محمد اقبال باہُو دی یاد وچ اِکٹھ

تقریب دی صدارت معروف سیرت نگار ، سربراہ درود دعوت مرکز ،سی ای او سیرت ٹی وی ڈاکٹر طارق شریف زادہ نے کیتی

رپورٹ: محمد ارشاد

پنجابی یونین دی چھتر چھاویںپنجاب ہاؤس وچ عارفانہ کلام دی گائیکی وچ وَکھری شہرت دے حامل گلوکار اپنی لاجواب کارکردگی دی بنیاد تے تمغہ امتیاز سنے درجناں ایوارڈ حاصل کرن والے محمد اقبال باہو دی یاد وچ ’’یاداںمحمد اقبال باہو دیاں‘‘دے سرناویں ہیٹھ تقریب منعقد ہوئی۔ میزبانی پنجابی یونین دے چیئرمین مدثر اقبال بٹ نے کیتی ۔ تقریب دی صدارت معروف سیرت نگار ، سربراہ درود دعوت مرکز ،سی ای او سیرت ٹی وی ڈاکٹر طارق شریف زادہ نے کیتی۔ مہمانان خصوصی واصف علی واصفؒ دے بیٹے صاحبزادہ کاشف محمود،معروف اداکار فردوس جمال،معروف نعت خواں الحاج مرغوب احمد ہمدانی، معروف نعت خواں الحاج اختر حسین قریشی ،ندیم اقبال باہو تے نامور اداکار راشد محمود سن۔

