حمد باری تعالیٰ

الیاس آتش

ہے کون تیرے سوا لا الٰہ الا اللہ
ہیں توں ای سب دا خدا لا الٰہ الا اللہ
بغیچے باغ تے بیلے پہاڑ دریا سب
تے تونہیوں خلقی ہوا لا الٰہ الا اللہ
ترے حکم دے نیں پابند چن تے سورج
ایہ من دے تیری رضا لا الٰہ الا اللہ
ترا پیام سنایا نبیؐ نے لوکاں نوں
توں کیتا جہڑا عطا لا الٰہ الا اللہ
ایہ جن و انس، ملائک تے ساریاں حوراں
ذکر نیں کردے سدا لا الٰہ الا اللہ
ترے نیں جلوے زمانے چ ہر طرف مولا
تری ہی ہر سو ضیا لا الٰہ الا اللہ
فنا ہر چیز نوں ایں جو وی اے زمانے تے
سدا اے تینوں بقا لا الٰہ الا اللہ
ترے دربار چوں مُڑیا نہ کوئی وی خالی
کریں توں رزق عطا لا الٰہ الا اللہ
مریض جنے وی آئوندے تیرے در اُتے
ہے ملدی سب نوں شفا لا الٰہ الا اللہ
رحیم ذات ہے تیری کریم وی توں ایں
فقیر حق دی صدا لا الٰہ الا اللہ
سنیں جے التجا آتش دے دل دی توں مولا
تے ہووے دید عطا لا الٰہ الا اللہ