ویلڈن بزدار صاحب !

حسن جلیل

پاکستان وچ اُنج تے بے شمار مسائل نیں تے ایس اُتے پنجابی دی ایہہ گل سو فیصد صادق ہوندی اے کہ ’’اِٹّ پٹُو تے مسئلہ ‘‘ پر ایہناں وچ شدید نوعیت دا وڈا مسئلہ صحت تے ایس نال جڑے ہور عوامل نیں۔ ویکھیا جائے تے اسیں اک غریب ملک نال تعلق رکھنے آں تے ساڈے ملک وچ جتھے سانوں پین دا صاف پانی میسر نہیں کھان وچ ملاوٹ شدہ شیواں ملدیاں نیں تے آلودہ آب و ہوا وی اک عنصر اے۔ پاکستان وچ اکثریت لوکاں نوں معدہ، ڈِھڈ، جگر،دماغی امراض، ہڈی جوڑ ، بالاں دی بیماریاں، نیز ہر طرح دے مسائل دا ساہمنا کرنا پیندا اے۔

ایہناں وچوں اکثر بیماریاں تے امراض دا اعلاج پہلے ای سرکاری ہسپتالاں وچ مفت وچ یا بوہت گھٹ خرچ وچ ہو جاندا اے پر ایہہ سہولتاں آبادی دے ودھدے ہوئے تناسب دے اعتبار نال بوہت گھٹ نیں۔ بہتر صحت دی فراہمی لئی بوہت سارے نجی ہسپتال وی کم کر رہے نیں پر اوہ شاید پاکستان دے صرف پنج یا 10 فیصد لوکاں لئی نیں جیہڑے ایہناں دے مہنگے مہنگے بل بھر سکدے نیں۔ نکے شہراں دے وڈے وڈے ڈاکٹر چنگی بھلی فیس صرف ایہہ کہن لئی لیندے نیں کہ ’’ایہنوں لہور لے جائو‘‘۔ عام بندہ نہ تے ایہنے وڈے وڈے ڈاکٹراں دی فیس ادا کر سکدا اے تے انج اکثر ماں پیو اپنی اولاداں نوں بچان لئی اپنا گھر بار ویچ کے سڑک اُتے آ جاندے نیں۔ انج درد دل رکھن والے ڈاکٹراں دی وی بوہت کمی اے، جویں کہ جنرل ہسپتال دے شعبہ نیورو سرجری دے پروفیسر ڈاکٹر انور چوہدری جیہڑے کہ ہمیشہ ’’آئوٹ آف دا وے‘‘ جاکے غریب مریضاں نوں علاج معالجے دی سہولتاں فراہم کرن دی لگن وچ رہندے نیں ایس سلسلے وچ اکثر مریضاں نوں ایہناں دے کلینک وچ گھل دینا واں، جتھے اوہ فیس یا کسے ہور خرچے دے بغیر ای ایہناں دے مسائل دا حل کرن وچ جُت جاندے نیں۔ ہن چونکہ پاکستان اک بوہت وڈا ملک اے تے جس تیزی نال ساڈی آبادی ودھ رہی اے تے صحت دی سہولتاں ایس تناسب نال شاید نہیں ودھ رہیاں تے درد دل رکھن والے ڈاکٹراں دا ہن ملک وچ شدید فقدان اے۔ جتھے عوام دا خزانہ چوری کر کے بیرون ملک عیاشیاں دے اسباب اکٹھے کیتے جاندے ہون، جتھے حکمران اپنے علاج لئی باہر دے ڈاکٹراں تے ہسپتالاں نوں ترجیح دین تے انج ملک وچ صحت دی سہولتاں دا ایہو حال ہوئے گا جیہڑا ساڈے کول اے۔ عوام دے درد نوں اوہ ای سمجھے گا جیہڑا ایس توں لنگھے گا تے ساڈا اج دا وزیراعظم عمران خان جس نے اپنی ماں نوں موت دے منہ وچ جاندے ہوئے ویکھیا کیوں جے علاج دی سہولتاں نہ ہون دے باعث اوہ ایہناں نوں چھڈ گئیاں۔ ماں دے چھڈ جان دا دُکھ کیہ ہوندا اے اوہ سب جان دے نیں پر سب کجھ ہوندے ہوئے وی تسیں کجھ نہ کر سکے کیوں جے تہاڈے کول پیسے نہیں، تسیں کسے وڈے ڈاکٹر نوں چیک نہیں کرا سکدے، کنہی ای حاملہ خواتین اپنے بالاں نوں پیدائش توں پہلے ای کھو دیندیاں نیں تے کنہے ای بچے مختلف بیماریاں یا معذوریاں دے نال پیدا ہوندے نیں کہ جنہاں نوں اک ڈاکٹر دی تھوڑی توجہ بچا سکدی سی تے ایہناں نوں صحت بخش سکدی سی، ایہہ کنہی وڈی اذیت اے تے روز لکھاں کروڑاں پاکستانی ایس اذیت توں لنگھدے نیں، عمران خان نوں جدوں خیبر پختونخواہ وچ حکومت ملی تے اوہناں نے صحت دی سہولتاں دی فراہمی لئی خصوصی کوششاں شروع کیتیاں تے اوتھے دے عوام لئی صحت انصاف کارڈ متعارف کرایا جس دے ذریعے اوتھے دے اہل غریب تے نادار لوک سرکاری و نجی ہسپتالاں توں لکھاں روپئے دے علاج دی سہولتاں مفت وچ حاصل کرن لگے۔ ایہناں لوکاں دی دعاواں دا اثر سی کہ اللہ دا کرم ہویا تے عمران خان تے ایہناں دی پارٹی نوں پنجاب تے وفاق وچ اکثریت حاصل ہوئی، پنجاب دا وزیر اعلیٰ وی اک انج دی تھاں توں آیا جتھے سہولتاں کیہ ہوندیاں نیں لوک شاید ایس لفظ توں وی انجان سن، ایسے لئی عثمان بزدار نے انصاف صحت کارڈ نوں پنجاب وچ وی لیان دا فیصلہ کیتا تے احساس پروگرام دے سائے تھلے پنجاب دے غریب لوکاں نوں وی ایہہ سہولت ملن لگی۔ پر فیر کرونا تے دیگر عوامل نے جویں عوام دا بُرا حال کر دتا ہوئے، انج حکومت نے نامسائد حالات، بیرونی قرضیاں دی ادائیگیاں، آئی ایم ایف دے گھنائونے چنگل وچ پھسے ہون دے باوجود سارے لوکاں نوں بلاتفریق صحت دی سہولتاں دی فراہمی دا فیصلہ تے الگ توں صحت کارڈ اُتے انحصار کرن دی بجائے سدھا سدھا قومی شناختی کارڈ نوں ای ایس ہیلتھ انشورنس پروگرام نال لنک کر دتا جس دے بعد ہن صوبائی تے وفاقی حکومت ولوں پنجاب ، خیبر پختونخواہ بلکہ گلگت بلتستان تے کشمیر دے سارے شہریاں نوں وی صحت دی ایہہ سہولتاں فراہم کرن دا اعلان کر دتا اے۔ جس نال سالانہ ہر خاندان نوں 10 لکھ روپئے علاج معالجے لئی میسر ہون گے ، اوہ سرکاری ہسپتالاں دے علاوہ بوہت سارے نجی ہسپتالاں توں وی اپنے علاج معالجے لئی رجوع کر سکن گے جس دے ذریعے بلاشبہ سرکاری ہسپتالاں دا بوجھ وی گھٹ ہوئے گا۔