شاعراں تے ادیباں لئی (اپنا گھر) دی تحریک دا آغاز

پاکستان بھر وچ اہل قلم مستحق بندیاں لئی سرکاری سطح اُتے وظائف جاری کیتے جان، آصف سردار آرائیں

رپورٹ: آفاق بٹ

عالمی سخنور فائونڈیشن دے چیئر مین محمد آصف سردار آرائیں نے ایوارڈ تقریب توں پہلاں میڈیا نال گل بات کردے ہوئے حکومت وقت نال مطالبہ کیتا اے کہ اہل قلم نوں پاکستان بھر وچ ’’اپنا گھر‘‘ دتا جائے جس لئی ایہناں دی تنظیم نے ملک بھر وچ تحریک دا آغاز کر دتا اے ایس سلسلے وچ اک ریلی دا اہتمام وی کیتا گیا سی اوہناں نے کہیا کہ ملک بھر وچ مستحق اہل قلم نوں سرکاری سطح اُتے وظائف وی جاری کیتے جان کیوں جے اہل قلم ساڈے ملک دا ادبی اثاثہ نیں ایہہ معاشرے نوں سنوارن لئی اپنے قلم نال جہاد کردے نیں تے عام لوکاں وچ شعور نوں اجاگر کردے نیں اوہناں نے کہیا کہ میرا مقصد صرف فیصل آباد دے ای لکھاریاں لئی نہیں بلکہ پاکستان بھر دے اہل قلم نوں جیہڑے کرایے دے مکاناں وچ رہندے نیں یا جنہاں دے گھر بوہت نکے نیں یا جیہڑے پسماندہ علاقیاں وچ رہندے نیں ایہناں نوں حکومت ولوں گھر دتے جان تے ایہناں لئی سرکاری سطح اُتے وظائف جاری کیتے جان میں ایس تحریک نوں لے کے اگے ودھ رہیا واں تے مینوں بوہت زیادہ خوشی ہوئی کہ فیصل آباد دے بوہت وڈے تے اہم ناں جیہڑے ادب دے حوالے نال نیں اوہناں نے ایس سلسلے وچ بھرپور میرا ساتھ دتا اے تے میری آواز دے نال اپنی آواز ملائی اے۔