تقریب وچ علم وادب ،موسیقی تے فن نال تعلق رکھن والی نمایاں شخصیات دی وڈی تعداد نے شرکت کیتی جنہاں وچ پنجابی میڈیا گروپ دے صدر ندیم رضا ،کالم نگار ایم آر شاہد ،یوسف پنجابی ،فضل حسین بٹ،ڈاکٹر غافر شہزاد،پروفیسر عبدالمجید چٹھہ،عمران شوکت ،تیمور افغانی،میاں رفیق تے فراست بخاری سنے کئی لوکاں دے ناں شامل نیں۔ تقریب دا آغاز تلاوت نال ہویا تلاوت کلام پاک حافظ خطیب الرحمن نے کیتی نعت پڑھن دی سعادت محمد وقار عظیم چشتی نے حاصل کیتی اسٹیج سیکرٹری دے فرائض ممتاز ملک نے ادا کردیاں ہویاں محمد اقبال باہو دی زندگی دے مختلف پَکھاں تے فنی خدمات اتے روشنی پائی پنجابی میڈیا گروپ دے صدر ندیم رضا نے تقریب نال خطاب کردیاں ہویاں آکھیا کہ بہت گھٹ گلوکار انج دے ہوندے نیں جہڑے کلام ایس طرح پڑھدے نیں کہ سنن والے نوں اوس کیفیت وچ لے جاندے نیں جس کیفیت وچ لکھن والا ہُندا اے ۔اقبال باہو وی انج دے ای سن اج دی محفل بہت قیمتی اے کہ ایہدے وچ ادب تے فن دے حوالے نال انتہائی اہم شخصیات موجود نیں ۔جدوں میں اپنے پہلے روزے دی افطاری کیتی تے ایس توں پہلاں میں اقبال باہو نوں ای سن رہیا ساں ، اوہناں نے آکھیا کہ مدثر اقبال بٹ بہت خوش قسمت نیں کہ اوہناں نے پنجاب ہاؤس دا خواب 40سال پہلاں ویکھیا سی تے اج ایس دی تکمیل ویکھ رہے نیں ۔
اج دی تقریب اک عہد دی دوسرے عہد نوں منتقلی دی تقریب اے ایس کامیاب تقریب تے بلال مدثر بٹ وی مبارکباد دے مستحق نیں جنہاں نے ایس دا اہتمام کیتا ۔یوسف پنجابی نے آکھیا کہ وڈے لوکاں دے جسم مردے نیں روحاں نہیںمردیاں اقبال باہو دی روح وی زندہ اے مدثر اقبال بٹ نے ہمیشہ پیار ونڈیا تے پیار ای پایا اے ۔
ایم آر شاہد نے آکھیا کہ اقبال باہو درویش صفت سن عارفانہ کلام وچ اوہناں دا بہت وڈا مقام اے ۔عاشق حسین جٹ دے پتر فضل حسین جٹ نے آکھیا کہ مینوں اقبال باہو توں بہت محبتاں ملیاں نیں اوہ میرا بہت خیال رکھدے سن ۔شوبز وچ اقبال باہو جہے لوکاں دی بہت ضرورت اے کیونکہ اج دی شوبز بے مہار ہوگئی اے ۔ڈاکٹر غافر شہزاد نے آکھیا کہ اقبال باہو دا ایہ کمال سی کہ اوہ لوکاں نوں اپنے نال جوڑ لیندے سن صوفیا دے کلام نوں زندہ رکھنا بہت مشکل کم اے ایہو کم اقبال باہو نے کیتا ۔پروفیسر عبدالمجید چٹھہ نے آکھیا کہ اقبال باہو دا کہنا سی کہ سلطان باہو تے میاں محمد بخش نوں پڑھن نال گلا صاف تے ترنم آجاندا اے ۔معروف شخصیت نورالحسن نے آن لائن خطاب کیتا تے آکھیا کہ مدثر اقبال بٹ ایسی تقریبات منعقد کرن تے مبارکباد تے شکریے دے مستحق نیں جس شخص نوں یاد کرن نال اکھاں وچ اتھرو آجان اوہ دل دے بہت نیڑے ہندا اے ۔اقبال باہو انج دی ہی شخصیت اے جہڑامیرے دل دے بہت نیڑے ہے اواز وچ اثر ہووے تے لوک پچھے چلے آئوندے نیں اقبال باہو دی اواز وچ ایہو اثر سی ۔فوک گلو کار شوکت علی دے بیٹے عمران شوکت نے آکھیا کہ اقبال باہو وچوں مینوں اپنے والد دی خوشبو آئندی سی اوہ میرے سکے چاچا وانگوں سن ایس موقعے تے اوہناں نے میاں محمد بخش دا کلام وی سنایا ۔اقبال باہو دے صاحبزادے ندیم اقبال باہو نے آکھیا کہ ایس پر وقار تقریب تے میں مدثر اقبال بٹ تے تمام رلتیاں دا شکر گزار ہاں اوہناں نے آکھیا کہ میرے والد نے کدی کسے دی برائی نہیں کیتی تے سانوں وی ہمیشہ ایہو سبق دتا کہ کسے دی برائی نہیں کرنی ۔ندیم اقبال باہو نے ایس موقعے تے سلطان باہو دا کلام سنا کے محفل وچ سماع بنھ دتا۔ ملک دے نامور نعت خواں مرغوب احمد ہمدانی نے آکھیا کہ ایہ بڑی خوشی دی گل اے کہ پنجاب ہاؤس وچ سارا پروگرام پنجابی وچ ہورہیا اے ۔اقبال باہو انتہائی خوش خلق سن ایس موقعے تے اوہناں نے نعت وی پڑھی ۔پرائڈ آف پرفارمنس اداکار راشد محمود نے آکھیا کہ اقبال باہو وچ ایسی روحانی تبدیلی آئی کہ اوہ سلطان باہو دے کلام دی پہچان بن گئے ساڈی بدقسمتی اے کہ اسیں اپنی گفتگو وچ انگریز مفکراں نوں تے کوڈ کرنے آں ساڈے پنجابی دے صوفی جنہاں دے اک اک مصرعے وچ کئی کئی کتاباں بند نیں ایہناں نوں نظر انداز کر دیندے آں ۔

مدثر اقبال بٹ نے سانوں ساریاں نوں جوڑ کے رکھیا اے ۔صدارتی تمغہ حسن کارکردگی دے حامل نامور اداکار فردوس جمال نے آکھیا کہ میں پٹھان ہاں پر پنجابی وچ گل کرنا بہت چنگا لگدا اے ۔پنجابی دنیا وچ سب توں زیادہ بولی جان والی زبان اے ۔مینوں پہلی وار اداکاری داموقع وی پنجابی دی سیریل چڑیاں دا چنبہ وچ ملیا سی ۔ میںاقبال باہو توں بہت کجھ سکھیا اے اوہ پہلے اقبال سی فیر اقبال باہو ہوگیا تے جدوں اوہ باہو ہویا تے کسے توں پھڑیا نہیں گیا اوہ با ادب با مراد سی اوہناں نے آکھیا کہ پنجاب اولیا اللہ دی دھرتی اے تے مینوں اوس دی زمین اُتے سون دا موقع وی ملیا ، ایتھوں تک کہ میرے کول وچھان لئی چادر وی نہیں ہُندی سی جدوں والدہ نے ایس حالت وچ ویکھ کے واپس گھر جان دا آکھیا تے میں جواب دتا کہ کجھ بنن لئی آیا ہاں ۔معروف نعت خواں الحاج اختر حسین قریشی نے آکھیا کہ انج دی محفلاں داانعقاد تے اسیں مدثر اقبال بٹ دے مشکور آں ۔اوہناں نعت سنا کے سب دے دل جت لئے ۔واصف علی واصف دے صاحبزادے کاشف محمود نے آکھیا کہ پہچان کتوں کتوں ای ملدی اے پر ادب ہر تھاں توں فیض دواندا اے ۔ہو دا فلسفہ بہت گہرا اے ایہ کلمہ دی شارٹ فارم اے جہڑا ہو نوں پاگیا اوہ کلمے وچ گم ہو جاندا اے ۔ہزاراں لوکاں نے سلطان باہو نوں پڑھیا اے پر پہچان کسے کسے نوں ملی اے اقبال باہو نے سلطان باہو دے کلام توں پہچان پائی ۔اوہناں نے آکھیا کہ ندیم اقبال باہو دی شکل وچ ساڈے کول اقبال باہو ای ہے اوہ بلکل اپنے باپ دے انداز وچ گاندے نیں ۔تیمور افغانی نے ایس موقعے تے ہیر وارث شاہ تے میاں محمد بخش داکلام سنا کے خوب داد پائی ۔

