تحریک انصاف ہور قوت دے نال کدوں ابھرے گی؟
ازقلم : رقیہ غزل
حالیہ انتخابی نتیجے نے پی ٹی آئی دے مستقبل دا واضح تعین کردتا اے تے ایہ گل ثابت ہو گئی اے کہ حکمران جماعت اپنی رابطہ کاری نال غفلت‘ لاپرواہی تے عوامی مسائل نال لاتعلقی ورتن دی بدولت مقبولیت چکی اے۔عام آدمی تبدیلی وعدیاں توں متنفر ہو چکیا اے تے ایہناں سوچ لیتا اے کہ ’’نہیں ہے میرے مقدر میں روشنی نہ سہی…یہ کھڑکی کھولو ذرا صبح کی ہوا ہی لگے‘‘ ایہ چھوٹی گل نہیں کہ خیبر پختوانخواہ جہڑا تبدیلی سرکار دا گڈھ منیا جاندا اے اوتھوں پی ٹی آئی دا خاتمہ لمحہ فکریہ اے لیکن حیرت تے ایس گل تے اے کہ وزیر تے مشیر بچگانہ بیانیاں توں دفاع کر رہے نیں تے جے بوہتا کریدیا جاوے تے تکبرانہ ڈائیلاگ بازی دا سہارا لیندے نیں اوہ بھلا چکے نیں کہ ’’جو شاخ تنے کی نفی کر دے…اس شاخ پر کیا گلاب آئے‘‘۔ لیکن اس اطمینان دے کیہ کہنے۔ ترجمان آکھ رہے نیں کہ جتن والی جماعت ات گرد اے جد کہ اسیں تے مسیحا سن تدے باشعور کہن تے مجبور نیں ’’آپ نے صرف مسیحائی کی…درد کیوں حد سے گزرتا ہی گیا‘‘۔
2021اپنے اختتام ول ودھ رہیا اے۔ جے غیر جانبداری توں پچھلے ورھیاں دا جائزہ لیے تے ساڈے اتے عیاں ہوندا اے کہ کجھ وی نہیں بدلیا۔ البتہ جو موجود سی اوہ وی جاندا ہویا نظر آ رہیا اے تے ایہ اسیں نہیں کہہ رہے بلکہ پی ٹی آئی دے چاہن والے لکھ رہے نیں کہ مافیاز دھندنادے پھر رہے نیں کہ اک عجب لٹ مار مچی اے جہدے وچ عام آدمی دی جمع پونجی خرچ ہو چکی اے مگر فریاد کوئی نہیں سندا بلکہ پہلے جو گھر گھر جا کے ووٹ منگدے سن اوہو پی ٹی آئی کارکن تے بہی خواہ ایہو ڈھونڈورا پیٹڈ نظر آندے نیں کہ اوہناں دی سنی نہیں جا رہی بلکہ نظریاتی کارکناں دا تے اہم تھاواں اتے داخلہ بند ہوئے 30ورھے لنگھ چکے نیںتے احتجاج وی نہیں کرن دتا گیا۔ ایس لئی تبدیلی سرکار اتے آمریت نما جمہوریت دی چھاپ لگ چکی اے جہدا مظاہرہ ہر احتجاج مگروں ویکھن نوں ملدا اے کہ کوئی نہ کوئی لاشہ ڈگدا اے مگر عام آدمی نوں حاصل حصول کجھ نہیں ہوندا۔ عوامی رائے ایہو اے کہ سارے اعلیٰ تے حکومتی عہدے دار جہناں نوں دلکش تے اعلیٰ عہدے بخش دتے گئے نیں اوہ اپنے موج میلیاں وچ لگے نیں تے اوہناں دا کم صرف تے صرف ٹی وی ٹاک شوز وچ بیانات داغنا تے عوامی اجتماعات تے تقریباں دے رونقاں نال دل بہلانا رہ گیا اے۔ ایس توں ایہو پتہ چلدا اے کہ یا تے ایہناں وچ مطلوبہ صلاحیتاں تے اہلیتاں دا فقدان اے یا فیر اوہ ہر ویلے غیر سنجیدہ رہ کے اپنے الٹے کم سدھے کردے رہندے نیں تے سرکاری ذرائع تے اختیارات توں ذاتی نفع بخشیاں وچ لگے رہندے نیں کیوں جے منصوبیاں وچ تے بھنگ دی کامیاب کاشت دے علاوہ کوئی قابل ذکر منصوبہ نظر نہیں آیا تے اگلے پنج ورھیاں وچ بہتری وکھان دا لالی پاپ پھڑایا جا رہیا اے۔ حالاں جے ہن بیانیاں دا نہیں کجھ کر وکھان دا ویلا سی کیوں جے مولانا یا دوجی کوئی جماعت وی جتے ایس توں صاف ظاہر اے کہ کپتان‘ حکومتی عہدے داران تے بیوروکریسی دی لاپرواہی تے زیادتیاں نے عوام نوں انتقامی طور تے انج کرن تے مجبور کیتا اے وگرنہ نکام تے باغی آزمائی ہوئی جماعتاں نوں کون ووٹ دیندا اے جد کہ ایہ علم ہووے کہ کرنا تے اوہناں نے وی کجھ نہیں بس اوہناں دے عہدے تے مراعات بحال ہو جان گئیاں کیوں جے کیہڑا ایسا محکمہ اے جہدے وچ شفاف بنیاداں اتے معاملات ہوندے نیں بلکہ تبدیلی سرکار دے دور وچ تے ایسی چھوٹ ملی اے کہ جو سندے سی ہن غراندے نیںیعنی ریاستی رٹ اپنی حیثیت گوا چکی اے حالاں جے سوشل میڈیا اک طاقتور میڈیم سی مگر ہن سچ تے جھوٹ نوں الجھا کے گمراہی پھیلا رہیا اے تے ساری سیاسی جماعتاں ایکٹو نیں۔ ایہناں حالات وچ خان صاحب نے آکھیا اے کہ تحریک انصاف ہور قوت دے نال ابھرے گی! سوال ایہ اے کہ ہن کہڑی گیدڑسنگی اوہناں دے ہتھ لگ گئی اے کہ جہڑے آپ ہتھیلی اتے سرسوں جمان گے۔ تنظیماں تورن نال وی کجھ فرق نہیں پین والا کہ ویلا قیامت دی چال چل چکیا۔ تسیں اپنے وفادار‘ اہلیت رکھن والے تے حق دار کارکناں نے وی بہت زیادتی کیتی اے کہ اقتدار ملدے ای اوہناں دی خدمات نوں بھلا کے طاقتوراں تے سرمایہ دار موقع پرستاں نوں نوازیا جہدی وجہ نال نظریاتی کارکن تے عوام دا بھروسہ ختم ہویا فیر کوئی ایسا نظر نہیں آندا جہڑاکہ عوامی فلاح بہبود دے کماں وچ سرگرم عمل ہووے۔ البتہ اک دوجے دی تضحیک دا کوئی موقع نہیں جان دیندے تے جہڑا ویلا بچدا اے اوہنوں اٹکل پچو تشہیری کوششاں وچ گزاردے نیں۔ بدنامی تے نکامی دی ایس توں ودھ کے گل کیہ ہو سکدی اے کہ شنید اے آئندہ انتخابات وچ اک سزا یافتہ تے ملک توں فرار ہون والا شخص وزارت عظمیٰ دا فیصلہ کرے گا جد کہ جہڑا ایس وزارت اتے براجمان اے اوہ ہر طرحاں نال نکام اے حالاں جے ن لیگ بلاوجہ ای ٹھان چکی اے کہ وزارت عظمیٰ دی سیٹ اوہ جتن گے تے میاں شہباز شریف یا مریم نواز نوں عہدے لئی چنیا جاوے گا۔
بہرحال ایہ سال وی سسکیاں‘ آہواں‘ دکھاں‘ تکلیفاں‘ پریشانیاں‘ اقربا پروری‘ میرٹ دا قتل‘ سفارش تے رشوت دی آلودہ فضاواں نال لڑدے گزر گیا۔ حکومتی کارکردگی تے ہر طرحاں دے عوامی تحفظات رہے تے اپوزیشن نے سوائے ڈس انفارمیشن دے کوئی کارکردگی نہیں وکھائی۔ دعا اے کہا گلا آن والا سال پاکستان لئی ہر لحاظ نال بہتر ہووے کیوں جے اگر پاکستان ترقی کرے گا تے عوام خوشحال ہون گے جتھوں تک ہو سکیا اسیں تعمیر وطن لئی جہڑا وی کڑوا سچ آکھنا پیا آکھیا تے حق گوئی تے بے باکی نوں اپنا وطیرہ بنائے رکھیا۔ کدی ذاتی یا تخریبی سوچتوں کوئی منفی‘ تخریبی تحریر نہیں لکھی۔ انشااللہ آن والے سال وچ وی میانہ روی‘ اعتدال تے حق و انصاف نال کم لیندے ہوئے صحافتی اوراق نوں خدمت وطن دے مقدس مشن وچ استعمال کراں گے تاں جے اسلامی فلاحی ریاست دی ترقی تے خوشحالی لئی قنون و انصاف‘ اسلامی تعلیمات تے انسانی فلاح و بہبود دے پروگراماں دی بامقصد تے معیاری خدمت کر سکن ۔ آخر وچ حکومت لئی ایہ پیغام اے کہ برسراقتدار کوئی وی آ جاوے سانوں ایس توں کوئی لینا دینا نہیں مگر جے حکمران جماعت دے عہدے داران عوامی رابطہ کاری نوں بہتر کرن تے عوام دے خادم بن جان تے ایس توں عوام وی گرویدہ ہو جان گے کہ اپوزیشن جہڑا وی منفی پروپیگنڈے کردی اے فیر اویہنوں قبول نہیں کراں گے تے اپنے ووٹ دا استعمال ذہنی غلام بن کے نہیں بلکہ پاکستان دے آزاد شہری بن کے کراں گے تے انج کرن نال یقینا نتیجے مثبت ہون گے وگرنہ حالیہ نتیجے تے واضح عندیہ دے رہے نیں کہ ’’اب ہوائیں ہی کریں گی روشنی کا فیصلہ…جس دیے میں جان ہوگی وہ دیارہ جائے گا‘‘۔
