ادبی رسالے ’’سُمیل‘‘دا مُکھ وکھالی اِکٹھ

رپورٹ: ارشاد شیخ

پنجابی یونین دے پربندھ ہیٹھ پچھلے دناں پنجاب ہائوس وچ پروفیسر اعجاز تے اوہناں دی اہلیہ رشم جمیل پال دی ادارت وچ چھپن والے پنجابی دے ادبی رسالے سمیل دا مُکھ وکھالی اِکٹھ ‘ منے پرمنے صحافی ‘ دانشور الیاس گھمن دی صدارت وچ منعقد ہوئی۔ جہدے وچ پنجابی دے فروغ لئی کم کرن والی تے پنجابی ادب نال تعلق رکھن والی نمایاں شخصیات نے رَلت کیتی۔ میزبانی پنجابی یونین دے چیئرمین مدثر اقبال بٹ نے کیتی۔ سٹیج سیکرٹری دے فرائض پروفیسر اعجاز نے نبھائے۔مہمانان خصوصی پروفیسر جمیل احمد پال‘ شگفتہ گمی لودھی پنجابی دے منے پرمنے شاعر بابانجمی سن۔ تقریب وچ رلت کرن والی نمایاں شخصیات وچ پروفیسر ڈاکٹر کلیان سنگھ کلیان،زاہد حسن ،ڈاکٹر کرامت مغل تے حافظ ممتازملک شامل سن۔
تقریب نال خطاب کردیاں ہویاں پنجابی یونین تے پنجابی میڈیاگروپ دے چیئرمین مدثر اقبال بٹ نے آکھیا کہ سال 2022 پنجابی لئی بہت چنگا ثابت ہووے گا جہدا آغاز سمیل دے اجرا نال ہو گیا اے۔ ایس سال وچ پنجابی لئی کم کرن والی ساری تنظیماں تے شخصیات نوں اک لڑی وچ پرون دی جدوجہد کرنی اے۔ کجھ دناں وچ پنجاب ہائوس وچ الیاس گھمن دے اعزازوچ اک تقریب منعقد کیتی جاوے گی۔ ایس تقریب وچ ساری پنجابی تنظیماں‘ پنجابی ادب نال تعلق رکھن والیاں تے پنجابی زبان دے فروغ لئی کم کرن والیاں نوں بغیر کسے تخصیص دے مدعو کیتا جاوے گا۔ اوہناں نے آکھیا کہ جمیل پال میرے استاد نیں اوہناں کولوں بہت کجھ سکھیا اے تے سکھ رہے آں۔ جدوں پنجابی وَل قدم ودھایا تے اوس ویلے پنجابی دے دو وڈے نام الیاس گھمن تے جمیل پال ای سن۔ اوہناں نے آکھیا کہ پنجابی وچ اخبار کڈنا بہت اوکھا اے لیکن میرے ادارے نے ثابت کیتا اے کہ ایہہ گھاٹے دا سودا نہیں اے۔ اوہناں نے آکھیا کہ پنجابی دا اخبار لوکائی جمیل پال اپنی تنخواہ خرچ کر کے کڈدے سن۔اوہناں نے آکھیا کہ میری ساری دی ساری جستجو پنجابی نوں ایہدا حق دوان دی اے۔ اصل کامیابی اوس دن ہووے گی جدوں پنجاب وچ پنجابی پڑھائی جان لگے گی۔ خوشی دی گل اے کہ ایس کم وچ شگفتہ گمی وی اپنا حصہ پا رہیاں نیں۔ اوہناں نے آکھیا کہ سانوں پنجابی دے فروغ لئی کم کرن والیاں نوں تنقید دا نشانہ نہیں بنانا چاہیدابلکہ اوہناں دی حوصلہ افزائی کرنی چاہیدی اے۔

