ہر انعام آزمائش اے

عتیق انور راجا

وَسدی بارش وچ جمعہ دی نماز پڑھن مسجد اپڑیا تے موضع بیان سی کہ ہر انعام آزمائش اے۔ ڈاکٹر صاحب بیان کر رہے سن کہ قرآن پاک وچ اللہ پاک نے اولاد نوں نعمت وی آکھیا اے تے آزمائش وی۔ سارا بیان ایسے نقطہ اتے محیط سی۔ اک گل جہڑی مینوں بہت چنگی لگی تے دل نوں تکلیف وی ہوئی کہ جدوں معاشرے دا دانشور طبقہ غفلت‘ لاپروائی یا بددیانتی کرن لگے تے فیر ایہدا خمیازہ ساری قوم نوں بھگتنا پیندا اے۔ جمعہ دی نماز مگروں پوڑیاں اتردے پروفیسر ڈاکٹر اکرم ورک فرمان لگے راجہ صاحب‘ جے تسیں پچھلے جمعہ دی تقریر نہیں سنی تے تہانوں اج دے بیان دی سمجھ نہیںآ سکے گی۔ فیر کجھ سیکنڈ مگروں بولے شائد تہانوں سمجھ آ وی جاوے۔ دل ای دل وچ تھوڑا مسکرایا تے الحاج سعید احمد تاج نوں آکھیا کہ جناب عملی زندگی وچ کامیابی لئی اخلاقیات دی اہمیت اتے اک نشست رکھدے نیں۔اوسے شام نوں خبراں چلن لگیاں کہ شمالی علاقہ جات وچ برف باری شروع ہو چکی اے تے ہزاراں بلکہ لکھاں دی گنتی وچ لوکی قدرت دی ایس نعمت نوں ویکھن نکل پئے نیں۔ فیر جمعہ دی شام نوں ٹی وی سکرین اتے ایہ خبراں چلن لگیاں کہ مری دی سڑکاں اتے گڈیاں دی لمی لائناں لگیاں ہوئیاں نیں تے لوکی اپنی گڈیاں وچ پھس کے کسی مدد دے انتظار وچ نیں تے فیر ہفتے نوں ایہ منحوس خبراں سنن نوں ملیاں کہ گڈیاں وچ موجود کئی لوکی کسی مدد دا انتظار کردے کردے اپنی جان دی بازی ہار چکے نیں۔ جدوں پتہ چل گیا سی کہ سڑکاں اتے ٹریفک جام ہو چکی اے۔ گڈیاں رش وچ پھس چکیاں نیں تے برف باری وی ہو رہی اے تے کسی نوں تے چاہیدا سی کہ سامنے آندا‘ کوئی ادارہ تے ثابت کرن دی کوشش کردا کہ اسیں جاگ رہے آں۔ گڈیاں وچ ہلاک ہون والیاں دی ٹیپ توں صاف پتہ چل رہیا اے کہ لوکی 20, 20 گھنٹیاں توں سڑکاں اتے مدد لئی تڑپ رہے سن ۔مری دے ڈپٹی کمشنر تے اوہدے ماتحتاں دے وی وارنٹ نکلنے چاہیدے نیں کہ جہڑے گنجائش توں ودھ لوکاں دے مری داخل ہون مگروں وی مری دے داخلی رستاں اتے لوکاں نوں روکن دی کوشش کردے نظر نہ آئے۔ وزارت داخلہ نے راولپنڈی توں مری جان دے رستے بند نہیں کیتے تے فیر شیخ رشید دا بیان سامنے آ گیا کہ بہت سارے لوکی کے پی کے والے رستے توںمری آئے نیں۔ ایہدا اک ای مطلب اے کہ ایہ لوک بے حس نیں‘ اوہناں دے سامنے کسی دی زندگی دی کوئی اہمیت نہیں اے۔ ایہ صرف پوائنٹ سکورنگ کرن والے کھڈاری نیں۔ جدوں ہر سال ایہناں دناں لکھاں دی گنتی وچ لوکی قدرت دے نظارے (انعام) ویکھن مری تے دُجے شمالی علاقہ جات ولوں جاندے نیں تے کیوں ساڈی سرکار‘ سرکاری محکمے تے باخبر لوک ایس بارے کوئی موثر پالیسی سامنے نہیں لیاپاندے۔ علاقے دے سارے سرکاری ریسٹ ہائوسز نوں سیاحواں لئی پہلے وی کھولیا جا سکدا سی۔ ہوٹلاں دے کرایہ جات نوں آن لائن سسٹم نال جوڑیا جا سکدا سی لیکن ایسا نہیں ہویا۔
صاحبوپاکستان نوں رب نے ہر طرحاں دی نعمتاں نال نواز رکھیا اے۔ اچے اچے پہاڑ‘ خوبصورت جھیلاں نیں‘ سرسبز میدان تے بھرے کھیت کھلیان نیں‘ ندی نالے نہراں نیں‘ دریا نیں‘ سمندر اے گرم تے سرد ریگستان اے۔ سونا اگلن والی زمیناں نیں تے سونے جیہے قیمتی ذخائر نال ڈھکے پہاڑ نیں۔ ایہ نعمتاں اک طرحاں ساڈے لئی رب دا انعام نیں تے دُجے پاسے ایہو نعمتاں ساڈے لئی آزمائش بن رہیاں نیں۔ ساڈے نوجوان اینے باصلاحیت نیں کہ ساری دنیا ایہناں دی قدردان اے۔ فوج اینی بہادر اے کہ دنیا دی وڈی توں وڈی فوج نوں للکار سکدی اے۔ ایجنسیاں اینی ہوشیار نیں کہ ہر طرحاں دے دشمن لئی لائحہ عمل تیار رکھدیاں نیں۔ سیاست دان اینے سیانے نیں کہ اپنے فیدے لئی نت نویں راہواں تلاش کر لیندے نیں۔ لیکن فیر وی حادثے ساڈی راہ ویکھ رہے ہوندے نیں۔ اوہناں توں بچان لئی کوئی سامنے نہیں آندا۔ حادثہ رونما ہو جاوے‘ لوکی زندگی دی بازیاں ہار جان‘ معصوم پھل کھلن توں پہلے مرجھا جان تے فیر ہر پاسوں مدد کرن والے نکل پیندے نیں۔ ہر پاسیوں پریس ریلیزجاری ہون لگدیاں نیں۔ سوشل میڈیا اتے خبراں جاری کروائی جان لگدیاں نیں۔ میں صرف اینا پچھنا چاہنا واں کہ اسیں لوک تے بیوقوف آں۔ اسیں تے پاگل آں سانوں تے کجھ سمجھ نہیں اے۔ اسیں تے بنا سوچے سمجھے بالاں نوں برف وکھان یا پہاڑ وکھان نکل پینے آں لیکن ایہ سیانے‘ ساڈی ایجنسیاں‘ ساڈی انتظامیہ‘ ساڈے سیاستدان کتھے سوئے ہوئے سن۔ مری جتھے چار توں پنج ہزار گڈیاں دے پارکنگ دی تھاں اے جدوں دس ہزار توں ودھ گڈیاں نے مری ٹول پلازہ کراس کر لیا تے ایہناں لوکاں دا سسٹم کیوں حرکت وچ نہیں آیا۔ ایہدا اک ای جواب مینوں سمجھ آندا اے کہ بحیثیت قوم اسیں اخلاقی پستی دا شکار ہو چکے آں۔