل کرنا
گر یہ طے ہے کہ یہی کھیل دوبارہ ہوگا