شاندار پنجابی کانفرنس تے پنجابی مشاعرہ
اِکٹھ دا پربندھ گورنمنٹ ایسوسی ایٹ کالج قلعہ دیدار سنگھ وچ پریس کلب قلعہ دیدار سنگھ ولوں کیتا گیا۔
رپورٹ: محمد اویس باسل
دل دریا پاکستان رجسٹرڈ دی چھتر چھاویں گورنمنٹ ایسوسی ایٹ کالج قلعہ دیدار سنگھ وچ پنجابی کانفرنس تے پنجابی مشاعرے دا پربند کیتا گیا۔کالج انتظامیہ دے نال نال چیئرمین پریس کلب قلعہ دیدار سنگھ،صدر دل دریا پاکستان رجسٹرڈ صوبہ پنجاب محمد شوکت ڈار تے رمضان تائب ہوراں ایس اکٹھ دا آہر کیتا۔
اُچیچے پروہنیاں وچ مہان مذہبی و علمی شخصیت زاہد علوی ڈاکٹر امین جان تے مقصود یاور ہوریں شامل سن۔ اس توں وکھ مان جوگ شاعراں وچ محمد شوکت ڈار، پروفیسر عادل بادشاہ،خلیل الرحمن حماد،عصمت اللہ سیکھو،امتیاز قیس چٹھہ،محمد رمضان تائب،اطیب اعظم تے رضی یار ہوراں رلت کرکے مان ودھایا۔
اِکٹھ دا آغاز کلام مجید دی تلاوت نال شروع ہویا۔محمد ریاض آغا ہوراں نعت پیش کیتی۔کالج دے ایکٹنگ پرنسپل پروفیسر ڈاکٹر محمد ارشد ہوراں آن والے پروہنیاں دا پُھلاں نال سواگت کیتا۔اکٹھ دے پردھان علی احمد گجراتی ہوراں مادری زباناں دی اہمیت بارے گل بات کردیاں ہویاں پنجابی زبان دے پنجاب وچ لگوتی تے بھرویں گل بات کیتی اور پنجاب دے سکولاں کالجاں وچ پنجابی لازمی مضمون دے طور تے پڑھائے جان تے زور دتا۔
اکٹھ دے آخر تے پروفیسر ڈاکٹر محمد ارشد ہوراں پروہیناں نوں دھنواد آکھیا۔ آن والے سارے پروہیناں لئی کالج انتظامیہ ولوں چاہ پانی دا بھرواں آہر کیتا گیا سی۔ ایس اکٹھ وچ کالج دے کئی سو پڑھیاراں رلت کیتی تے پنجابی زبان بارے گل بات نوں بڑے گوہ نال سُنیا۔ پنجابی شاعری تے دل کھول کے داد دتی۔علمی ادبی حلقیاں وچ کالج انتظامیہ خاص طور تے پروفیسر ڈاکٹر محمد ارشد ہوراں دی کوشش نوں بہت سراہیاں جا ریہا اے۔ کالج دی 32 سالہ تاریخ وچ ایہ پہلا ادبی اکٹھ سی جس وچ پنجابی کانفرنس تے پنجابی مشاعرے دا پربند کیتا گیا سی۔
