غزل
بابا نجمی
خورے کتھے مر گئیاں نیں کڑیاں میرے ہان دیاں
سدھراں دریا کر گئیاں نیں کڑیاں میرے ہان دیاں
چٹیاں چدراں دے نال اپنے کالے مونہہ نہ صاف کرو
شاموں پہلاں گھر گئیاں نیں کڑیاں میرے ہان دیاں
اکھ ذرا جہی نیویں کر کے اوہناں نوں میں ملیا واں
میری پوجا کر گئیاں نیں کڑیاں میرے ہان دیاں
میں تاں ننگے سر کجن لئی چدراں لے کے آیا واں
کہڑی گلوں ڈر گئیاں نیں کڑیاں میرے ہان دیاں
میرے شہر چ داجاں باجھوں لکھاں ویڑھے بابل دے
بابا نجمی مر گئیاں نیں کڑیاں میرے ہان دیاں
