روشنی دی کرن

23 مارچ نوں مہنگائی مارچ دا اعلان کرن دے باوجود ایہہ تاثر ختم نہیں ہو سکیا کہ اپوزیشن تبدیلی لیان لئی سنجیدہ نہیں

حمید اللہ بھٹی

ارباب اختیار جس ڈگر اُتے چل رہے نیں کسے ہوش مند توں انج دی بے نیازی تے غیر سنجیدگی دی توقع نہیں ہو سکدی۔فواد چوہدری تے اعظم سواتی نوں آئین دے آرٹیکل 204 دے تحت توہین عدالت دی کارروائی لئی طلب کیتا گیا تے تاحیات نااہلی توں بچن لئی دونویں وفاقی وزرا نے غیر مشروط معافی نامہ جمع کرا دتا جس اُتے حتمی فیصلہ رواں مہینے 22 دسمبر نوں متوقع اے سابق حکومت دے طاقتور وزرا انہال ہاشمی، دانیال عزیز تے طلال چوہدری محدود مدت لئی نااہلی دے عمل توں لنگھ چکے نیں فیر وی ارباب اختیار دی بے نیازی تے غیر سنجیدگی برقرار اے ایس دا اک ای مطلب اے کہ ایہناںنوں حالات دی نزاکت دا احساس نہیں جدوں آئین وچ الیکشن کمیشن نوں تحفظ حاصل اے تے انتخابی ادارے دے فنڈز روکن دی دھمکیاں دا جواز نہیں رہندا سپریم کورٹ دے کئی غیر مبہم فیصلے موجود نیں کہ الیکشن کمیشن دی اتھارٹی نوں چیلنج نہیں کیتا جا سکدا۔
ایسے نوعیت دا اک کیس فیصل واوڈا نے اسلام آباد ہائیکورٹ وچ دائر کیتا تے الیکشن کمیشن جاری کارروائی رکوان دی اپیل کیتی پر ڈویژن بنچ نے نہ صرف مسترد کیس روکن دا حکم جاری کرن توں انکار کر دتا بلکہ الیکشن کمیشن نوں 60 دن دے اندر فیصلہ سنان دی ہدایت کیتی اے۔ ایس توں علاوہ انتخابی ضابطہ اخلاق دی خلاف ورزیاں اُتے الیکشن کمیشن ولوں بھاری جرمانے وی ہون لگے نیں ایسے ہفتے ای وفاقی وزیر علی امین گنڈاپور نوں 50 ہزار جرمانہ ہویا اے پر حکمران کجھ ویکھن یا سنن دی بجائے انتخابات وچ مشیناں دے استعمال اُتے بضد نیں حالانکہ بلدیاتی الیکشن وچ مشیناں لئی الیکشن کمیشن نے وزارت سائنس نوں خط وی لکھ دتا اے جس نال ایہہ سمجھن وچ کوئی امر مانع نہیں کہ الیکشن کمیشن آزادانہ تے غیر جانبدارانہ فیصلے کردے ہوئے کسے قسم دے دبائو دا شکار نہیں ایس لئی مستقبل وچ کسے جماعت لئی انتخابی نتائج توں فرار ممکن نہیں رہے گا۔ ایہہ روشنی دی انج دی کرن اے جس نال عوام دا انتخابی فیصلیاں اُتے اعتماد بحال کرن وچ مدد مل سکدی اے پر وفاق ولوں مشیناں دے استعمال تے تارکین وطن دی ہمدردیاں حاصل کرن دی دوڑ نال ایہہ تاثر ملدا اے کہ مہنگائی تے بے روزگاری توں تنگ شہریاں دی نفرت دا ساہمنا کرن دی بجائے حکمراناں نے جِت لئی بیرونِ ملک مقیم پاکستانیاں توں توقعات وابستہ کر لیاں نیں۔
23 مارچ نوں مہنگائی مارچ دا اعلان کرن دے باوجود ایہہ تاثر ختم نہیں ہو سکیا کہ اپوزیشن تبدیلی لیان لئی سنجیدہ نہیں ممکن اے وجہ خراب معیشت ہوئے بظاہر اپوزیشن دی توجہ تبدیلی دی بجائے حکمران جماعت دی نااہلی اجاگر کرن اُتے اے ایسے لئی مولانا فضل الرحمن باوجود کوشش دے استعفیاں اُتے پی ڈی ایم وچ شامل جماعتاں نوں قائل نہیں کر سکے ن لیگ سڑکاں دی سیاست اُتے یقین رکھدی اے جد کہ پی ڈی ایم نال حال ای وچ باہر ہون والی ملک دی تیجی وڈی جماعت پی پی عدم اعتماد نوں خرابی دا واحد حل قرار دیندی اے پرس ایس دا ایہہ وی مطلب نہیں کہ اپوزیشن دی نااتفاقی نال حکومت خطرات توں محفوظ ہو چکی اے پچھلے 40 مہینے دے دوران بحراناں دا شکار رہن والا حکمران اتحاد ہن وی بھنور وچ تے بے یقینی دی فضا بدستور موجود اے۔
