غزل
ہمایوں پرویز شاہد
ہاواں بھریاں سدھراں بارے سوچاں گا
اج میں اپنیاں لیکھاں بارے سوچاں گا
کھادیاں سن جو بیٹھ سرو دے تھلے توں
تیریاں اوہناں قسماں بارے سوچاں گا
نت مٹان تے تُلیاں مینوں مٹ کے جو
ہتھ دیاں اوہناں لیکاں بارے سوچاں گا
ٹٹ کے وی جو میرے گل نوں آئیاں نیں
اوہناں ٹُٹیاں بانہواں بارے سوچاں گا
ہر اک فرق بھلا کے خون تے رنگت دا
آون والیاں نسلاں بارے سوچاں گا
لیکھ جگاون جہڑے بنجر دھرتی دے
سوچاں گا میں اوہناں بارے سوچاں گا
اُٹھدیاں نیں کیوں ہر ویلے اَسماناں وَل
شاہدؔ اپنیاں اکھاں بارے سوچاں گا
