احتساب دے 3 سال بہترین مثال

سرکاری اداریاں توں کرپشن دا زہر کڈن لئی محکمہ اینٹی کرپشن اپنی بے مثال کارکردگی دے نال نمودار ہویا

جاوید یونس

پچھلے دور وچ اینٹی کرپشن اکھوان والا محکمہ المداد بدعنوانی اج حکومت پنجاب دا اک غیر جانبدار تے معتبر تفتیشی ادارہ بن چکیا اے۔ پچھلے تن ورھے دے تھوڑے عرصے وچ اینٹی کرپشن اسٹیبلشمنٹ پنجاب نے اپنی اعلیٰ کارکردگی دی بنیاد عوامی اعتماد حاصل کرن دے نال نال دولنسبرگ تے ایف اے ٹی ایف جہے بین الاقوامی اداریاں تے اعلیٰ حکومتی عہدیداران بشمول وزیراعظم پاکستان جناب عمران خان تے وزیراعلیٰ پنجاب سردار عثمان بزدار توں وی بھرپور تائید و تعریف وصول کیتی اے۔
وزیراعظم پاکستان دے ویژن تے وزیراعلیٰ پنجاب سردار عثمان بزدار دی قیادت وچ سرکاری اداریاں توں کرپشن دے ناسور نوں جڑ توں اکھاڑ نا محکمہ انٹی کرپشن دا عزم وی اے تے ادارے دے قیام دا بنیاد ی مقصد وی۔ سیاسی عدم مداخلت تے بلاامتیاز احتسابی پالیسی دے تحت اینٹی کرپشن اسٹیبلشمنٹ نے سرکاری اداریاں وچ ہون والی نکی موٹی کرپشن دی بروقت بیخ کنی دے نال میگا کرپشن نوں نہ صرف بے نقاب کیتا بلکہ ٹھوس شواہد تے جاندار تفتیش دے بل بوتے اُتے پنجاب دے احتسابی عمل نوں اک نویں جہت دتی جس دی اک مثال حالیہ دناں وچ منظر عام اُتے آن والا راولپنڈی رنگ روڈ کیس دی چھان بین اے جس دی ذمہ داری حکومت پنجاب نے اینٹی کرپشن نوں دتی۔ اینٹی کرپشن نے 20 دناں وچ تفتیش کر کے مرکزی ملزمان نوں گرفتار کر لیا تے ہن مقدمہ عدالت وچ زیر سماعت اے جد کہ کجھ مہینے پہلاں ملکی تاریخ دے اک وڈے سکینڈل پنجاب پبلک سروس کمیشن پیپر لیک سکینڈل وچ پیپر لیک کرن والے گروہ نوں گرفتار کر کے بلاشبہ اک وڈا کارنامہ سرانجام دتا جس دی تائید امیدواران، سول سوسائٹی تے میڈیا نے وی کیتی۔
ڈائریکٹر جنرل اینٹی کرپشن پنجاب محمد گوہر نفیس موجودہ حکومت دی کرپشن دے خلاف زیرو ٹالرینس پالیسی نوں پنجاب وچ مکمل طور تے عمل پیرا کران دی ہر ممکن کوشش کر رہے نیں ایہناں ای کاوشاں دا نتیجہ اے کہ اینٹی کرپشن نے پچھلے تن ورہے وچ ارباں روپئے دی ریکوری کیتی اے جس وچ 206 ارب روپئے توں ودھ مالیت دی سرکاری زمیناں قبضہ مافیا توں واگزار کران دے نال نال کم و بیش 35 ارب روپئے دی ڈائریکٹ تے ان ڈائریکٹ ریکوری کر کے خزانہ سرکار وچ جمع کرا کے تاریخ رقم کیتی اے۔
