رہائش گاہ توں آخری آرام گاہ تیکر۔۔۔مہان کرکٹر عبدالقادر

عبدالقادر نے 1977وچ انگلینڈ دے خلاف ٹیسٹ میچ توں کیریئر دا آغاز کیتا تے حیدر آباد وچ صرف اپنے دُوجے میچ وچ چھ وکٹاں حاصل کیتیاں

مرزا عثمان بیگ

تیری تربت ہے زیارت گاہ ارباب اہل جم
مشعل راہ ہے تیرا ہر اک نقش قدم
اُنج تے پاکستان دا قومی کھیڈ ہاکی اے پر عوام وچ زیادہ مقبول کرکٹ ای اے۔ پاکستانی عوام کرکٹ میچ شوق نال ویکھدی اے بلکہ نہ صرف ویکھدی ، آپ وی کھیڈ دی اے شاید ای کوئی بندا ہوئے جس نے کدی کرکٹ نہ کھیڈی ہوئے یا نہ ویکھی ہوئے۔ ایس ویلے ساڈے ملک وچ گرائونڈز دی کمی اے پر ایس دے باوجود اتوار یا چھٹی دے دیہاڑ تہانوں ہر گلی محلے وچ نہ صرف بچے بلکہ وڈے وی کرکٹ کھیڈدے نظر آن گے۔ پاکستان قومی کرکٹ ٹیم دے زیادہ تر کھلاڑیاں دی زندگی اُتے نظر پائی جائے تے تقریباً ہر کھلاڑی نے اپنے کیریئر دا آغاز گلی محلے توں ای کیتا انج دی ای اک شخصیت دا ذکر اج میں کراں گا۔ حال ای وچ ایہناں دا ناں ہال آف فیم وچ شامل کیتا گیا اے۔ قدافی اسٹیڈیم دا گیٹ نمبر چار وی ایہناں ای دے ناں نال منسوب اے۔ پاکستان دی کرکٹ تاریخ وچ ایہناں دا ناں ہمیشہ زندہ رہوے گا۔ دانش کنیریا توں پہلے 15 سال توں زیادہ عرصہ تیکر پاکستان دے کامیاب سپنر دے طور اُتے جانے جاندے رہے۔ جی ہاں اج دی شخصیت پاکستانی لیگ اسپنر عبدالقادر نیں۔
عبدالقادر دے آبائواجداد دا تعلق خیبر پختونخواہ نال سی۔ آپ دے آبائو اجداد آپ دی پیدائش توں پہلے لہور دے علاقے دھرمپورہ وچ منتقل ہو چکے سن آپ دے دادا دا ناں سید ابراہیم تے والد دا ناں حافظ سید قدیم سی۔ آپ 15 ستمبر 1955 نوں لہور دے علاقے دھرمپورہ وچ پیدا ہوئے۔ آپ 3 بھائی تے اک بھین سن۔ آپ دے بھائی علی بہادر وی فرسٹ کلاس کرکٹ کھیڈ دے رہے۔ آپ دے والد حافظ سید قدیم دھرم پورے دے علاقے وچ اک مسجد دے امام سن آپ دے والد نماز دے علاوہ علاقے دے بالاں نوں قرآن پاک وی پڑھاندے سن۔ آپ دے گھر دا ماحول دینی سی۔ آپ نے ابتدائی تعلیم عارف ہائی سکول توں حاصل کیتی تے فیر گورنمنٹ کالج لہور توں تعلیم مکمل کیتی۔ عبدالقادر اپنے منفرد ایکشن تے سٹائل دی وجہ نال پوری دنیا وچ مشہور ہوئے۔ انسان دی لگن سچی ہوئے تے محنت دے بل بوتے اُتے پوری دنیا اُتے فتح حاصل کر سکدا اے عبدالقادر اپنی محنت تے لگن نال پوری دنیا وچ جانے تے پہچانے گئے۔ عبدالقادر نوں گیند اُتے مکمل کنٹرول حاصل سی۔ اوہناں نے لیگ سپین بولنگ دے فن نوں عروج بخشیا۔ عبدالقادر نوں کرکٹ نال بے انتہا لگائو سی اپنی زندگی دے آخری لمحات تیکر اوہناں نے کرکٹ نوں اوڑھنا بچھونا بنا ئے رکھیا ۔اوہناں نے عبدالقادر انٹرنیشنل اکیڈمی وی بنا رکھی سی جیہڑی ایس ویلے ایہناں دے پتر سلمان قادر چلا رہے نیں اوہ پوری دنیا وچ لیگ اسپنر دے طور تے جانے جاندے نیں۔
