نعت شریف

عبدالحمید نظامی

انج اکھیاں جاندیاں ٹھر نعلین مبارک تکیاں
جویں اجڑے وسن گھر نعلین مبارک تکیاں
آقا دے جوڑیاں دا سب صدقہ ہی کھانے آں
جاندی اے جھولی بھر نعلین مبارک تکیاں
توصیف محمدؐ دی آ جاندی اے نظراں وچ
کھُل جاون سوچ دے پر نعلین مبارک تکیاں
اوہ خالی نہیں مڑدا اوہ کناں ای عاصی اے
جو بہندا سیس نوں دھر نعلین مبارک تکیاں
نعلین نوں رکھ ساہویں جو کردائے گل عاشق
ہو جاندی انج اکثر نعلین مبارک تکیاں
اوہ نیکیاں لکھدے نیں جو بیٹھے موہڈیاں اُتے
بدیاں دے ٹھپ دفتر نعلین مبارک تکیاں
کیہ ہویا ٹٹ گئیاں آساں دیاں ڈوریاں جو
ہو جاسی سب بہتر نعلین مبارک تکیاں
ویر کماون والے نہیں کر سکدے کجھ تیرا
لتھ جاون گے سب ڈر نعلین مبارک تکیاں
اَج لکھ مبارکاں ہون گئے پینڈے مُک نظامیؔ
سوہنے دا ملیا در نعلین مبارک تکیاں