ایس توں پہلاں پنجاب دی 12 وڈی جامعات وچ 6 ارب روپئے توں زیادہ دی غیر قانونی بھرتیاں دے میگاسکینڈل دی مکمل چھان بین کر کے معاملے نوں پایہ تکمیل تیکر اپڑان لئی چانسلر جامعات و گورنر پنجاب چوہدری محمد سرور نوں اپنی سفارشات مرتب کر کے ارسال کیتیاں۔ ایسے طرح محکمہ ایکسائز اینڈ ٹیکسیشن لاہور وچ حساس ادارے دے ناں اُتے جعلی آکشن گڈیاں دی مد وچ 300 ارب روپئے دے میگاکرپشن کیس نوں بے نقاب کیتا تے ذمہ داران تے مفاد کنندگان دے خلاف مقدمہ درج کر کے کلیدی کرداراں نوں گرفتار کر کے عدالت دے ساہمنے پیش کیتا گیا۔ مقدمہ ہجے عدالت وچ زیر سماعت اے۔ اکتوبر 2020 وچ چشم فلک نے اوہ دن وی ویکھیا جدوں پنجاب ورکرز ویلفیئر بورڈ محکمہ لیبر وچ مزدوراں دے بالاں دی تعلیم لئی مختص فنڈ وچ کروڑاں روپئے دے غبن نوں بے نقاب کر کے ملزمان نوں گرفتار کر کے عدالت وچ پیش کیتا گیا۔ معاملہ عدالت وچ زیر سماعت اے جد کہ ملزمان و مفاد کنندگان ساڑھے تن کروڑ روپئے توں ودھ دی ریکوری عمل وچ لیائی جا چکی اے۔
ایس توں علاوہ2017-18 دے رمضان پیکج وچ 260 ملین روپئے دے آٹا سبسڈی سکینڈل دی بھرپور تفتیش دے بعد 230 ملین روپئے وصول کر کے خزانہ سرکار وچ جمع کرائے گئے جد کہ شوگر مل مافیا دے گرد وی شکنجہ سخت کیتا گیا جس دے نتیجے وچ کساناں دے پچھلے تن ورھیاں توں پھسے ہوئے ارباں روپئے دی ریکوری کر کے گنے دے کاشتکاراں نوں پنجاب بھر وچ بروقت ریلیف اپڑایا گیا۔ نال ای غیر قانونی پٹرول پمپس دے خلاف خصوصی مہم دے نتیجے وچ 350 توں ودھ اوہ پٹرول پمپس جنہاں دے کول کے فارم یا ڈی سی دا لائسنس نہیں سی ایہناں نوں سربمہر کیتا گیا۔
اینٹی کرپشن اسٹیبلشمنٹ پنجاب نے پی ٹی آئی حکومت دے بعد توں ہن تیکر ڈی جی اینٹی کرپشن پنجاب محمد گوہر نفیس دی سربراہی وچ تاریخی کامیابیاں سمیٹیاں تے کرپشن دے ناسور دے خلاف بلا تخصیص بلاامتیاز بغیر کسے سیاسی مداخلت دے پل بنھن وچ اہل کردار اکیتا اے۔ اینٹی کرپشن اسٹیشبلمنٹ نے نویں حکومت دے آن دے بعد ارباں روپئے دی ریکوریاں، کیس، قبضہ مافیا دے چنگل توں ہزاراں ایکٹر سرکاری زمین واگزار کرائی تے ہزاراں عوامی شکایات دا بروقت حل کیتا۔ ماضی دی نسبت محکمہ اینٹی کرپشن اُتے عوام دا باون فیصد اعتماد ودھیا۔
سرکاری دفتراں وچ نکی کرپشن بارے آگاہی تے روک تھام لئی چائے پانی مہم دا آغاز کیتا گیا اے۔ مہمان نوازی بڑی خوبصورت شے اے۔ ساڈے کلچر دا حصہ اے۔ شاید ایہو وجہ اے کہ ساڈے گھر وچ جدوں کوئی مہمان آندا اے تے اسیں ایس دی خاطر مدارت، چائے پانی، قیام و طعام تے مزے مزے دے کھانیاں نال کرنے آں پر کجھ سرکاری اداریاں وچ جدوں کوئی عام بندا یا سائل اپنے کسے ضروری کم لئی جاندا اے تے ایس بیچارے توں چائے پانی دے ناں اُتے پیسے بٹور لئے جاندے نیں جو کہ کرپشن اے تے صورت حال ایہہ وے کہ ایس کرپشن نوں کوئی کرپشن سمجھدا ای نہیں نہ لین والا نہ دین والا۔
