منی بجٹ عوام دی کمر وچ خنجر مارن دے مترادف اے،شہبازشریف

لہور( پنجابی میڈیا) پاکستان مسلم لیگ(ن)دے صدر شہباز شریف ہوراں آکھیاکہ منی بجٹ عوام دی کمر وچ خنجر مارن دے مترادف اے لیکن ایس دا ڈٹ کے مقابلہ کراں گے۔پاکستان مسلم لیگ(ن)دے صدر تے قائد حزب اختلاف شہبازشریف نے اپنے بیان وچ آکھیاکہ3ورھے وچ پی ٹی آئی نے ملک دا اوہ کباڑا نہیں کیا جیہڑا منی بجٹ نال ہوجائے گا،منی بجٹ پاکستان تے عوام دی کمر وچ خنجر مارن دے مترادف اے،ڈٹ کے مقابلہ کراں گے،باضمیر حکومتی ارکان تے اتحادیاں نوں فیر کہندا واں کہ منی بجٹ زہردا پیالہ اے،ایس توںدور رہن۔اوہناں نے آکھیا کہ منی بجٹ نال پاکستان دی معیشت باہر دے ملکاں دے سہارے دی مرہون منت ہوکر رہ جائے گی،ایہ قدم پاکستان دی معاشی خودمختاری،جوہری تے کشمیر ورگے نازک قومی مفاداں لئی زہرقاتل ثابت ہوئے گا،منی بجٹ نال معیشت تے عوام دا گلا کٹن دی بجائے10ورھیاں دی پائیدار معاشی حکمت عملی درکار اے۔مسلم لیگ(ن)دے صدر نے آکھیا کہ پاکستان نوں درپیش مسائل دی دلدل توں کڈن لئی10ورھیاں دی پالیسی تیار کرنا ہوئے گی،ایس 10ورھیاں دی معاشی پالیسی اُتے تسلسل نال کم کرکے ہی موجودہ معاشی دلدل توں نکلن دی راہ پیدا ہوسکدی اے۔