ایس دے علاوہ میڈیا نے، پریس نے تے وکیلاں نے وی ساڈا بھرپور ساتھ دتا اے، ڈسٹرکٹ بار فیصل آباد دے صدر جناب اختر بیگ ، سیکرٹری جنرل اعجاز ہوراں نے وی میر آواز دے نال آواز ملائی اے تے ساڈی تحریک وچ شامل ہون دا ارادہ کیتا تے ایہہ وی کہیا اے کہ اسیں ایس نوں اگے ودھاواں گے ایسے طرح سماجی حوالے نال جیہڑی شخصیات نیں جنہاں وچ مسز رخشندہ حسن نیں تے دیگر سارے دوستاں نے بھرپور ساڈا ساتھ دتا اے۔ اوہناں نے میڈیا نال گل بات کردے ہوئے دسیا کہ پاکستان بھر توں مقابلے لئی آئی ہوئی کتاباں لئی ایوارڈ دی تقریب وچ اسیں ایہناں لوکاں نوں لائف اچیوئف منٹ ایوارڈ دتے نیں جنہاں نے ادب لئی بوہت زیادہ کم کیتا اے۔
فیصل آباد توں اسیں ڈاکٹر ریاض احمد ،ظہیر سلیمی ؔ، ریاض احمد پروازؔ، تے مظہر احمد حیدری ؔ ایہناں چار لوکاں نوں تے بہائولنگر توں گل زیب عباسیؔ،تے سب توں زیادہ جیہڑی مینوں خوشی ہوئی کہ اسیں بلوچستان توں جناب محمد ہاشم پروانہ، (جیہڑے ایس ویلے ایس دنیا وچ نہیں رہے ) ’’اللہ پاک ایہناں دی مغفرت فرمائے ‘‘ اوہناںنے اردو تے پشتو زبان تے ادب لئی بڑا کم کیتا اے ایہناں دے پشتو زبان دے شعری مجموعے ’’ پشتینہ سترگی‘‘ نوں ایوارڈ لئی نامزد کیتاتے ایس دے علاوہ بلوچستان ای نال جناب قادر مجرم جنہاں نوں کم دے دوران کرنٹ لگن نال ایہناں دے دونویں بازو ضائع ہو گئے سن اوہ ہن اپنے پیراں نال ای اپنا سارا کم کردے نیں تے پشتو زبان دے شاعر، ادیب، ناول نگار تے افسانہ نگار نیں ایہناں دے ایس ویلے تیکر چار افسانے تے نو ناول شائع ہو چکے نیں جنہاں دی ساری کمپوزننگ اوہناں نے آپ اپنے پیراں نال کیتی اے تے ایس ویلے اوہ کمرشل کمپوزننگ دا کم وی کردے نیں ایہناں نوں بلوچستان توں ساڈے معروف صحافی تے نامور ادیب جناب ڈاکٹر عبدالرشید آزاد نے نامزد کیتا سی ایہناں نوں ایوارڈ ملن اُتے بوہت زیادہ خوشی ہوئی تے ڈاکٹر عبدالرشید آزاد نے ایہناں دے مینوں بار بار خوشی دے پیغامات موصول ہو رہے نیں ایس دے علاوہ بلوچستان وچ پنجابی زبان دی واحد کتاب شاعرہ محترمہ صدف غوری صاحبہ جنہاں دے دو پنجابی شعری مجموعے تے بارہ اردو زبان دے شعری مجموعے شائع ہو چکے نیں تے اوہ بلوچستان دی سب توں زیادہ کثیر الاشاعت شاعرہ ہون دا اعزاز وی رکھدیاں نیں ایہناں دے شعری مجموعے نین جزیرے نوں پاکستان بھر وچ پنجابی وچ اول نمبر قرار دتا گیا اے ایس دے علاوہ بلوچستان توں محمد اکبر نسیم محمد شہی تے ایہناں دے دوست کوئٹہ توں تشریف لیائے ایس دے علاوہ سانگھڑ سندھ توں ڈاکٹر عبدالغفار تے صوبہ پختونخواہ پشاور توں بشریٰ فخر صاحبہ تے سانگلہ ہل توں ڈاکٹر نواز کنول، محمد یعقوب فردوسی، صاحب گوجرانوالہ تے دیگر مقامات توں جنہے وی لوک تشریف لیائے میں ایہناں سب دا بے حد ممنون واں کہ اوہ ملک دے طول و عرض توںاینا لمبا سفر طے کر کے تشریف لیائے تے ساڈی تنظیم عالمی سخنور فائونڈیشن دے پروگرام وچ تشریف لیائے تے خصوصاً ساڈی ریلی وچ وی شریک ہوئے کیوں جے ساڈا مقصد سی کہ ساڈے شعراء تے ادباء لئی مکان، پلاٹ تے وظیفے جا ری کیتے جان، اسیں ایہہ اک تحریک چلا رہے آں ساڈی ایس تحریک وچ وی اوہناں نے ساڈا ساتھ دتا اے۔ ایس دے علاوہ میں شاید علی شاید دا وی بے حد ممنون واں کہ اوہناں نے بھر پور طور تے ساڈا ساتھ دتا۔
ایس موقعے اُتے عالمی سخنور فائونڈیشن پاکستان دے مجلس عاملہ دے ممبر جناب ڈاکٹر شبیر احمد قادری نے میڈیا نال گل بات کردے ہوئے کہیا کہ ایہہ بوہت خوشگوار عمل اے کہ عالمی سخنور فائونڈیشن پاکستان بھر وچ ادب نال جڑے شعراء تے ادبا نوں ایہناں دی اعلیٰ خدمات لئی لائف اچیوئف منٹ ایوارڈ تے حسن کارکردگی ایوارڈ تقسیم کر رہی اے میں پاکستان دے چارے صوبیاں دے مقتدر لکھاریاں نوں تے خصوصاً تقریب وچ آئے ہوئے سارے اہل قلم نوں دلی مبارکباد پیش کرنا واں ایہہ بڑا مستحسن عمل اے میں سمجھنا واں کہ ایہہ فیصل آباد وچ اک اہم تقریب دے طور تے یاد رکھیا جائے گا ۔ اج جیہڑے عالمی سخنور فائونڈیشن دے چیئر مین محمد آصف سردار آرائیں نے حکومت وقت نال مطالبات کیتے نیں کہ اہل قلم نوں جیہڑے مستحق نیں ایہناں نوں سرکاری طور تے پلاٹ تے مکان الاٹ کیتے جان تے مستحق لوکاں لئی جنہاں دے ذرائع آمدنی محدود نیں، ایہناں نوں سرکاری سطح اُتے وظیفے وی دتے جان تے اج دے ایس گرانی دے دور دے مطابق ایہناں نوں سہولتاں مہیا کیتیاں جان ایہناں نوں الاٹمنٹ دتی جائے تاکہ اوہ وی معاشرے دے دیگر لوکاں وانگوں باعزت طور تے پُروقار زندگی لنگھا سکن تے ایہناں دی صلاحیتاں نوں اجاگر کرن دا موقع ملے۔

ایس موقعے اُتے ڈسٹرکٹ بار کونسل فیصل آباد دے صدر جناب چوہدری اختر بیگ نے وی میڈیا نال گل بات کیتی تے کہیا کہ اج ڈسٹرکٹ بار کونسل کیانی ہال وچ منعقدہ اک ادبی تقریب تے مشاعرے دا وی اہتمام کیتا گیا سی تے ایس دے آخر وچ جہے وی ادیب تے شعراء ملک دے چارے صوبیاں توں آئے ہوئے سن ایہناں نوں حسن کارکردگی اُتے ایوارڈ ونڈے گئے میں ایہناں سارے اہل قلم نوں دلی مبارکباد پیش کرنا واں تے اوہناں نے جیہڑا حکومت وقت نال مطالبہ کیتا اے کہ شعراء و ادباء نوں ملک بھر وچ پلاٹ الاٹ کیتے جان تے مستحقین نوں سرکاری سطح اُتے وظیفے جاری کیتے جان ایہناں دی مکمل حمایت کرنا واں۔