محمد اقبال باہُو ۔۔۔ اک درویش فنکار
ایہناں دے ناں دے نال جڑیا لفظ باہو جناب احمد ندیم قاسمی نے تجویز کیتا پر فیر وی
ایہناں حضرت سلطان باہوؒ دے خانوادے دے اک فرد کولوں ایس دی اجازت لئی
ایم آر شاہد
محمد اقبال باہو عارفانہ کلام دی گائیکی وچ اک اُچا مقام رکھدے سن۔ ایہہ درویش انسان 5فروری 1942ء وچ دینہ نگر ضلع گورداسپور وچ جمیا ایہناں دے پیو دا ناں جان محمد سی۔ اقبال باہو ہوراں بی اے تک تعلیم حاصل کیتی۔ فیر پیٹ پالن لئی نوکری دا بندوبست کرن لگ پئے اوس ویلے تیک ایہہ اپنا اک ناں بنا چکے سن۔ اوہناں دناں وچ ایہناں دی اک غزل بڑی مشہور ہوئی جس دا مطلع سی:
آئی رُت ساون کی بادل چھا گئے
پھر میری رسوائی کے دن آ گئے
7 ستمبر 1972 وچ ایہناں نوں فن دی بنیاد اُتے نیشنل بینک وچ نوکری لبھ گئی۔ ایہہ وی اک وکھرا واقعہ اے۔ اقبال باہو جنہاں وڈے وڈے موسیقاراں نال ریڈیو تے ٹی وی تے کم کیتا اوہناں وچوں میاں شہر یار، کریم شہاب الدین، نیاز احمد، ماسٹر عبداللہ، وزیرافضل، بخشی وزیر، طالب حسین، صفدر نیاز، ماسٹر منظور تے خلیل احمد شامل نیں۔
ایہناں دے ناں دے نال جڑیا لفظ باہو جناب احمد ندیم قاسمی نے تجویز کیتا۔ پر فیر وی ایہناں حضرت سلطان باہوؒ دے خانوادے دے اک فرد کولوں ایس دی اجازت لئی۔ایسراں ایہہ محمد اقبال توں محمد اقبال باہو بن گئے۔ ایہناں دیاں فنی خدمات دے اعتراف وچ حکومت پاکستان نے 2007 وچ ایہناں نوں تمغہ امتیاز عطا کیتا اوہ آکھدے سن حضرت سلطان باہوؒ دے کلام نے مینوں زمین توں اسمان تے اپڑا دتا۔ میریاں ایہناں نال تن چار ملاقاتاں رہیاں اک کسے شاعر تے صحافی دے پتر دے ولیمہ اُتے ملاقات ہوئی دُجی ملاقات سوڈیوال محترم سید اختر حسین اختر ہوراں مین تے لہراں دا نواں دفتر کھولیا اوس دعوت وچ ملے فیر اک واری میں اپنے دفتروں نکلیا تے ایہہ چوک پرانی انار کلی کراس کر رہے سن علیک سلیک ہوئی۔
محمد اقبال باہو ہوراں عارفانہ کلام توں علاوہ غزلاں، گیت تے ہیر وی گائی، ہیر گاون وچ وی ایہناں نوں کمال حاصل سی، رب سچا اوہناں دیاں اگلیاں منزلاں آسان کرے۔ آمین
نام فقیر تنہاں دا باہُو
قبر جنہاں دی جیوے ہوُ