صدر محفل ڈاکٹر طارق شریف زادہ نے آکھیا کہ بہت کم ایسے سن جہڑے اساں کرنے سن پر اللہ نے اوہ کم مدثر اقبال بٹ توں کروائے ۔اقبال باہو دی ایس تقریب دے بارے وچ تے اوہناں دا بیٹا سوچ وچار ہی کردے رہ گئے تے مدثر اقبال بٹ نے ایہ کم وی کر وکھایا۔اقبال باہو نال میری ملاقات 1994ء وچ ہوئی سی اوہ نظریہ وحدت الوجود دے قائل سن اوہناں نے آکھیا کہ اُحد دے پہاڑ نوں حضور ﷺ نے اپنا صحابی آکھیا اے لہذاء ایس پہاڑ نوں ویکھن والا تابی دے درجہ وچ آئوندا اے ایہ گل میں عمرہ دے موقعے تے اقبال باہو دے پچھن تے اوہناں نوں دسی سی ۔آخری وقت وچ اقبال باہو وچ بے نیازی دا عنصر آگیا سی ۔اقبال باہو نوں دریافت کرن لئی بہت کم دی لوڑ اے اوہناں آکھیا کہ اوہناں دی باہو فائونڈیشن بنان دی بڑی خواہش سی ہون سانوں چاہیدا اے کہ اوہناں نوں خراج تحسین پیش کرن لئی اقبال باہو فاؤنڈیشن بنایئے نویں نسل لئی اقبال باہو نہ آشنا ہُندے جا رہے نں، ایس موقعے تے اوہناں نے اقبال باہو لئی حکومت توں اقبال باہو نوں پرائڈ آف پرفارمنس دین دا مطالبہ کرن لئی اک قرار داد وی پیش کیتی جس نوں حاضرین محفل نے اتفاق رائے نال منظور کرلیا اے۔پنجابی یونین تے پنجابی میڈیا گروپ دے چیئرمین مدثر اقبال بٹ نے آکھیا کہ اقبال باہو نال میری جذباتی وابستگی سی اوہ پنجاب ہاؤس وچ ہون والے سب پرگراماں وچ لازمی شرکت کردے سن۔ پنجاب ہاؤس دے قیام دامقصد ایسے پروگراماں دا انعقاد اے جہدے وچ پنجابی دی ترقی و ترویج تے صوفیاء دے کلام تے تعلیمات تے گل کیتی جاسکے ۔پنجابی صوفیاء دی زبان اے ایہدے وچ تعلیم ہوویگی تے لوکاں نوں صوفیا نوں پڑھن تے سمجھن دا موقع ملے گا آئندہ سال اسیں پنجابی چینل وی لیا رہے آں ۔پنجابی دی اوہ کتب جنہوںکوئی چھاپن لئی تیار نہیں ہوندا انج دیاں 60کتاباں دی اشاعت اساں کردتی اے ، واصف علی واصف دی کتاباں دا پنجابی وچ ترجمے دا آغاز کردتا اے تے اک کتاب پنجابی وچ ٹرانسلیٹ کر دتی اے ۔اسیں ایہ گل فخر نال کہہ سکنے آں کہ پنجابی دے فروغ لئی جناں کم پنجاب ہاؤس نے کیتا اے کسے ہور ادارے نے نہیں کیتا ۔