غزل
شکیل امجد صادق
ایدھر دکھ تے اودھر ہاسے ویکھے نیں
میں تصویر دے دونویں پاسے ویکھے نیں
سینے دے وچ دل نئیں ٹوٹا پتھر دا اے
اتوں نیناں،خالی کاسے ویکھے نیں
منزل ایس حیاتی دی وی تیڈھی سی
راہیں مردے پکھی واسے ویکھے نیں
شاہ دے دل کھچاں پیئاں ہوئیاں نیں
بھکھیاں لیرو لیر دلاسے ویکھے نیں
ویلا اوڑک اپنی دس تے دسدا ای اے
شاہاں دے وی ہتھیں کاسے ویکھے نیں
بجھی چنگاری بل بل اٹھدی امجد جی
میں فر ڈونگھے نین پیاسے ویکھے نیں
