مسلمان ملک تے افغانستان دا انسانی المیہ

(سید ابرار حسین)

کل اسلام آباد او آئی سی دے اک اہم اجلاس دی میزبانی کرے گا۔ اسلامی تعاون دی تنظیم دے وزرائے خارجہ دا ایہہ سترھواں غیر معمولی اجلاس افغانستان وچ پیدا ہون والے انسانی بحران اُتے غور کرن لئی بلایا گیا اے۔ ایس اجلاس وچ رکن اسلامی ملکاں دے نال نال اقوام متحدہ دے اداریاں ، بین الاقوامی تے علاقائی تنظیماں، عالمی اقتصادی اداریاں نوں وی شرکت دی دعوت دتی گئی اے۔
افغانستان وچ روز بروز معاشی ابتری خصوصاً خوراک دی شدید کمی جہی سنگین صورت حال ایس گل دی متقاضی اے کہ اقوام عالم افغان عوام دی مدد لئی اگے آن تے ایہناں نوں ایس انسانی المیے توں بچان دی بھرپور کوشش کرن۔ عالمی ادارہ خوراک دے مطابق افغانستان وچ دنیا دا سب توں وڈا انسانی بحران جنم لے رہیا اے۔ مسلسل جنگ، قحط تے غربت دی وجہ نال افغانستان دی ادھی توں زیادہ آبادی یعنی دو کروڑ 30 لکھ توں ودھ لوک غذائی مشکلات تے صحت دے مسائل دا شکار نیں۔ ایہناں وچوںستاسی لکھ آبادی بشمول 32 لکھ معصوم بچے انج دے وی نیں جیہڑے شدید غذائی قلت دی وجہ نال موت دے دہانے اُتے نیں ۔
افغانستان توں بیرونی افواج دی واپسی دے بعد اوتھے دی معیشت شدید مشکلات دی زد وچ اے۔ کیوں جے پچھلے 20 ورھے دے دوران افغانستان دا ادھا بجٹ قابض ملک مہیا کر رہے سن تے اوتھے دی سالانہ قومی پیداوار دا 45 فیصد معیشت جنگ یعنی اکانومی وار دا مرہون منت سی۔ ستم بالائے ستم امریکہ نے اپنے بنکاں وچ موجود 10 ارب ڈالر دے افغان اثاثے منجمد کر دِتے۔ مزید ایہہ کہ عالمی بنک تے آئی ایم ایف نے وی مدد روک رکھی اے۔ گویا اقوام متحدہ، امریکہ تے ایس دے حلیف ملکاں ولوں کجھ طالبان رہنماواں اُتے لائی گئی پابندیاں دی سزا پوری افغان قوم نوں دتی جا رہی اے۔
ایس ویلے معاشی صورت حال اینی ابتر اے کہ افغان سرکاری ملازمین نوں اپریل توں تاحال تنخواہ نہیں دتی جا سکی۔ مغربی ملک اک پاسے تے افغان حکومت توں مطالبہ کر رہے نیں کہ کُڑیاں دے کالج جلدی کھولے جان تے دُوجے پاسے جدوں طالبان اساتذہ دی تنخواہواں ادا کرن لئی افغانستان دے اثاثے غیر منجمد کرن دی گل کردے نیں تے ایہنوں قابل اعتنا نہیں سمجھیا جاندا۔
ایس صورت حال وچ لوڑ ایس گل دی اے کہ اقوام عالم تے خاص طور تے مسلمان ملک اپنے افغان بھراواں دی مدد کرن۔ ایس گل نال قطع نظر کہ اوتھے کس دی حکومت اے ایس حکومت دے نظریات کیہ نیں، ایہناں دے خیالات دنیا نال کنہے ہم آہنگ نیں، ساڈے لئی ایہ اہم ہونا چاہیدا اے کہ اوتھے دے عوام نوں ایس مشکل ویلے وچ کلا نہ چھڈیا جائے۔ آپ مغربی ملکاں نوں وی ایہہ سمجھن دی لوڑ اے افغاناں نوں تنہا کر کے اوہ اپنے مقصد حاصل نہیں کر پان گے بلکہ ایہناں نوں دیوار نال لان دی کوشش آپ امریکہ تے ایس دے حلیفاں لئی نقصان دا باعث بن سکدی اے۔
پاکستان نے اپنے طور تے افغان عوام دی مدد دی ہر ممکن کوشش کیتی اے ساڈے وزیر خارجہ نے کجھ عرصے پہلے کابل دے دورے دے موقعے اُتے پنج ارب روپئے دی امداد دا اعلان کیتا سی۔ خوراک ، دوائیاں تے کپڑیاں دی صورت وچ بوہت ساری سرکاری تے غیر سرکاری تنظیماں، مصیبت زدہ افغان عوام دی مدد دی کوششاں وچ مصروف نیں تاں افغان انسانی بحران بہت وڈا اے تے اینی ای وڈی مدد دا متقاضی اے۔
اسلامی تعاون دی تنظیم امت مسلمہ دی اجتماعی آواز اے تے اسلام تے مصیبت وچ کافراں دی وی مدد دا درس دیندا اے۔ رسول اکرم ﷺ نے تے مکہ وچ قحط پین اُتے دشمناں نوں وی امداد گھلی سی۔ مسلمان تے اک دُوجے لئی انج دے نیں جویں اک جسم دے مختلف اعضاء۔ ایہہ کنج ممکن اے کہ اک مسلمان نوں تکلیف اپڑے تے دُوجے نوں احساس تیکر نہ ہوئے۔ ایس لئی امید اے کہ اسلامی تعاون دی تنظیم ایس مشکل صورت حال دے تقاضیاں اُتے پورا اترے گی تے مظلوم و مجبور افغان بھراواں دی آواز اُتے لبیک کہندے ہوئے نہ صرف آپ ایہناں دی مدد لئی اگے ودھے گی بلکہ دوجی اقوام عالم نوں وی ایہناں دی مدد اُتے آمادہ کرن وچ پیش پیش ہوئے گی۔
(سید ابرار حسین افغانستان وچ پاکستان دے سفیر رہ چکے نیں)