ہینس
خالدحسین تھتھال
ہینس تے سوچاں سانجھاں وچ وی
ہو جاندے نیں
پھٹ نظر نہیں آؤندے
لہو وگدا نہیں دِسدا
رپٹ درج نہیں ہوندی
کوئی بھرت بھرن نہیں ہوندی
کوئی واویلا نہیں مچدا
پر اندر دی دنیا دے
سدھراں نال اُسارے
سارے محل منارے
کنب جاندے نیں
دیہی نوں پے تریڑاں جاون
سوچاں دے فیرکوٹ کلاوے
اوہ رونق اوہ سماں نہ آوے
سہنسا جیہا اک اپنے ای کاٹھ دے
اپنے اُپر آڈِگن دا
پر سوچاں دے آس انگارے
ڈھیری مُول نہ ڈھاون دیندے
نویںسروں فیر نویں ارادے
نویاں سدھراں نویاں سانجھاں
نویاں نینہاں رکھ لیندے نیں