چائے پانی دے ناں اُتے جاری ایس کرپشن تے رشوت ستانی دے خلاف عوام وچ شعور آگاہی پیدا کرن تے ایس ناسور دے خاتمے لئی اینٹی کرپشن پنجاب بھر وچ بھرپور مہم چلا رہیا اے۔ اینٹی کرپشن دے کرپٹ سرکاری اہلکاراں دے خلاف جاری مہم ’’چائے پانی‘‘ دے تحت گریڈ 1 توں 19 دے 675 ا فسراں تے اہلکاراں نوں ٹریپ ریڈ کر کے گرفتار کیتا گیا جنہاں توں 10.85 ملین روپئے دی ریکوریاں کیتی گئی۔ ایسے طرح اینٹی کرپشن خواتین دے معاشرتی و معاشی استحصال کرن والے بندے تے ایہناںنوں معاشرے دا کمزور طبقہ سمجھ کے ایہناں نوں وراثت توں بے دخل کرن والا تے ایہناں دی جائیداد، پلاٹ، گھر اُتے ناجائز قبضہ کرن والے کرپٹ عناصر نوں قانون دی گرفت وچ لیا کے خواتین نوں تحفظ فراہم کرن لئی Women Empowerment with ACE مہم دا آغاز وی کیتا۔ ایس سلسلے وچ اینٹی کرپشن دے سارے دفتراں وچ خصوصی سیل قائم کر دتے گئے نیں۔
خاتون استاد عذرا ظفر دے پلاٹ اُتے قبضہ اک کیس سٹڈی اے۔ ملتان آفیسرز کالونی وچ عذرا ظفر دا اک کنال دا پلاٹ واقع اے جس اُتے ناجائز قبضہ کر لیا گیا۔ خاتون استاد نے اپنے نال ہون والی ناانصافی لئی ٹویٹر اُتے وزیراعظم پاکستان اگے اپیل کیتی۔ ریٹائرڈ ٹیچر عذرا ظفر نے ٹویٹر اُتے وزیراعظم نوں اپنے پیغام وچ کہیا کہ 20 سال پوری ایمانداری نال قوم نوں علم و آگہی دے کے چنگی تربیت کردی رہیاں تاں اپنی قناعت و بچت نال پائی پائی جوڑ کے سر لُکان لئی قسطاں اُتے اک کنال دا پلاٹ خریدیا جیہڑا قبضہ مافیا نے جعلسازی نال ہتھیا لیا۔ تاں ایس دی فوری امداد کیتی جائے تے ایس دے نال ہون والی ناانصافی دا مواخذہ کیتا جائے جس اُتے ڈائریکٹر جنرل اینٹی کرپشن پنجاب محمد گوہر نفیس نے ٹویٹر اُتے خاتون استاد دی فریاد سن کے ریجنل ڈائریکٹر اینٹی کرپشن ملتان نوں فوری کارروائی دا حکم دتا ایسے طرح ریجنل ڈائریکٹر اینٹی کرپشن ملتان حیدر وٹو نے خاتون ٹیچر نال رابطہ کر کے حقائق پتہ کیتے سن۔ خاتون توں پراپرٹی دی دستاویزات منگوا کے انکوائری شروع کیتی گئی۔ دستاویزات دی چھان بین تے ملزم دے اعترافی بیان نال قبضہ مافیا دی جعلسازی واضح ہو گئی۔ چھان بین دے بعد خاتون دی مدعیت وچ پرچہ درج کر لیا گیا۔ خاتون استاد عذرا ظفر دا پلاٹ ہتھیان والے شاطر جعلساز ظہور نوں اینٹی کرپشن نے حساس اداریاں دی مدد نال گرفتار کر کے حوالات وچ بند کر دتا۔ ملزم دے جعلی شناختی کارڈ اُتے فرضی نام ہون دی وجہ نال لبھنا مشکل سی تاں اینٹی کرپشن ملتان نے حساس اداریاں دی مدد نال کیس وچ اہم پیش رفت کردے ہوئے ملزم ظہور احمد نوں کہروڑ پکا توں گرفتار کر لیا۔ مکمل انکوائری دے بعد ست بندیاں دے خلاف پرچہ درج کیتا گیا۔ ایس سی او لینڈ ریکارڈ سینٹر ملتان ندیم لودھی تے رجسٹری برانچ دے جونیئر کلرک ندیم چٹھہ وی پرچے وچ نامزد کیتے گئے نیں۔
