مضبوط قانون سازی دی ضرورت

حالیہ سانحہ سیالکوٹ اُتے گوکہ غیر مسلم دا قتل سی ، مذہب نوں اک پاسے رکھ کے اک انسان دے بے رحمانہ سرعام قتل اُتے ہر اکھ پرنم سی

امیر محمد خان

سیالکوٹ وچ اک بے قابو ہجوم نے وحشت و درندگی دا بدترین مظاہرہ کردے ہوئے مقدس نعریاں دی گونج وچ جوش وچ آئے جنونیاں نے اک غیر ملکی فیکٹری منیجر نوں تشدد کر کے جس طرح قتل کیتا اوہ کسے اک انسان دا خون نہیں بلکہ انسانیت دا خون سی تے ایس دا قاتل اک ہجوم نہیں پوری قوم سی، چونکہ ایس ویلے پوری قوم اک ہجوم دی صورت وچ ڈھل گئی اے جس دی بظاہر کوئی منزل نہیں تے نہ ای کوئی راہ متعین ۔ہجوم وچ دہشتگردی کرن والیاں نوں جدوں سارے جرم کرن دے بعد وی باعزت رہیا کرن لئی قانونی طریقہ لبھ کے عدالت دے سر پا کے چھڈ دتاجاندا اے۔ سب پلان دے مطابق ہوندا اے اک نویں ریت وی اسیں انصاف دے حوالے نال اپنا لئی اے۔ فیصلیاں دے کئی ورھیاں بعد ریٹائر ہو کے میڈیا نوں کہہ دیو میں فلاں کم کر سکدا سی پر میرے اُتے دبائو سی، یا فیر بیان حلفی دا ڈرآمہ رچا کے اعلیٰ عدالتاں دے سارے فیصلیاں نوں مشکوک کرو، یا ایماندار ججزنوں مشکوک کر دیو۔ الیکٹرانک میڈیا جس نے کدی خیر دا مشورہ یا تجزیہ نہ دتا اوہ صرف پرائم ٹائم وچ ادھے گھنٹے شوروغل وچ اک دُجے اُتے الزام تراشی کر کے اپنے اشتہارات بناندا سی تے بس ۔ واقعہ ساہیوال ، بالاں دے نال زیادتی دے مقدمات، خواتین دی بے حرمتی دی سچی کہانیاں، سانحہ سیالکوٹ ایہہ سب ساڈے منہ اُتے بدنما داغ تے حکومتی رٹ دے نہ ہون دی نشاندہی کردے نیں۔
حالیہ سانحہ سیالکوٹ اُتے گوکہ غیر مسلم دا قتل سی ، مذہب نوں اک پاسے رکھ کے اک انسان دے بے رحمانہ سرعام قتل اُتے ہر اکھ پرنم سی، پر کیہ ساڈے معاشرے داآخری سانحہ سی، سانحہ سیالکوٹ اُتے سب توں خوبصورت بیان وزیر اطلاعات فواد چوہدری دا سی ایہناں سیاسی بیانات اُتے بحث ہو سکدی اے پر سانحہ سیالکوٹ اُتے ایہناں دا مختصر بیان حقیقت گھٹ نہیں اوہناں نے خوب کہیا کہ ایس اندوہناک حادثے دے بعد کجھ دن بعد کوئی ہور واقع ہوئے گا تے اسیں پچھلے واقعے نوں بھُل جاواں گے۔ سیالکوٹ سانحہ توں زیادہ ایہہ سانحہ اے جیہڑا ساڈی بے ترتیب پالیسیاں دا آئینہ اے۔ اسیں نوجواناں نوں ایہہ نہیں دسدے کہ حضور اکرم محمد ﷺ جدوں طائف وچ کفار دے ہتھوں لہولہان ہوئے اوس ویلے حضرت جبریل علیہ السلام نے پیغام دتا کہ محمد ﷺ جے کہو تے اسیں ایہناں ظالماں نوں پہاڑاں وچ پیس کے ختم کر دینے آں پر میرے رسول ﷺ نے کہیا کہ نہیں، ایہ ہے ساڈی تعلیم جد کہ مذہبی تشدت پسند کہندے نیں جے کوئی کافر اے تے ایس دا سرتن توں جدا کر دیو۔ ایہہ احکامات جنگ و جدل وچ تے ہو سکدے نیں انفرادی واقعیاں وچ تے سانوں تے اپنے حسن سلوک نوں بہتر کر کے اپنے حسن سلوک نال ایہناں نوں اپنے قریب لیانا اے، زندہ انسان نوں سپرد اگ کرن دے شرمناک مناظر ویڈیو کلپس دی صورت وچ پوری دنیا وچ گردش کر رہے نیں تے سانوں اک انج دی قوم دی حیثیت نال متعارف کروا رہے نیں جس وچ مذہبی جنونیاں اُتے کوئی روک ٹوک نہیں تے اوہ قانون دے خوف توں بالا تر ہو کے کسے عدالتی کارروائی تے تحقیقات دے تکلف وچ پئے بغیر جنہوں چاہن توہین مذہب دا محض الزام لا کے موت دے گھاٹ اتار سکدے نیں جمع ہو جان والے تماشائی ایس بہیمانہ کارروائی نوں روکن دے بجائے ایس دی ویڈیو بنان وچ مشغول رہے۔ پولیس اہلکار پہلے تے موقعے اُتے اپڑے ای دیر نال فیر مشتعل ہجوم ویکھ کے مزید پولیس اہلکار بلوائے پر اودوں تیکر بوہت دیر ہو چکی سی جے ویلے اُتے آ وی جاندے تے پولیس اپنا انجام ماضی قریب وچ ویکھ چکی اے سچ کہیا کہ ہجوم بے قابو سی تے لوک مشتعل سن۔ جے پولیس وچکار آ کے منتشر وی کردی تے کجھ پولیس والے وی ایس دہشت گردی دا شکار ہو جاندے تے ایہناں دے اہل خانہ کتھے جاندے یا ایہناں دا کون پرسان حال ہوندا ریسکیو 1122والے وی کجھ نہ کر سکے تے کہیا کہ اسیں وردی وچ سی ممکن ای نہیں سی کہ مشتعل لوکاں وچ وڑ کے مار کھان والے بندے نوں بچان لئی کوئی مداخلت کردے، جدوں پولیس نے ہجوم نوں نہیں روکیا تے اسیں کتھے ریسکیو کردے؟ ہن حکومت حرکت وچ اے تے گرفتاریاں ہو رہیاں نیں دنیا نوں وکھان تے انج کسے واقعے نوں دوبارہ رونما ہون توں روکن لئی ایہہ اقدامات ضروری نیں پر گرفتاری نہیں مقدمہ بازی نہیں، جرم ہویا اے، فوری سزا تے بن دی اے تاں ملک وچ توہین مذہب دے ناں اُتے ہجوم دے ہتھوں تشدد دا ایہہ کوئی پہلا واقعہ نہیں، انج دے واقعے بارہا ساہمنے آ چکے نیں تے دنیا وچ پاکستان ای نہیں امن و آشتی دے علم بردار دین اسلام دے وی غلط تعارف دا سبب بن رہے نیں تاں ضروری اے کہ انج دے واقعات دی مستقل روک تھام لئی اک پاسے قانون دی عمل داری ہر سطح اُتے یقینی بنائی جائے تے دوجے پاسے ساری دینی جماعتاں تے سارے مکاتب فکر دے علمائے کرام مسجداں دے منبراں تے ذرائع ابلاغ نال ایس حقیقت توں عوام نوں آگاہ کرن کہ محض دنیاوی قانون ای نہیں بلکہ اسلامی تعلیمات دی رو نال وی مجرم نوں سزا دینا عدالتاں دا کم اے تے ایس ضابطے دی خلاف ورزی کرن والے دنیا دی عدالت ای وچ نہیں روز حشر اللہ دی عدالت وچ وی فساد فی الارض دے مجرم دی حیثیت نال سخت سزا دے مستحق قرار پان گے۔
پاکستان دے 23 کروڑ عوام سری لنکا دے مقروض ہو گئے نیں چونکہ ساڈے کول ایس قتل دا کوئی جواز نہیں لوڑ ایس گل دی اے کہ ساڈی حکومت تے ملک دے سیاست دان جیہڑے سب ای ایس دہشت گردی دے مخالف نیں کیوں نہ ساڈے ملک نوں ایہناں ناپاک اقدامات توں پاک کرن لئی مضبوط قانون سازی کرن جس اُتے عمل وی ہوئے اسیں ایہناں ای دہشت گرداں دی وجہ نال دنیا وچ جتھے جانے آں مشکوک سمجھے جانے آں ساڈے دشمن ایہناں شرمناک واقعیاں نوں اچھال کے ساڈی مملکت نوں بدنام کر رہے نیں۔