بے رحم رویے

سعد اللہ شاہ

جو بھی کرتا ہے محبت وہ برا کرتا ہے
ایک بندے پہ وہ کتنوں کو خفا کرتا ہے
ملتی فرصت کبھی اتنی تو یہ سوچا ہوتا
وہ جفا کرتا ہے ہم سے کہ وفا کرتا ہے
موجودہ وقت وچ جو کجھ ہو رہیا اے یاں کیتا جا رہیا اے اوہ لوکاں نوں قابل قبول نہیں۔ ناں صاحب تھوڑا جیہا حوصلہ تھوڑا جیہا تدبر تے کجھ لحاظ خاطر‘ میں مری دے موضوع نوں بالکل وی نہیں چھونا چاہندا‘ کہ بہت کجھ لکھیا جا چکیا اے۔ بڑے بھرویں انداز وچ سید ارشاد احمد عارف لکھ چکے ایس لئی گنجائش کڈھنا جسارت ہووے گی۔ کہنا صرف ایہہ وے کہ تسیں اپنیاں غلطیاں تے نظر کرن تے لوکاں دے پھٹاں تے مرہم رکھن دی تھاں تسیں جے عذر ہائے لنگ پیش کرو گے یاں بے تکیاں وضاحتاں کرو گے تے ایہ پھٹاں تے لون لان دے مترادف ہووے گا تے ایہو کجھ حکومت دے نمائندگان ولوں کیتا جا رہیا اے ایہ مینوں اک حکومتی مشیر دی گل بات توں یاد آیا جہناں نے ن لیگ تے پیپلزپارٹی نوں موجودہ مری سانحے دا ذمہ دار قرار دے دتا۔ ایہدے تے شرکاء دے منہ کھلے دے کھلے رہ گئے۔ اوہناں دا کہنا سی کدوں توں سابق حکومتاں رہیاں تے اوہناں نے مری نوں ایس قابل نہیں بنایا کہ حادثیاں دا مقابلہ کر سکیے پر اوہ ایس گل توں بے خبر سن کہ سابق حکومت نے ڈیڑھ ارب روپیے دی مشینری برف ہٹان والی خریدی سی سب توں اہم گل سیزن توں پہلاں باقاعدہ پنجاب حکومت سر جوڑ کے بیٹھدی تے منصوبہ بندی کردی۔ گل کھلی تے ایہ وی پتہ لگا کہ صادق عباسی صاحب جو اوتھوں دے کرتا دھرتا نیں نے رکی ہوئی ٹریفک باقاعدہ زور دے کے کھلوائی کہ کجھ ہوٹل اپنے پیاریاں دے وی اوتھے کوئی اوہناں صاحبان عقل و دانش توں پچھے کہ تسیں حکومت وچ ساڑھے تن ورھے توں کیہ کر رہے او۔ میں تے پہلے ای لکھ چکیا واں کہ ہن دا بندوبست ای انج دا اے کہ سب کجھ جان والیاں تے پاندے جائو۔ ایہ گل سلاہن جوگ اے کہ مری نوں ضلع بنایا جا رہیا اے تے ایہدا ناں ضلع کوہسار تجویز کیتا جا رہیا اے۔ اوتھوں دے ہوٹلاں دی مچائی ہوئی لٹ مار تے وی تحقیق ہو رہی اے۔ انج لگدا اے کہ اوہ سارے دے سارے ای مال غنیمت اکٹھا کر رہے سن۔ چڑھائی چڑھان لئی چین تن ہزار روپیے وچ زبردستی ویچ رہے سن جو انکار کردا اوہدی گڈی نوں تھپ تھپا کے نکل جان نوں کہیا جاندا۔ حکومت جے کجھ چنگا کر رہی اے تے کردی جاوے لوک انجام آپ ای ویکھ لین گے۔ ہن ایہ کہنا کہ جو کجھ حکومت کرن جا رہی اے ایہ پچھلی حکومتاں نوں دس پندراں ورھے پہلاں کرنا چاہیدا سی کوئی اوہناں توں پچھے کہ کیہ تسیں ساڑھے تن ورھے تک ایس حادثے نوں اڈیک رہے سی۔ سوال تے ایہ کیتاجا رہیا اے کہ روٹین دے انتظامات وی نہیں سن۔ کریڈٹ لین دیاں کوششاں بہت ہوئیاں۔