عبدالقادر دے چار پتر عثمان قادر، سلمان قادر، عمران قادر، رحمان قادر تے اک دھی نور آمنہ اے۔ پاکستان کرکٹ ٹیم دے وکٹ کیپر عمر اکمل آپ دے داماد نیں۔ آپ دے تن پتر فرسٹ کلاس کرکٹ تے اک پتر عثمان قادر پاکستان کرکٹ ٹیم وچ شامل اے۔
عبدالقادر نے 1977وچ انگلینڈ دے خلاف ٹیسٹ میچ توں کیریئر دا آغاز کیتا تے حیدر آباد وچ صرف اپنے دُوجے میچ وچ چھ وکٹاں حاصل کیتیاں۔ اوہناں نے لہور وچ کھیڈے گئے اک میچ وچ 56 سکور دے عوض 9 وکٹاں حاصل کیتیاں۔ عبدالقادر نے کل 67 ٹیسٹ میچ کھیڈے جنہاں وچ اوہناں نے 236 وکٹاں حاصل کیتیاں۔ 15 وار اک اننگز وچ پنج وکٹاں تے پنج وار اک میچ وچ 10وکٹاں، تے 1029 سکور بنائے۔ اوہ ون ڈے کرکٹ وچ انتہائی کار آمد ثابت ہوندے سن اوہناں نے اپنے کیریئر وچ 104 ون ڈے میچ کھیڈے جنہاں وچ 132 وکٹاں حاصل کیتیاں تے 641 سکور بنائے۔ 1975 توں 1995 تیکر 209 فرسٹ کلاس میچ کھیڈے جس وچ 960 وکٹاں حاصل کیتیاں تے 3740 سکور بنائے۔
عبدالقادر دے یادگار بولنگ سپیلز جس وچوں اک فیصل آباد ٹیسٹ 1986 وچ ویسٹ انڈیز دے خلاف شامل سی۔ اوہناں نے ایس میچ وچ دیورچرڈز دی ٹیم نوں 53 سکور اُتے آئوٹ کر کے پاکستان نوں 186 سکور توں فتح دلوائی۔
عبدالقادر 1983 تے 1987 دے ورلڈ کپ وچ وی نمایاں رہے اوہناں نے 9 میچاں وچ 24 وکٹاں حاصل کیتیاں جنہاں وچ سری لنکا دے خلاف ہیڈ نگلے وچ 44 سکور دے کے پنج وکٹاں حاصل کرنا وی شامل سی۔
1988وچ عبدالقادر نوں پرائیڈ آف پرفارمنس ایوارڈ ملیا جد کہ 2020 وچ ستارہ امتیاز نال نوازیا گیا۔ ایس دے علاوہ بے شمار قومی تے بین الاقوامی ایوارڈز نال نوازیا جاندا رہیا۔ آپ دی کرکٹ دی خدمات نوں ویکھدے ہوئے قدافی اسٹیڈیم دے گیٹ نمبر 4 دا ناں آپ دے ناں اُتے رکھیا گیا۔ ایس دے علاوہ آپ پاکستان کرکٹ بورڈ دے چیف سلیکٹر وی رہے تے کجھ عرصہ قومی کرکٹ ٹیم دی قیادت وی کیتی۔
16اکتوبر 2021 وچ سابق کپتان فضل محمود تے عبدالقادر نوں پی سی دے ہال آف فیم وچ شامل کر لیا گیا ایس توں پہلے حنیف محمد، عمران خان، جاوید میانداد، وسیم اکرم، وقار یونس تے ظہیر عباس آئی سی سی ہال آف فیمز دی حیثیت نال پی سی بی دے ہال آف فیم وچ شامل سن۔
عبدالقادر بچپن توں لے کے اپنی وفات 6 ستمبر 2019 تیکر اپنے علاقے دھرمپورہ وچ ای رہے آپ دا گھر انفینٹری روڈ اُتے یوٹیلٹی سٹور دے نال اے۔ آپ دی آخری آرام گاہ میاں میر دربار دی بیک سائیڈ اُتے اپنے خاندان دے احاطے وچ اے ایس احاطے وچ آپ دے والدین دی قبراں وی موجود نیں ایسے قبرستان دی دُوجی سائیڈ اُتے موجودہ وزیراعظم پاکستان عمران خان دی والدہ تے باقی خاندان دی آخری آرام گاہواں واقع نیں۔