جنوبی پنجاب سیکرٹریٹ نوں بااختیار بنایا جاوے یا فیر

سپیشل سیکرٹریز آفس بنا کے عوام نوں ویلے تے ریلیف دا ذریعہ ثابت کیا جاوے

تحریر:غازی احمد حسن کھوکھر

پاکستان تحریک انصاف دے سربراہ نے عام انتخاباں دے دوران پاکستان دے ست کروڑ سرائیکی عوام نال وعدہ کیتا سی کہ پی ٹی آئی حکومت قائم ہون دے 100دن دے اندر اندر سرائیکی صوبہ قائم کردتا جاوے گاجہدی وجہ نال سرائیکی عوام نے پی ٹی آئی نوں حقیقی سرائیکی تے مضبوط پلیٹ فارم سمجھدیاں ہوئیاں بھرواں اعتماد کر کے 2018دے انتخاباں وچ کامیاب کیتا تے عمران خان وزیراعظم منتخب ہوئے تے سرائیکی پسماندہ علاقہ تونسہ شریف توں وزیراعلیٰ پنجاب سردار عثمان بزدار دا چنیا کیتا گیا۔ ویسے تے وزیراعظم عمران خان نے اپنے ہر انتخابی تے احتجاجی نعریاں‘ دعوویاں تے وعدیاں دی نفی ای کیتی اے ایس دوں علاوہ بجلی‘ گیس‘ پٹرولیم مصنوعات سنے ہر اشیا ضرورت تے ہر اشیا خوردونوش دی قیمتاں وچ وادھا کر کے ہوشربا مہنگائی مسلط کر دتی اے۔ آئی ایم ایف سنے بیرونی قرضے لیتے گئے۔ ہن پاکستان دے قیمتی تے قومی ادارے گروی رکھے جا رہے نیں۔ وسیع و عریض زمیناں بیرونی کمپنیاں نوں لیز اتے دتی جا رہیاں نیں۔ جہدے توں قومی ادارے تے قومی املاک دنیا دے مختلف ملکاں دی ملکیت بن جان گئیاں۔جتھوں تک 100دناں وچ سرائیکی صوبے دے قیام دا اعلان سی‘ ایہدے لئی اجے ست کروڑ توں ودھ سرائیکی عوام شدت نال منتظر نیں۔ عوامی مطالبہ جدوں اضطرابی شکل اختیار کرن لگیا تے جنوبی پنجاب سیکرٹریٹ دتا گیا جہدے وچ ادھا سیکرٹریٹ ملتان تے باقی بہاولپور نوں دتا گیا۔ ایہ عجیب مذاق اے کہ بہاولپور دے عوام ملتان تے ملتان دے عوام بہاولپور جان۔ جہڑا سیکرٹریٹ بنایا گیا اے اوہ محض شو پیس سٹیچو نما اے جہنوں عوام دے مسئلے حل ہونا تے دور دی گل خود سرکاری ادارے وی وقعت نہیں دیتے۔ عوام تے جنوبی پنجاب جہنوں سرائیکی صوبہ سمجھیا جاندا اے دی بیورو کریسی وی دلی طور تے قبول نہیں کردی۔ لہور توں کوئی سرکاری افسر دورے اتے آوے تے شہر بھر وچ یا متعلقہ ادارے دی لش پش خوب ہوندی اے‘ ایہناں روڈاں تے اداریاںتوں جنوبی پنجاب دے ایڈیشنل چیف سیکرٹری‘ ایڈیشنل آئی جی تے مختلف سیکرٹریز صاحبان وی تے گزردے نیں۔ایہناں دی موجودگی نوں سنجیدہ کیوں نہیں لیتاجاندا؟ مقامی سیکرٹریز جے کسی 18ویں گریڈ تک دے افسر دی ٹرانسفر پوسٹنگ کردے نیں تے اوپروں حکم اتے فی الفور منسوخ ہو جاندی اے۔ پچھلے مہینے محکمہ زراعت دے اک افسر دی ٹرانسفر ہوئی جہڑے پیدا ہوندے ای وفات پان والے بچے وانگوں منسوخ ہو گئی تے ایس افسر نے مضحکہ خیز اندا زوچ آکھیا کہ آئندہ جرات وی نہیں کرن گے۔ فیر ہر افسر اپنی ملازمت دے حوالے نال لہور دے سیکرٹریٹ نوں ای مشکل کشا سمجھدیاں ہوئیاں زیارت تے نظرو نیاز دا سلسلہ جاری رکھے ہوئے نیں ویسے وی لہور وچ تشریف فرما سیکرٹری زراعت نیں وی سید بادشاہ تے مکمل طور تے بااختیار تصور کیتے جاندے نیں۔ ایہو حال تقریباً ہر ادارے دے سیکرٹریز دا اے۔ معمولی توں معمولی کم وی لہور توں ہوندے نیں۔ درجہ چہارم دے ملازماں دے مسئلے مسائل وی مقامی افسر لہور دے پروانے ملن تے کردے نیں۔ وڈے سیکرٹری تے چھوٹے سیکرٹری دی ٹرمز استعمال ہوندی اے۔ جنوبی پنجاب دے سارے سیکرٹری صاحبان بھرم قائم کیتے ہوئے نیں۔البتہ مقامی اداریاں دے افسراں دی مرضی تے خواہشاں دے مطابق کوئی آرڈر آ جاوے تے ایہنوں بخوشی قبول کردیاں ہویاں عمل کردے نیں۔ جیویں کسی ذاتی ناپسندیدہ شخص دے خلاف انتقامی کارروائی ہووے۔ حقیقت ایہ اے کہ اوہ بے اختیار نیں۔ مقامی اداریاں دے افسراں دے لاشعور وچ اجے تک طاقت دا سرچشمہ لہور ای اے۔ ہونا تے ایہ چاہیدا اے کہ لہور وی ساڈا ای اے مگر جہڑے مقصد لئی جنوبی پنجاب سیکرٹریٹ قائم کیتا گیا سی اوہ عوام دی سہولت ‘ ویلے‘ وسائل دی بچت سی تے سرکاری اداریاں تک عوامی رسائی آسان بنان دے نال قومی وسائل دی وی بچت سی جہڑے آمدروفت وچ ضائع ہو رہے نیں۔ جتھوں تک اک تھاں سیکرٹریٹ قائم ہون دی گل اے۔ اوہ سرائیکی علاقہ وچ جہڑے اضلاع آندے نیں اوہدے لئی جلال پور پیر والا یا ہیڈ محمد والا وچ وسیع و عریض سرکاری اراضی موجود اے۔ جے وزیراعظم تے وزیراعلیٰ نے ایس پاسے سنجیدگی نال کوئی فیصلہ نہ کتیا تے آئندہ انتخاباں وچ 50لکھ بے گھراں نوں مکان تے دو کروڑ ملازمتاں دین دے وعدے توں ودھ سرائیکی صوبہ بارے وعدہ خلافی نقصان دہ ثابت ہووے گا۔ بعض وچ نہ مانوں ذہنیت دے حامل لوکاں دے خیال وچ سرائیکی صوبہ دے قیام لئی کم کرن والی سیاسی جماعتاں نوں سرائیکی عوام ووٹ نہیں دیندے تے پی ٹی آئی نوں سرائیکی دے نام پر ووٹ کہنے دتے ہون گے؟ سرائیکی پارٹیاں دراصل سرائیکی تنظیماں نیں تے اج تک سرائیکی تحریک ولوں کسی بااثر تے مضبوط امیدوار سامنے ای نہیں آیا۔ سرائیکی عوام سرائیکی دے نام اتے کسی مضبوط امیدوار نوں ای منتخب کردے آ رہے نیں۔ پچھلے انتخابات وچ سرائیکی دے نام تے جدوں مضبوط بااثر لوکاں دا گروپ آیا تے عوام نے بھرواں طریقے نال کامیاب کر دتا۔ پی ٹی آئی نوں ایس پاسے وی غور کرنا چاہیدا اے۔ پچھلے انتخابات وچ پی پی پی دے ووٹراں نے وی پی ٹی آئی امیدواروں نوں ایسے امید تے ووٹ دتے سن تاں جے پنجاب دا جمود و عفریت ٹٹے۔ ہن سرائیکی عوام واپس پی پی پی ول رخکرے گی کیوں جے ہن پنجاب وچ پی پی پی لئی راہواں کھل رہیاں نیں۔ ایس لحاظ نال صادق آباد توں اوکاڑہ تے میانوالی‘ بھکر‘ ڈیرہ غازیخان‘ راجن پور‘ لیہ‘ سرگودھا‘ جھنگ سنے KPK دے ڈیرہ اسماعیل خان سنے متعدد اضلاع وچ پی ٹی آئی دا ووٹ پی پی پی امیدواراں ولوں چلا جاوے گا۔ ایہدا ثبوت لہور تے خانیوال دے ضمنی انتخاباں دے نتیجے نیں جہدے وچ پی ٹی آئی تے ن لیگ دا ووٹ بینک نچلی سطح تک آ کے ادھے توں وی گھٹ جد کہ پی پی پی دا ووٹ ایہناں حلقیاں وچ چار گنا ودھیا اے۔ حالاں جے 1977 مگروں پی پی پی اقتدار پنجاب توں محروم چلی آ رہی اے جد کہ ن لیگ دا پنجاب وچ 40سالہ اقتدار اے تے پی ٹی آئی دا ایس ویلے مکمل اقتدار سوا نیزے اتے اے۔ ایہدے باوجود پی ٹی آئی دا لہور دے ضمنی انتخاباں وچ امیدوار سامنے نہ لیانا تے خانیوال وچ شکست نال دوچار ہونا خطرے دی گھنٹی اے۔ تاحال NABولوں کرپٹ عناصر خصوصاً سیاسی کرپٹ لوکاں دے خلاف تے کجھ نہیں ہویا جد کہ وزیراعظم عمران خان دے خلاف فارن فنڈنگ کیس زوروشور نال سر چک رہیا اے تے مخالفاں دی کوشش اے کہ وزیراعظم نوں ایس کیس دے ذریعے نااہل قرار دوایا جاوے۔ ایہ کتھوں تک سچ اے تے آن والے ویلے وچ وزیراعظم لئی کیہ مشکلات لیا سکدا اے ایہ تے آن والا ویلا ای دسے گا۔ ذرائع توں پتہ چلیا اے کہ پاکستان دے شوگر مافیاز نے جواارباں روپے دی سبسڈی لیتی اے۔ ایہدے وچ شریف خاندان دے حصہ وچ وی 50ارب روپے سبسڈی دی مد وچ موصول ہوئے نیں۔ ذکر شروع ہویا سی جنوبی پنجاب سیکرٹریٹ توں تے ایس ویلے ایہ اپنی ساری کوششاں دے باوجود سیکرٹریٹ دا مقام حاصل نہیں کر سکیا۔ ضروری اے کہ ایس سیکرٹریٹ نوں مکمل بااختیار بنایا جاوے تے ایہدی ضروریات تے معیار دے مطابق فنڈز مہیا کیتے جان۔ مستقل پی ایس ٹی کورٹس قائم کیتیاں جان۔ لہور ہائی کورٹ وانگوں ہائی کورٹ تے سپریم کورٹ دی رجسٹری برانچاں قائم کیتیاں جان۔ دو سیکرٹریٹ دی بجائے مکمل اک سیکرٹریٹ بنایا جاوے۔ بااختیار جے بہاولپور تے ملتان وچ وکھرے وکھرے سیکرٹریٹ بنانا چاہنے آں تے راجن پور‘ علی پور یا بہاولپور دے تحصیلاں نوں اضلاع بنا کے صوبائی حثیت دے کے بنایے لیکن ایس طرحاںنہیں کہ بہاولپور دے عوام کجھ اداریاں کولوں کم کاج لئی ملتان آئے تے ملتان دے عوام بہاولپورجان۔ ایہ بچگانہ تے غیر سنجیدہ غیر منطقی گل اے۔ جے حکومت نے ایسا بروقت نہ کیتا تے انتخاباں وچ موجودہ وڈے وڈے خودساختہ قسم دے وزیر‘ ممبران اسمبلی تے پی ٹی آئی چھڈ کے کسی ہور جماعتاں دا حصہ بن ای چکے ہون گے تے اپنی انتخابی مہم وچ عمران خان نوں بار بار سرائیکی صوبہ دے مقام اتے زور دین دے دعوے کر رہے ہون گے کہ ساڈی اک نہیں سنی جاندی سی۔ اسیں پی ٹی آئی وی اخیر تک ایسے لئی نہیں چھڈی سی کہ شاید ساڈی تجویزاں اتے سرائیکی صوبہ یا جنوبی پنجاب صوبہ بن جاوے۔ دوجے پاسے عوام عمران خان تے اوہناں دے نویں آن والے نومولود امیدواراں دی وی اک نہیں سنن گے ایس لئی ہن وی ویلا اے کجھ کر لیے۔