کیہ پاکستان سانحات دی سرزمین اے؟
مطلوب ورائچ
مری سنے پاکستان دے شمالی علاقے گلیات تے کشمیر وچ مسلسل ہون والی برف باری نے طوفان دی شکل اختیار کر لئی جہدے پاروں سیاح ڈاڈھیاں اوکڑاں دا شکار ہوئے تے 30 دے نیڑے لوک داعی اجل نوں لبیک کہہ گئے۔ ماضی وچ انج دی تباہی کدی سنن وچ آئی نہ ویکھن وچ۔ مری وچ ایس برف دے طوفان دے ابتدائی 24گھنٹیاں دوران 17 انچ برف باری ریکارڈ کیتی گئی جہنوں دس ورھیاں دوران ریکارڈ برف باری قرار دتا جا رہیا اے جد کہ اگلے دیہاڑے ہور برف باری نال موسم دی شدید صورتحال پاروں مری وچ نظام زندگی درہم برہم ہو کے رہ گیا۔ جمعے تے ہفتے دی رات توں اک لکھ گڈیاں مری وچ پھسیاں ہوئیاں سن۔ پہلے دن جہناں وچوں 19 بندیاں دیاں گڈیاں وچ ای موت ہو گئی۔ اوہناں لوکاں وچ کئی نے سردی توں بچن لئی گڈیاں دے ہیٹر چلائے تے سوں گئے تے فیر اوہناں دی اکھ نہ کھل سکی۔ شہر توں کجھ دل دہلا دین والے منظر سامنے آندے رہے جہدے وچ کوئی گڈیاں وچ پھسے بندیاں نوں اپنی مدد آپ دے تحت کڈھن دی کوشش کر رہیا اے تے کدھرے گڈیاں کئی فٹ برف دے تھلے پھسیاں وکھائی دتیاں۔ حکومت ولوں چھیتی طور تے فوج نوں سدیا گیا جہدے نال صورتحال بہتر تے ہوئی پر اوس ویلے تک ایناں نقصان ہو چکیا سی جہدی تلافی ناممکن اے۔
اودھر وزیراعظم نے سانحہ مری تے افسوس دا اظہار کردے ہوئے ایس واقعے دی تحقیقات دا حکم دتا۔ شدید طوفان دے آن تک اک لکھ اٹھاٹھ ہزار گڈیاں مری وچ داخل ہو چکیاں سن جد کہ سرکاری طورتے مری تے گلیات وچ صرف 34سو گڈیاں دی پارکنگ دی تھاں موجود اے۔ دوجا نکتہ ایہ نظر آندا اے کہ ایہناں ڈیڑھ لکھ گڈیاں وچوں اک ہزار گڈیاں وی انج دیاں نہیں سن جہناں نے مری آن توں پہلاں اپنے سمر ٹائر کائونر ٹائر توں چیلنج کیتا ہووے تے میں وثوق نال کہہ سکنا واں کہ 99فیصدگڈیاں دے ریڈی ایٹر وچ ڈسٹل واٹر نہیں سی تے 90 فیصد سیاح گھراں توں صرف چادراں لے کے نکل آئے سی جد کہ منفی 7.8 ڈگری جان توں پہلاں سیاحواں دے کول مطلوبہ گرم کپڑے نہیں سن۔ گلیات سیاحواں لئی دلکشی دا مکمل سامان رکھدی اے سانوں پاکستانیاں نوں سیاحت دا شوق تے ہے پر سیاحت لئی جہڑے لوازمات ضروری ہوندے نیں اوہناں تے غور نہیں کیتا جاندا۔
