ملکی معیشت تے نوازشریف

حناپرویزبٹ

جہڑا بندہ مخلوق خدا لئی وسیلہ روزگار بن دا اے ہر دن سیاسی‘ سماجی تے اقتصادی حلقیاں وچ اپنے مذاق دا پربندھ نہیں کردا‘ انساناں دا مالی‘ نفسیاتی تے سماجی استحصال نہیں کردا‘ سہانے خواب وکھا کے اللہ دی مخلوق دی نینداں حرام نہیں کردا۔ غریباں توں اپنا گھر بنان دی سکت نہیں کھوہندا اوہو اللہ دے پسندیدہ ترین بندیاں دی فہرست وچ سب توں اُتے ہوندا اے۔
ایس پیرائے وچ ویکھیا جاوے تے حکومت کارکردگی دے ک تک وی نہیں اپڑ سکی پچھلے چار ورھیاں وچ کوئی لمحہ ایسا نہیں آیا جو لوکاں لئی سکون آور ثابت ہویا ہووے۔ مبینہ کرپشن دے الزامات لا کے مخالفین نوں جیلاں دی ہوا کھوائی گئی میاں نوازشریف دی شخصیت نوں داغدار کیتا گیا اوہناں دے خلاف کرپشن دا محاذ گرم رکھن لئی ہر ذریعہ ابلاغ استعمال کیتا گیا نیب نے تے شریف خاندان توں مبینہ کرپشن دی رقم کڈھوا کے خزانے وچ جمع کروانی سی پر اوہنے براڈشیٹ نوں بھاری رقم جد کہ براڈشیٹ نے نوازشریف نوں ہرجانے دی رقم ادا کرکے مضحکہ خیز صورتحال پیدا کر دتی ایہدے باوجود خوشامدی پراپیگنڈا دے لایعنی ڈھول وجا رہے نیں میاں نوازشریف دے منصوبیاں تے اپنیاں تختیاں لان نال وی گل نہیں بنی تے رونا دھونا سگوں وَین پانا شروع کر دتا کہ میاں نوازشریف نے جے واپس آنا اے تے ساریاں جیلاں کھول دتیاں لوک کھلا ڈلھا کہہ رہے نیں کہ جدوں جعلسازی کر کے کسے نوں صادق و امین ٹھہرایا جا سکدا اے تے اقامہ تے دتی جان والی جعلی نااہلی دا حکم کالعدم قرار کیوں نہیں پا سکدا؟۔
آخر کیوں کہیا جا رہیا اے کہ میاں نوازشریف وطن واپس آن گے تے ملک فیر ترقی دی راہ تے ٹر پوے گا کجھ کاروباری ٹائیکونز دا مننا اے کہ جدوں وی میاں نوازشریف اقتدار سانبھدے رہے تے ملکی تے غیرملکی سرمایہ کاراں وچ اطمینان دی لہر دوڑ جاندی۔ سرمایہ کاراں نوں یقین اے کہ جے میاں نوازشریف اک واری فیر وطن واپس آندے نیں تے کاروبار نوں استحکام ملے گا بلیک میل نہیں کیتا جاوے گا۔ نیب ایویں ای نہیں بلا سکے گا۔ کاروباری تھاواں تے بلاوجہ چھاپے نہیں مارے جان گے حکومت آئی ایم ایف توں ارب ڈالر لین لئی 356 ارب دے ٹیکس نہیں لاوے گی کوئی 350 ارب روپیے دے منی بجٹ پیش کرکے ایہ اذیت ناک بیان نہیں دیوے گا کہ ایہدے نال لوکاں تے صرف دو ارب دا بھار پوے گا جھوٹے اعدادوشمار توں گمراہ نہیں کیتا جاوے گا کوئی ڈالر کھلا چھڈ کے ترقی دے جھوٹے خواباں دا پرچار نہیں کرے گا کوئی غلط منصوبہ بندی کرکے ایندھن دی قلت دا کارن نہیں بنے گا کوئی 17 یونٹاں دا بل 2192 روپیے نہیں گھلے گا۔ ملک وچ کاروباری سرگرمیاں تنزلی جد کہ منشیات دا کاروبار عروج تے نہیں ہووے گا ٹی وی‘ ریڈیو‘ اخبار تے سوشل میڈیا تے ہر پاسیوں مایوس کن خبراں نہیں آن گئیاں۔ گھرانے مہنگائی دے وار نال نہیں ٹُٹن گے کوئی عورت 30 ہزار بجلی دا بل آن تے خودکشی نہیں کرے گی کوئی روزگار نہ ملن تے ڈاکے نہیں مارے گا مہنگائی نال بلبلا کے کوئی بچے ویچن لئی پیش نہیں کرے گا کوئی حوا دی دھی اپنی عزت دی قیمت تے نوکری حاصل نہیں کرنا چاہوے گی سٹاک ایکسچینج دے اُتے جان دا تے سادہ جیہا فارمولا اے کہ ملک وچ سیاسی استحکام ہووے‘ کاروباری سرگرمیاں بناں افراتفری چل رہیاں ہون‘ بجلی، گیس‘ پٹرولیم مصنوعات دیاں قیمتاں تے شرح سود وچ ظالمانہ وادھا نہ ہو رہیا ہووے۔
اوہ جہڑے ہر روز پچھدے سن میاں نوازشریف دوائی لے کے کدوں آن گے؟ اوہناں گدڑاں دی ست سمندر پار بیٹھے شیر دی آمد دی خبر سن کے ای چیکاں ستویں اسمان تک جا رہیاں نیں سوچو جدوں شیر دھاڑے گا تے اوہناں گدڑاں دا کیہ حال ہووے گا۔ دیار غیر وچ رہ کے وی اوہ پاکستانی سیاست دا بے تاج بادشاہ اے۔ اوہدی چائے پیندے‘ واک کردے وی فوٹو اپ لوڈ ہو جاوے تے ہلچل مچ جاندی اے۔ اوہ بولے تے خبر اوہ نہ بولے تے وی خبر‘ نالائقاں دی نااہلی ثابت ہون تے ملک چلان لئی وی میاں نوازشریف نوں لازم قرار دتا جا رہیا اے۔٭