سپیشل لوک دیہاڑ

ایس اکٹھ وچ سپیشل منکھتا دی اک وڈی گنتی ویکھن وچ آئی تے محکمہ سوشل ویلفیئر تے بیت المال ولوں ساریاں دی مالی امداد کیتی گئی

رپورٹ: جاوید پنچھی

۳ دسمبر نوں پوری دنیا وچ ’’سپیشل لوک دیہاڑ‘‘ منایا جاندا اے۔ اوس دیہاڑے دنیا بھر وچ موجود سوشل ویلفیئر ادارے اپنے اپنے مُلکاں تے شہراں وچ اپنے اپنے طریقے نال ’’سپیشل مُنکھتا‘‘ نوں آدر مان دیندے نیںتاں جے اوہناں منُکھاں نوں معاشرے دے دوجے عام لوکاں وانگ اپنے اندر کسے قسم دی گھٹاٹ محسوس نہ ہووے۔

ساڈے مذہب اسلام نے خاص طور تے ’’سپیشل منُکھتا‘‘ دی سیوا کرن لئی پریریا اے۔ ایہو وجھا اے کہ اسلامی معاشرے وچ حیاتی بتیت کر رہے ’’سپیشل لوکاں‘‘ نوں بڑی عزت احترام نال ویکھیا جاندا اے۔
یاد رکھن والی گل ایہ وے کہ ۱۹۹۸ء وچ کروائی گئی مردم شماری دے اعداد و شمار مطابق پاکستان وچ سپیشل منکھتا دی گنتی کُل آبادی دا 2.38فی صد سی ۔ جدوں کہ ۲۰۱۷ء تک وفاقی تے صوبائی سرکاراں دیاں کوششاں پاروں ایہ گنتی کُل آبادی دا 0.48فی صد توں وی گھٹ رہ گئی سی۔پر سپیشل منکھتا دے تناسب وچ زبردست گھاٹ پاروں کجھ حلقیاں ولوں تشویش دا اظہار کیتا گیا جہناں وچ سپریم کورٹ آف پاکستان وچ شامل اے۔ عدالت نے ایس گل تے غصے دا وکھالا کیتا کہ ’’پاکستان بیورو آف سٹیٹسٹکس ‘‘ نے لوکائی گنتی شروع ہون توں بعد سپیشل منُکھتا دی گنتی نہ کروان وچ وکھ وکھ اوکڑاں دا حوالا دتا اے۔
اک اہلکار نے دسیا کہ : ’’ایس گل دا امکان موجود سی کہ ٹرانس جینڈر تے سپیشل لوکائی دی گنتی نوں ٹھیک طرحاں نہیں سی وکھایا گیا‘‘