لہور‘ پشاور‘ ملتان تے دوجے شہراں توں اپنیاں گڈیاں یاں ٹورآپریٹراں دے راہیں مری تے کشمیر دا رخ کر لیا۔ راہ تے منزل تے اپڑ کے ہر سہولت دی دستیابی دا یقین ہوندا اے۔ ہوٹل دی بکنگ کیتی گئی ہوندی اے اوتھے اپڑ کے وی ہوٹل مل سکدے نیں بس کول پیسہ ہونا چاہیدا اے پر پیسہ ہر ویلے تے ہر تھاں کم نہیں آندا۔ ٹورسٹ نوں نہ صرف اوکڑاں دا اندازہ ہوندا اے سگوں اوہناں نال نبڑن لئی وی اوہ ذہنی طور تے تیار ہوندا اے۔ میں پورے وثوق نال کہہ سکنا واں کہ مرن والیاں وچ اک وی اجیہا بندہ نہیں ہووے گا جہنوں سیاح کہیا جا سکدا اے۔ ایہ نہیں کہ سیاح مر نہیں سکدا۔ اوہ وی حادثیاں دا شکار ہو سکدا اے پر موسم دی شدت نال کدی کوئی سیاح نہیں مردا۔ کیوں جے اوہنے پورا بندوبست کیتا ہوندا اے۔ وزیراعظم نے تحقیقات دا حکم دتا اے تحقیقات توں کہڑی نویں چیز سامنے آ سکدی اے؟ کجھ وی نہیں‘ لوکاں نوں موسم دی شدت دا اندازہ نہیں سی۔ انتظامیہ نوں تے پتہ سی۔ ہفتے دیہاڑے مری نوں جان والے سارے راہ بند کر دتے گئے ایہو کجھ اک دن پہلے کر لیا جاندا تے ایہ سانحہ نہ ہوندا۔
حکومت سیاحت نوں فروغ دے رہی اے پر ایہدی ستائش دی لوڑ اے۔ ایہدے نال نال حکومت نوں سیاحت دے حوالے نال جانکاری مہم وی چلانی چاہیدی اے۔ آپ سیر لئی جان والے لوکاں نوں وی مکمل بندوبست کرنا چاہیدا اے۔ سیاحتی تھاواں دے رہائشیاں وچوں اکثر دی روٹی روزی دا ذریعہ ایہو لوک نیں جو د نیا بھر توں آندے نیں۔ عمومی طور تے مقامی لوکاں رویے سنگ دلی والے ہوندے نیں۔ چنگے لوک وی موجود نیں جد کہ کھل لاہن والیاں دی بھرمار اے۔ جہڑے علاقیاں وچ لوک پھسے ہوندے سن اوہناں وچ مقامی لوک بناں لالچ دے سامنے آندے تے اینی تباہی نہ ہوندی۔ عام دیہاڑیاں وچ انسانیت دی تذلیل‘ رسوائی تے پستی جے ویکھنی ہووے تے تہانوں اسرائیل جان دی لوڑ نہیں۔ ساڈے مری دے وسنیکاں نے وی انسانیت سوز نقش چھڈے نیں تے اوہ پاکستان بھر توں سمر تے ونٹر دے موسماں وچ آن والے لکھاں سیاح ہر ورھے مری تے لاگے دے وسنیکاں دی ہٹلر گردی دا شکار ہوندے نیں سیاحواں توں نہ صرف پیسے کھوہے جاندے نیں سادہ پانی دی بوتل دو سو توں پنج سو‘ پرانے ہوٹل دے کمرے دا کرایہ باراں ہزار توں ویہہ ہزار روپیے تے نان روٹی گھٹو گھٹ پنجاہ روپیے دی وک رہی اے تے اکثر سیاحواں دی ریسٹورنٹ مالکان دے ہتھوں پٹائی روزمرہ دا معمول بن چکیا اے۔ حکومت نے ہن اک تحقیقاتی کمیشن تشکیل دتا اے پر پاکستان دی سیاست ایہہ وے کہ اج تک کسے وی تحقیقاتی کمیشن تے کمیٹی دی نہ تے رپورٹ سامنے آندی اے تے نہ ای ایہدے کوئی نتیجے نکلدے نیں۔ حکومتی وزیر بناں سوچے سمجھے بیان جڑ رہے نیں تے اپوزیشن وی ہر سانحے دے موقعے تے پوائنٹ سکورنگ کردی اے۔ پتہ نہیں اسیں کدوں اک قوم بناں گے تے ساڈی سوچ سانجھی ہووے گی؟۔٭٭
