ملکہ پکھراج تے شہنشاہ نواب

تنویر ظہور

پاکستان ٹیلی ویژن دی نشریات دا آغاز 1964ء وچ ہویا۔ شہنشاہ نواب شروع توں ای بطور پروڈیوسر پی ٹی وی نال وابستہ ہو گئے۔ اوہناں نے ڈرامیاں تے موسیقی توں علاوہ کجھ پروگرام پیش کیتے۔ ایہ اوہناں دیہاڑیاں دی گل اے جدوں موبائل نہیں سن ہوندے تے لینڈ لائن فون تے ای گل ہو سکدی سی۔ اک واقعہ مشہور ہویا کہ ملکہ پکھراج نے اپنے پروگرام دی ریکارڈنگ دے سلسلے وچ پی ٹی وی فون کیتا تے کہیا کہ میں ملکہ پکھراج بول رہی آں فون سنن والے نے کہیا میں شہنشاہ نواب بول رہیا واں ملکہ پکھراج نے سمجھیا میرے نال مذاق کیتا گیا اے۔ ریکارڈنگ لئی جدوں اوہ پی ٹی وی سٹیشن اپڑیاں تے سب توں پہلاں جنرل منیجر دے کمرے وچ گئیاں تے شکوہ کیتا۔ جی ایم ہلکا جیہا مسکرائے تے چپڑاسی نوں کہیا شہنشاہ نواب نوں میرے کمرے وچ گھلو۔ جدوں اوہ آ گئے تے جی ایم نے تعارف کرایا ایہ جے پروڈیوسر شہنشاہ نواب۔ تہاڈے نال مذاق نہیں کیتا گیا۔
دوستو! ملکہ پکھراج کلاسیکی‘ نیم کلاسیکی دی ممتاز گائیکہ سن۔ پہاڑی تے اردو کلام گانے وچ خاص مقام رکھدیاں سن۔ طاہرہ سید تے تسنیم ظفر (ایس ایم ظفر دی بیوی) دی والدہ سن۔ آپ نے چار فروری 2004ء وچ وفات پائی۔ شہنشاہ نواب پہلی ای ملاقات وچ اینے خلوص نال ملے کہ اوہناں نال دوستی ہو گئی۔ پی ٹی وی جائن کرن توں پہلاں اوہ محکمہ موسمیات وچ ملازم سن۔ لہور ٹی وی توں پہلا پروگرام الف اور نون پیش کیتا۔ ایہ پروگرام ایناں مقبول ہویا کہ دو ورھے تک چلیا۔ ڈرامیاں وچ نویں فنکار متعارف کرائے جہناں نے بعد وچ عروج حاصل کیتا۔ مثلاً طاہرہ نقوی‘ ثروت عتیق‘ روحی بانو وغیرہ۔ شہنشاہ نواب لکھنوی سن۔ اوہناں نوں پنجابی موسیقی دا پروگرام دھنک دتا گیا جو اوہناں لئی چیلنج سی۔ اوہناں نے ایس چیلنج نوں قبول کیتا تے پروگرام اینی خوبصورتی نال پیش کیتا کہ لوک داد دتے بناں نہ رہ سکے۔ اوہناں نے ثابت کر دتا کہ فن دی کوئی زبان نہیں ہوندی۔ موسیقی دے پروگراماں وچ آپ نے لہور ٹیلی ویژن توں پنج واری ایوارڈ حاصل کیتا۔ جدوں کوئٹہ ٹی وی سنٹر شروع ہویا تے شہنشاہ نواب نوں اوتھے بطور پروگرام منیجر گھل دتا گیا۔ اوتھے اوہناں نے اک ورھا جنرل منیجر دے فرائض نبھائے۔ ایہدے بعد اسسٹنٹ کنٹرولر ہو کے اسلام آباد آ گئے۔ اوہناں نے نوجوان نسل دا مقبول پروگرام جواں فکر پیش کیتا۔ ایس پروگرام وچ اجہے طالب علماں نوں پیش کیتا گیا جو اپنی فکر وچ لاثانی سن۔
اندروں اوہ دکھی سن پر اپنے دکھ دا اظہار کسے نال نہ کردے۔ اوہناں دی بیوی تے بچے لکھنو وچ رہندے سن۔ جدوں توں شہنشاہ نواب پاکستان آئے اوہ اپنے بیوی‘ بچیاں نوں ملن صرف دو واری لکھنو جا سکے۔ اوہ سارے فنکاراں نوں اپنی اولاد وانگوں سمجھدے۔ اوہناں دی ہر طرح مدد تے تربیت کردے۔ اوہناں دی کوشش ہوندی کہ کوئی بندہ اوہناں نال ناراض نہ ہووے۔ ایہو وجہ سی کہ ہر بندہ اوہناں دا مداح سی۔ فنکار اوہناں نوں اپنا بزرگ سمجھدے۔ معروف پروڈیوسر نصرت ٹھاکر تے قنبرعلی شاہ اوہناں نوں پی ٹی وی دا دادا کہندے۔ اینی مقبولیت دے باوجود شہنشاہ نواب عاجزی دا پیکر سن۔ تکبر اوہناں وچ بالکل نہیں سی۔ اک مخصوص مسکراہٹ ہمیشہ اوہناں دے لباں تے رہندی۔ پریشانی توں نہیں گھابردے سن۔ بیوی بچیاں دی جدائی دا دکھ بھل کے دوستاں دیاں خوشیاں وچ شریک ہوندے۔ ہے تے اوہ انسان ای‘ بیوی تے بچیاں دی جدائی دا روگ اوہناں نو ںاندروں کھوکھلا کر چکیا سی تے اوہ دل دی بیماری وچ مبتلا ہو گئے۔ دل دا دورہ پیا‘ لکھاں مداحواں تے ناظرین دیاں دعاواں توں چھیتی صحت یاب ہو گئے۔ شہنشاہ نواب نوں فلماں وچ ہدایتکاری دی آفر ہوئی پر اوہناں نے انکار کر دتا تے اپنی خدمات پی ٹی وی لئی وقف کر دتیاں۔ اوہناں دا شمار پی ٹی وی دے Pioneers وچ ہوندا اے۔
کراچی وچ رہندے ممتاز شاعر ظفررباب دی نویں غزل پیش اے:
مکتبِ فقر سے منسوب کیا ہے خود کو
دل کے اس رنگ میں کیا خوب کیا ہے خود کو
ڈال رکھی ہے صلیب ہم نے گلے میں غم کی
اپنے ہاتھوںہی سے مصلوب کیا ہے خود کو
اب اسے اپنی خبر ہے نہ زمانے کا پتہ
جب سے درویش نے مجذوب کیا ہے خود کو
فیکٹری کو تھی طلب چند ہنر مندوں کی
شہر کے شہرنے مطلوب کیا ہے خود کو
کشتِ زرخیز کو خوراک بنانے کے لیے
سیم اور تھور نے مرغوب کیا ہے خود کو
ذات کی کھوج میں یہ کون سی منزل ہے رباب
دل نے خود اپنا ہی محبوب کیا ہے خود کو