غزل
الیاس آتش
ویکھیں دنیا چ دل نہ توں لاویں ایہ دنیا سراں اے بیلیا
ایتھے دل نہ توں کسے دا دکھاویں ایہ دنیا سراں اے بیلیا
جہڑا آیا اس اک دن جاونا ڈیرا اپنا اے سبھناں نے چاونا
حق ہور نہ توں کسے دا وی کھاویں ایہ دنیا سراں اے بیلیا
کر اپنے خدا دی پہچان توں رکھ اوہدے ول اپنا دھیان توں
سر اوہدے اگے نت توں جھکاویں ایہ دنیا سراں اے بیلیا
دل لایا ایتھے جیس نے وی پیاریا اوہو بازی ایتھے اکدن ہاریا
پکے میحل نہ توں اپنے بناویں ایہ دنیا سراں اے بیلیا
چاہویں زندگی جے سجنا دوام توں پیدا نیکیاں دیوچ کر نام توں
نہ توں ماڑیاں نوں کدے وی ستاویں ایہ دنیا سراں اے بیلیا
سوہنے رب کولوں جاویں ڈر آتشا بس چنگیاں کمائیاں کر آتشا
گل دل والی سب نوں سناویں ایہ دنیا سراں اے بیلیا