دوجے پاسے ویکھیے کہ ن لیگ تے پیپلزپارٹی وی شاید انتظار وچ سن اوہ کیویں اکمٹھ ہو گئیاں نیں۔ سانحہ تے جوڈیشل کمیشن دا مطالبہ کیتا جا رہیا اے۔ اصل گل ایہ وے کہ حکومت دی نظام تے باکل وی گرفت نہیں۔ سب توں ودھ پتے دی گل اسلام آباد ہائیکورٹ نے کیتی۔ ریاست دا مائنڈ سیٹ لوکاں دی خدمت کرنا ہے ای نہیں۔ اسلام آباد وی اشرافیہ لئی ڈویلپ ہو رہیا اے۔ اوہو سروائیول آف دی فٹیسٹ والا معاملہ اے کہ جس دیئے وچ جان ہووے گی اوہ رہ جاوے گا۔ جنگل تک کٹ کے ختم ہو رہے نیں زرعی زمین کالونیاں وچ ڈھل رہی اے۔ علی اکبر عباس دا اک مصرع ذہن وچ پھسیا ہویا اے۔ وہ بھوک ہے اعضا کہیں اعضا ہی نہ کھا لیں۔ ایہدا ٹریلر اہل مری دے بے رحم رویے وچ نظر آ گیا کہ چائے دا کپ باراں سو روپیے‘ انڈا پنج سو روپیے‘ گڈی دی پارکنگ ہزار‘ دھکا لگائی پنج ہزار‘ کمریاں دے کرائے سٹھ توں ستر ہزار۔ استحصال ہور کنہوں کہندے نیں۔ نتیجتاً سوشل میڈیا والے اہلیان مری نوں کیویں کیویں دے ناواں نال نواز رہے نیں۔ ایس رویے نوں برے توں برا ناں دتا جاوے تے غلط نہیں پر اک گل سوچن دی اے کہ کیہ ایہ جبلت دا ناں اے کہ جہدے وچ انسان دیاں اکھاں تے حرص و ہوس دیاں پٹیاں بجھ جاندیاں نیں اوہ درندگی تے اتر آندا اے۔ ذرا ٹھہرو اک لمحے لئی ایہنوں چھڈو کہ مقامی پھسے ہوئے لکاں دیاں جیباں کٹ رہے سن پھسے ہوئے لوک تے چلو خوشحال لوگ سن جو برف باری ویکھن لئی لکھاں خرچ کرن دی پسلی رکھدے سن۔ تسیں دل تے ہتھ رکھ کے پاکستان دے غریب دا سوچو جو آئے دن اپنیاں جیباں تے پین والے ڈاکے دے سامنے بے بس نیں۔
جس دور میں لٹ جائے فقیروں کی کمائی
اس دور کے سلطاں سے کوئی بھول ہوئی ہے
ایہ جو منی بجٹ لاگو کرن جا رہے نیں ایہ جو غریباں دی بے بسی دا مذاق اڑا رہے نیں انج ای مہدی حسن یاد آ گئے۔ یہ کاغذی پھول جیسے چہرے مذاق اڑاتے ہیں آدمی کا۔ واقعتاً ایہ کاغذی لوگ نیں ایہناں دی اصل وی کجھ نہیں نہ کوئی مہک تے نہ کوئی تازگی۔ ایہ پتھر صفت لوگ نیں یعقوب پرواز کہندے نیں:
رو پڑا تھا دیکھ کر جو آج بدحالی مری
جاتے جاتے کہہ گیا ہے دوست گھبرانا نہیں
لو جی اک شعر نوجوان شاعر جاویدرامش نے گھلیا اے:
مرنے والوں کی نکل آتی ہے لغزش ہربار
کوئی قاتل کا گریبان پکڑتا ہی نہیں
ہن تازہ خبر سن لوو کہ مری وچ ہوٹل مالکان دیاں گرفتاریاں شروع ہو چکیاں نیں۔ میں ایہ نہیں کہواں گا کہ ہن چوراں نوں مور پے گئے نیں سگوں ایہ مکافات عمل اے جیویں ایہ کھاندے نیں انج ای نکلدے نیں۔ اک گل میں بار بار سوچنا واں کہ جدوں انسان دے دل چوں خوف خدا نکل جاندا اے تے اوہ درندے توں وی اگے نکل جاندا اے اللہ سب کجھ ویکھ رہیا اے تے اوہ ظلم نوں پسند نہیں کردا۔
کبھی دکھ کسی کو دیا نہیں مجھے اے خدا ترا خوف تھا
ترا خوف بھی تری دین ہے بھلا اس میں میرا کمال کیا