نبی اکرم ﷺ دے پسندیدہ کھانے

رسول اکرم ﷺ دی حیات طیبہ وچ کھانیاں دے بارے وچ واضح طور تے دو گلاں ساہمنے آندیاں نیں اک سادگی تے دوجے حالات دے مطابق کھانے دا معیار

مولانا زبیر حسن

’’حضرت انس رضی اللہ عنہ فرماندے نیں کہ اک درزی نے رسول اکرم ﷺ دی دعوت کیتی، میں وی آپ ؐ دے نال حاضر ہویا، ایس نے رسول اکرم ﷺ دی خدمت وچ جو دی روٹی تے کدو گوشت دا شوربا پیش کیتا، میں آپ ﷺ نوں ویکھیا کہ پیالے وچ ہر پاسے توں کدو دے ٹوٹے لبھ کے تناول فرما رہے نیں اوس ویلے توں مینوں کدو مرغوب ہو گیا۔‘‘(ترمذی)
رسول اکرم ﷺ دی حیات طیبہ وچ کھانیاں دے بارے وچ واضح طور تے دو گلاں ساہمنے آندیاں نیں اک سادگی تے دوجے حالات دے مطابق کھانے دا معیار۔ حضرت عائشہ رضی اللہ تعالیٰ عنہا فرماندیاں نیں کہ حضور ﷺ دی وفات تیکر آپ دے اہل و عیال نے دو دن کدی جو دی روٹی نال پیٹ بھر کے کھانا نہیں کھادا۔ حضرت عبداللہ بن عباس رضی اللہ تعالیٰ عنہ فرماندے نیں کہ آپ ﷺ تے آپ دے گھر والے کئی کئی راتاں پے در پے بھُکے لنگھا دیندے سن کہ رات نوں کھان لئی کجھ موجود نہیں ہوندا سی تے اکثر غذا جو دی روٹی ہوندی سی۔پر جدوں چنگا کھانا میسر ہوندا تے آپ اوہ وی تناول فرما لیندے تے صرف سرکہ وی ہوندا تے ایسے نال کھانا تناول فرما لیندے۔ اک وار فرمایا ’’سرکہ وی کنج دا چنگا سالن اے‘‘ اک حدیث وچ اے فرمایا کہ پہلے انبیاء دا سالن وی سرکہ رہیا اے اک وار ارشاد فرمایا جس گھر وچ سرکہ ہوئے اوتھے سالن دی لوڑ نہیں رہندی۔ ترمذی وچ حضرت ابوموسیٰ اشعریؓ توں روایت اے میں آپ رسول اکرم ﷺ نو ں مرغی تناول فرماندے ہوئے ویکھیا اے۔
ترمذی وچ روایت اے کہ رسول اکرم ﷺ دے آزاد کردہ غلام سفینہ کہندے نیں کہ میں رسول اکرم ﷺ دے نال حباری دا گوشت کھادا اے حباری اک پرندہ اے ایس دے ترجمے وچ مختلف اقوال نیں، تغذری، بٹیر، سرخاب، چکا چکوئی، بہرصورت حباری اک جنگلی پرندہ اے جس دا رنگ خاکی، گردن وڈی، پیر لمبے تے چونچ وچ تھوڑی جہی لمبائی ہوندی اے بوہت تیز اڑدا اے۔ حضرت عائشہ ؓ فرماندیاں نیں کہ رسول اکرم ﷺ نوں مٹھا تے شہد پسند سی، روایت وچ عربی لفظ ’’الحلواء‘‘ اے محدثین فرماندے نیں کہ ایس نال ہر مٹھی شے مراد اے۔ حضرت شیخ الحدیث مولانا محمد زکریا صاحبؓ خصائل نبوی شرح شمائل ترمذی وچ فرماندے نیں سب توں پہلے حلوا حضرت عثمانؓ نے بنوا کے رسول اکرم ﷺ دی خدمت وچ پیش کیتا سی تے آپ ؓ نے ایہنوں پسند فرمایا سی، ایہہ حلوا آٹے، شہد تے گھیو نال بنایا گیا سی حضرت ام سلمہؓ فرماندیاں نیں کہ اوہناں نے پہلو دا بھنیا ہویا گوشت رسول اکرم ﷺ دی خدمت وچ پیش کیتا تے آپ نے اوہ تناول فرمایا۔ عبداللہ بن الحارثؓ فرماندے نیں کہ اسیں رسول اکرم ﷺ دے نال بھنیا ہویا گوشت مسجد وچ کھادا۔ حضرت ابوہریرہؓ فرماندے نیں کہ حضور اکرم ﷺ دی خدمت وچ کدھروں گوشت آیا ایس وچوں دستی دا گوشت (بونگ) آپ دی خدمت وچ پیش ہوئی آپ نوں دستی دا گوشت پسند وی سی، آپ نے ایہنوں دنداں نال کٹ کے تناول فرمایا، ترمذی وچ ابوعبیدہ توں روایت اے کہ میں رسول اکرم ﷺلئی ہانڈی پکائی چونکہ آپ نوں بونگ دا گوشت زیادہ پسند سی، ایس لئی میں اک بونگ پیش کیتی فیر رسول اکرم ﷺ نے دوجی طلب فرمائی میں دوجی پیش کیتی آپ نے ہور طلب فرمائی میں عرض کیتا یا رسول اللہ ﷺ بکری دی دو ای بونگاں (دستیاں) ہوندیاں نیں، آپ نے فرمایا اوس ذات دی قسم جس دے قبضہ قدرت وچ میری جان اے جے تو چپ رہندا تے میں جدوں تیکر منگدا رہندا ایس دیگچی وچوں بونگاں نکلدیاں رہندیاں، محدثین فرماندے نیں کہ رسول اللہ ﷺ دا معجزہ سی۔ حضرت عائشہؓ فرماندیاں نیں کہ بونگ دا گوشت رسول اکرم ﷺ نوں صرف کسے لذت دی وجہ نال پسند نہیں سی بلکہ گوشت کدی کدی پکدا سی تے ایہہ گوشت جلدی گل جاندا سی ایس لئی رسول اکرم ﷺ ایہنوں پسند فرماندے سن تاکہ جلدی فارغ ہو کے اپنے مشاغل وچ مصروف ہو جائیے۔ حضرت عبداللہ بن جعفرؓ کہندے نیں کہ رسول اللہ ﷺ نے فرمایا پشت دا گوشت بہترین گوشت اے۔
حضرت سلمیٰؓ فرماندیاں نیں کہ حضرت حسنؓ تے عبداللہ بن عباسؓ تے عبداللہ بن جعفرؓ ایہناں دے کول تشریف لیائے تے ایہہ فرمایا کہ حضور ﷺ نوں جیہڑا کھانا پسند سی تے ایہنوں رغبت نال تناول فرماندے سن اوہ سانوں پکا کے کھوائو۔ حضرت سلمیٰؓ نے فرمایا پیارے بچو! ہن اوہ کھانا تہانوں پسند نہیں آئے گا (محدثین نے ایس جملے دا مطلب ایہہ لکھیا اے کہ آئندہ ذکر کیتا جان والا کھانا ظاہر اے تنگی دی حالت ای وچ چنگا لگدا اے) اوہناں نے فرمایا، نہیں ضرور پسند آئے گا چنانچہ اوہ اُٹھیاں تے تھوڑے جہے جو ہانڈی وچ پائے تے ایس اُتے ذرا جہیا زیتون دا تیل پایا تے کجھ مرچاں تے زیرہ وغیرہ مسالا پایا تے پکا کے لیا کے رکھ دتا تے فرمایا کہ ایہہ کہ آپ ﷺ نوں پسند سی۔ حضرت یوسفؓ فرماندے نیں کہ میں رسول ﷺ نوں اک وار ویکھیا کہ آپ ؐ نے اک روٹی دا ٹوٹا لے کے ایس اُتے اک کھجور رکھی تے فرمایا کہ ایہہ ایس دا سالن اے تے تناول فرمایا۔ ایہناں ساری روایات توں پتہ چلدا اے کہ آپ ﷺ دا کھانا عموماً سادہ ہوندا تے حالات دے مطابق جو وی میسر آندا تناول فرما لیندے۔