کجھ اسٹیک ہولڈرز ورلڈ ہیلتھ آرگنائزیشن دے ذریعے شناخت کردہ 15فیصد گنتی دی پیروی کردے نیں۔ ڈبلیو ایچ او دے مطابق ’’دنیا دی تقریباً 15%آبادی کسے نہ کسے شکل وچ سپیشل حیاتی گزار رہی اے۔
ایس گنتی نوں مُکھ رکھدیاں ’’برٹش کونسل ‘‘ نے اپنی 2017دی رپورٹ وچ سپیشل لوکائی دی گنتی انداز تقریباً27ملین لایا اے۔ہورایہ کہ 2011وچ ’’پاکستان پاور ٹی ایلیویشن فنڈ‘‘ نے پاکستان دے ست ضلعیاں دیاں 23یونین کونسلاں دا اِک سروے کیتا جہدے وچ عام لوکائی دی گنتی 78939افراد سی تے سپیشل منکھتا دی گنتی تقریباً 12%سی ۔ جہناں وچ 2% بہت چوکھے معذور سن۔ یاد رہوے کہ ایہ پاکستان پیپلز پارٹی دا دور سی۔
ایسے سلسلے وچ کجھ دن پہلاں ۲ دسمبر نوں ضلع شیخوپورا وچ محکمہ سوشل ویلفیئر تے بیت المال ولوں اک اکٹھ کروایا گیا جہدے وچ اجہے لوکاں نوں مالی امداد دے چیک دتے گئے جہڑے معاشرے دے سپیشل لوک سن۔
ایس اکٹھ وچ سپیشل منکھتا دی اک وڈی گنتی ویکھن وچ آئی تے محکمہ سوشل ویلفیئر تے بیت المال ولوں ساریاں دی مالی امداد کیتی گئی۔
ڈپٹی ڈائریکٹر سوشل ویلفیئر تے بیت المال میڈم آمنہ عالم ڈھلوں صاحبا نے سپیشل لوکاں نوں چیک ونڈن ویلے میڈیا نال گل بات وی کیتی ۔ اوہناں آکھیا : ’’پنجاب سرکار دا محکمہ سوشل ویلفیئر لوکائی نوں ہر پدھر تے ریلیف دین لئی جتن کر رہیا اے۔غریب تے مستحق گھرانیاں دی کفالت واسطے وکھ وکھ سکیماں تے کم کر رہے آں۔ سوشل ویلفیئر تے بیت المال دے کماں نوں انج فعال کیتا اے کہ کسے قسم دی کوئی بد عنوانی یا بے ضابطگی دی محکمانا امور وچ کوئی گنجائش نہیں چھڈی۔ حق دار لوک سرکاری امداد پروگرامز توں پورا فائدا چُک رہے نیں۔
اوہناں آکھیا کہ: ’’حیرت دی گل اے پئی اج توں پہلاں شیخوپورا دی لوکائی نوں ایہ وی پتا نہیں سی کہ شیخوپورا وچ سوشل ویلفیئر تے بیت المال ناں دا کوئی ادارا وی کم کر رہیا اے۔میں ذاتی طور تے محسوس کیتا کہ شیخوپورا دی سپیشل لوکائی نوں ریلیف ملنا چاہیدا اے تاں جے ایہ جہڑے لوک نہ چاہندیاں ہویاں وی سڑکاں تے، پارکاں وچ، بس اڈیاں تے فقیراں وانگ منگدے پھردے نیں تے عام لوکائی دی نظر وچ اوہناں دی قدر ای کوئی نہیں اوہناں نوں حیاتی گزارن لئی اجہیاں سہولتاں دتیا ں جاون کہ اوہناں دی عزت نفس بحال ہو سکے۔
ڈپٹی ڈاریکٹر سوشل ویلفیئر اینڈ بیت المال مس آمنہ عالم ڈھلوں صاحبا نے آکھیا: ’’شہریاں دی سہولت واسطے حق دار لوکائی نال براہ راست آپ مل کے اوہناں دیاں اوکڑاں جانن دی کوشش کر رہی آںتاں جے اوہناں دی امداد تے بحالی واسطے ہر ممکن کردار ادا کیتا جا سکے‘‘۔
اوہناں آکھیا کہ : ’’ڈپٹی کمشنر شیخوپورا رانا شکیل اسلم سنے سارے ضلعی افسران ولوں محکمہ سوشل ویلفیئر تے بیت المال نوں بھر پور مل ورتن حاصل اے تے ہر وقت ایہ افسران حق داراں دی امداد کرن دے حوالے نال محکمہ سوشل ویلیئر تے بیت المال نال موڈھا لائی رکھدے نیں۔ ایہو وجھا اے کہ محکمہ ولوں حق دار لوکائی نوں ریلیف دین دی راہ وچ کوئی روڑا نہیں اٹکا سکدا‘‘
اوس ویلے سوشل ویلفیئر آفیسر چودھری زاہد رفیق گجر، آفس سپرنٹنڈنٹ محمد نعیم سندھو، مبشر احمد ورک تے ہور لوک وی موجود سن ۔