غزل
شکیل امجد صادق
چار چفیرے نھیرا دیوا کوئی نئیں
لگدا اے دھرتی تے بندہ کوئی نئیں
تیرے کہن تے اوہنوں میں سمجھاواں گا
گل سن چیتے رکھیں,فیدہ کوئی نئیں
اک تے جندڑی گمھن گھیرے رلدی اے
دوجا اوہدے گھر نوں رستہ کوئی نئیں
ایتھے پباں بھار ای ٹرنا پینا ایں
وانگ حیاتی لماں پینڈا کوئی نئیں
سفنے دی تعبیر وی کوئی دسے گا
پھُلاں دے نل ویکھیا کنڈا کوئی نئیں
مینوں سارے عاشق مرزے لگدے نیں
ہیراں رُلیاں مجنوں لیلی کوئی نئیں
امجد ڈٹھا اکو رشتہ خالص اے
ماواں ورگا ایتھے دوجا کوئی نئیں