اینٹی کرپشن نے عوام دی سہولت لئی رپورٹ کرپشن ایپ وی لانچ کر رکھی اے جس دا افتتاح دو سال پہلاں وزیراعظم پاکستان جناب عمران خان نے آپ کیتا سی۔ ایپ اُتے ہن تیکر 11488 شکایات موصول ہوئیاں جنہاں وچوں 10606 نمٹا دتیاں گیاں جد کہ 882 اُتے کم جاری اے۔ رپورٹ کرپشن ایپ دے ذریعے 2107 ملین روپئے دی ریکوری ہوئی اے۔
رشوت متعلق اک حدیث اے کہ رشوت دین تے لین والا دونویں جہنمی نیں۔ افسوس کجھ روپیاں تے دنیاوی اثر و رسوخ دی خاطر اسیں جہنم خرید رہے آں۔ جیہڑا کہ سراسر گھاٹے دا سودا اے۔ رشوت و بدعنوانی ناسور دی طرح ساڈے معاشرے وچ سرایت کر چکی اے۔ جدوں تیکر ایس کینسر نوں جڑ توں اکھاڑ نہیں سٹ دے اوس ویلے تیکر اسیں بحیثیت اک قوم نہیں ابھر سکدے۔ پاکستان تحریک انصاف دے سربراہ عمران خان نے اپنی انتخابی مہم وچ کرپشن دے خاتمے، ملکی لُٹی ہوئی دولت نوں واپس لیان تے ایس جرم وچ ملوث بندیاں نوں قانون دے کٹہرے وچ لیان دا نعرہ لایا تے پوری قوم ایہناں دے نال ہو گئی تے ووٹ دی طاقت نال ملک دی نس بھج ایہناں دے ہتھ وچ دے دتی۔ ایس وچ کوئی دورائے نہیں کہ وزیراعظم عمران خان نے ملک توں کرپشن دے خاتمے نوں اپنی اولین ترجیح بنایا اے تے اوہ ایس گل دا مکمل تہیہ کیتے ہوئے نیں کہ بدعنوان لوکاں نوں قانون دے کٹہرے وچ لیاواں گے۔
وزیراعظم پاکستان عمران خان دے ویژن نوں عملی جامہ پہنان لئی وزیراعلیٰ پنجاب سردار عثمان بزدار نے انسداد بدعنوانی لئی تاریخ ساز اقدامات چکے۔ بزدار حکومت نے کرپشن دے خلاف زیرو ٹالرنس پالیسی اپنائی اے۔ اوہناں نے اینٹی کرپشن اسٹیشبلمنٹ نوں بدعنوان عناصر دے خلاف بلاامتیاز تے بلاتخصیص کارروائی لئی مکمل فری ہینڈ دتا اے تے ایس ادارے نوں سیاسی اثر و رسوخ توں پاک کر دتا اے۔ حکومت نے رپورٹ کرپشن موبائل ایپ دا اجراء کیتا اے تے پہلی وار ایس ادارے نوں تکنیکی و مالی وسائل فراہم کیتے نیں۔ افرادی قوت فراہم کرن دے نال محکمہ دے افسران نوں موبائل کرن لئی نویں گڈیاں فراہم کیتیاں نیں۔ ایسے طرح تحقیقات اُتے آن والے اخراجات تے سیکرٹریٹ فنڈز فراہم کیتے نیں۔ عوام دی سہولت تے ایہناں دی شکایات دے ازالے لئی کھلی کچہریاں دے انعقاد نوں یقینی بنایا جا رہیا اے۔ قومی وسائل لُٹن والیاں نوں کسے صورت معاف نہیں کیتا جائے گا۔ اینٹی کرپشن ادارے نوں ریفارم کیتا اے تے ایس دی مثال پچھلے 70 ورہے وچ نظر نہیں آندی۔ اج دے دن اسیں ایہہ عہد کرنا اے کہ کرپشن اک مائنڈ سیٹ اے تے سانوں سب نوں ایس مائنڈ سیٹ دے خلاف اواز چکنی ہوئے گی تاکہ میرٹ تے شفافیت دے نال گڈ گورننس دا خواب پورا ہو سکے۔