معیشت دی بحالی دے بار بار وعدیاں دے باوجود حالات تشویشناک حد نوں اپڑ چکے نیں پر حکومت دے معاشی ارسطو جلدی بہتری دی ہن وی نوید سنا رہے نیں ایہہ بصیرت دی کمزوری اے یا بصارت دی خرابی اے کہ حکمراناں نوں سب اچھا نظر آندا اے حالات ایس نہج اُتے آ گئے نیں کہ سعودیہ ولوں اسٹیٹ بینک وچ تن ارب ڈالر جمع کران دے باوجود ہن وی روپے اُتے دبائو برقرار ہے حالانکہ 2013 وچ سعودیہ توں موجودہ رقم دی ادھی یعنی اک ارب 50 کروڑ ڈالر ملن نال ڈالر دی قیمت وچ 10 روپئے دی کمی ہو گئی سی پر ہن دگنی رقم ملن دے باوجود روپئے اُتے دبائو رہن دی وجہ معاشی بے یقینی اے۔ 2019 وچ سعودیہ نے تن ارب ڈالر دتے اودوں وی ڈالر دی قیمت وچ چار روپئے ای سہی کجھ کمی ویکھن وچ آئی پر ہن تے کوئی مشق وی روپئے نوں دبائو توں کڈن وچ مددگار ثابت نہیں ہو رہی کیوں جے حکومت اخراجات وچ کمی کرن تے وسائل ودھان وچ ہنوز ناکام تے قرضے لے کے امور مملکت چلان وچ مصروف اے پر ایس پالیسی دا نتیجہ ایہہ وے کہ 40 مہینے دی حکمرانی وچ بیرونی قرضے 127 ارب ڈالر توں ودھ تے روپئے دی قدر 50 فیصد ڈگ چکی اے ایس لئی جدوں حکومت دے معاشی ارسطو بہتری دی نوید سناندے نیں تے کوئی وی یقین نہیں کردا حکمران جماعت نوں ہن تصوراتی کیفیت توں نکل آنا چاہیدا اے کیوں جے انتخابات دی ہلچل شروع ہون لگی اے جے معیشت دا پہیہ رواں دواں نہیں ہوندا تے صورتحال دعویاں دے برعکس رہندی اے تے تحریک انصاف دا دوبارہ عوامی عدالت توں جتنا محال اے سچی گل ایہہ وے کہ 40 مہینے دی حکومت وچ عوام نے روشنی دی کرن ویکھن دی بجائے صرف بحراناں دا ای سامنا کیتا اے۔
انج لگدا اے کہ خرابی دا حکمراناں نوں ادراک ای نہیں جے ہوندا تے انج دے حالات وچ جدوں قرضیاں دی قسطاں تے سود دی ادائیگی وچ مشکلات نیں تے حکومت الیکٹرانک ووٹنگ مشیناں جہے مہنگے الیکشن دی خواہاں نہ ہوندی بلکہ اخراجات وچ کمی دی منصوبہ بندی کردی ملک دے عام انتخابات دے اخراجات دا جائزہ لئیے تے 2008 وچ دو ارب، 2013 وچ پنج ارب جد کہ 2018 وچ 25 ارب روپئے دے لگ بھگ اخراجات ہوئے ہن جے پورے ملک وچ مشیناں استعمال کیتیاں جاندیاں تے محتاط اندازے دے مطابق چھ لکھ مشیناں درکار ہون گیاں جس نال آئندہ عام انتخابات اُتے اُٹھن والے اخراجات دا تخمینہ 80 ارب لایا جا رہیا اے ایہہ ملک دے خراب معاشی حالات دے تناظر وچ چنگا یا دانشمندانہ فیصلہ نہیں اُنج وی پورے ملک وچ جدوں انٹرنیٹ دی سہولت ای نہیں تے مشیناں دے استعمال نال انتخابی مشکلات مزید ودھ جان گیاں ایسے لئی سیاسی نبض شناس کہندے نیں کہ چاہے اپوزیشن ولوں حکومت ڈیگن دا خطرہ نہیں تے حکومت اپنے ہتھاں ای اپنی ساکھ تباہ کرن لگی اے ایس دی وجہ کیہ اے ارباب اختیار ای بہتر روشنی پا سکدے نیں۔
موجودہ حکومت نوں اپوزیشن توں ای اک ہور وڈا خطرہ فارن فنڈنگ کیس اے۔ ایس حوالے نال ڈی جی لا دی سربراہی وچ کم کرن والی کمیٹی نے اپنی رپورٹ الیکشن کمیشن وچ جمع کرا دتی اے جس وچ پی ٹی آئی نوں فارن فنڈنگ کیس وچ بری الذمہ قرار نہیں دتا گیا بلکہ ملوث ہون دے واضح شواہد پیش کیتے گئے نیں رپورٹ دی روشنی وچ جمعرات نوں ان کیمرہ اجلاس وی ہو چکیا ایہہ رپورٹ انج دی تلوار اے جیہڑی پی ٹی آئی حکومت لئی تباہ کُن ثابت ہو سکدی اے ماہرین تے ایتھوں تیکر کہندے نیں کہ عمران خان ایس رپورٹ دی روشنی وچ نہ صرف نااہل ہو سکدے نیں بلکہ حکمران جماعت دے وی کالعدم ہون دا امکان رد نہیں کیتا جا سکدا کیوں جے کیس دا ساہمنا کرن دی بجائے تحریک انصاف راہ فرار اختیار کرن جہی بے نیازی تے غیر سنجیدگی دا مظاہرہ کر رہی اے حالانکہ جے عمران خان نااہل ہو جاندے نیں تے حکومتی جماعت اُتے وی پابندی لا دتی جاندی اے تے ملک دی اک وڈی جماعت دا شیرازہ کھلارن نال سیاسی عدم استحکام دا خطرہ ودھ جائے گا جس نال انتخابی شفافیت یقینی بنان لئی ہون والی کاوشاں بے ثمر ہو جان گیاں۔