پروفیسر کلیان سنگھ کلیان نے آکھیا کہ پنجابی وچ دُجی زباناں دے ادب دا ترجمہ کرن دا کم نہ ہون دے برابر اے جہدی بہت کمی محسوس کیتی جاندی سی جنہوں سمیل دے اجرا نے پورا کر دتا اے۔ اعجاز تے رشم دی ایہہ کوشش آن والے دِناں وچ اینی کامیاب ہووے گی کہ سمیل پنجابی ادب وچ بہت وڈا نام ہووے گا۔اوہناں نے آکھیا کہ ایس ویلے اردو ادب وچ وی کوئی وڈا کم نہیں ہو رہیا۔ دُجی زباناں دے ادب نال پنجابی ادب دی ناواقفیت چنگی علامت نہیں اے۔ سمیل رسالے وچ اک حصہ دوجی زباناں دے ادب دے ترجمے لئی وی ہونا چاہیدا اے۔
زاہدحسن نے آکھیا کہ ساڈے ساریاں دا ایہ سفنا سی کہ ایسی کوئی تھاں ہووے جتھے پنجابی دے حوالے نال ایسی تقریباںمنعقد کیتیاں جا سکن۔مدثر اقبال بٹ دے شکر گزار آں کہ اوہناں نے پنجاب ہائوس بنا کے ساڈے سفنے نوں حقیقت وچ بدل دتا اے۔ پنجابی دی ترقی تے فروغ لئی سمیل جئے رسالے دی لوڑ سی جنہوں اعجاز نے سمیل کڈ کے پورا کردتا اے۔ پنجابی وچ دُجی زباناں توں تحریراں دے ترجمہ کرن دی تریخ اردو وچ ترجمہ کاری توں پرانی اے۔
ڈاکٹر کرامت مغل نے آکھیا کہ پنجابی وچ پرچہ کڈنا انج ای اے کہ شمع دے دونویں پاسے اگ لانا۔ ایہ کم اعجاز نے سمیل کڈ کے کر دتا اے۔ پنجابی ادب وچ نواں رسالہ آن اتے بڑی خوشی ہوئی اے۔ سمیل وچ دنیا بھر وچ پھیلے ہوئے پنجابیاں دی تحریراں نوں جگہ ملنی چاہیدی اے۔
پروفیسر ڈاکٹر جمیل احمد پال نے آکھیا کہ پنجابی دا رسالہ سمیل کڈن دا سارا کارنامہ اعجاز تے رشم دا اے۔ پنجابی صحافت وچ آن لئی بندے دے اعصاب دا مضبوط ہونا ضروری اے کیوں جے بعض اوقات تسیں کسے دے حوالے نال کجھ شائع کرو تے اوہدے شدید ردعمل دا سامنا کرنا پیندا اے۔انج دے ای دبائو دا سامنا مینوں فیض احمد فیض دے پنجابی ہون دے باوجود پنجابی لئی کم نہ کرن دے حوالے نال شائع کرن تے کرنا پیا سی۔ اوہناں نے آکھیا کہ میں لوکائی دے نام توں پنجابی دا پرچہ کڈیاجہڑا بھلیکھا دا ای تسلسل اے جہدے لئی مدثر اقبال بٹ نے بہت کم کیتا اے۔ اصل وچ اوہناں نے ای ایہنوں چلایا اے۔ ہر زبان نوں ترقی دی منزل تک پہنچن توں پہلے ترجمہ دے مرحلے توں گزرنا پیندا اے۔ سمیل وچ ترجمہ لئی حصہ رکھنا چنگا فیصلہ اے۔ کوئی وی پرچہ شوق نال نہیں نکلدا۔ شوق نال کڈیا جان والا پرچہ چھیتی ای اپنے انجام نوں پہنچ جاندا اے۔ پرچہ کڈن دے جذبے دے نال نال اعصاب دا مضبوط ہونا وی ضروری اے۔ پنجابی پرچہ کاری دی تریخ نے 70 سال دا سفر طے کر لیا اے۔
پنجابی دے معروف شاعر بابا نجمی نے آکھیا کہ پنجابی دی تریخ ساڈے سامنے اے کہ چراغ نال چراغ جل رہیا اے۔ سمیل رسالہ پنجابی ادب وچ خوبصورت وادھا اے۔ پنجابی دے فروغ لئی الیاس گھمن تے مدثر اقبال بٹ دی جدوجہد دا اعتراف نہ کرنا زیادتی ہووے گی۔ اک دن ایسا آوے گا کہ وڈے وڈے سرمایہ کار پنجابی صحافت دے میدان وچ وی آن گے۔ شگفتہ گمی لودھی نے آکھیا کہ سمیل دی رونمائی لئی پروقار تقریب دے انعقاد اتے میں مدثر اقبال بٹ دی شکر گزار آں۔ا وہناں نے آکھیا کہ جمیل پال تے الیاس گھمن اوہ لوک نیں جہڑے میرے والد دی تحریراں شائع کردے سن۔ ایہ دونوں میرے لئی والد دی جگہ تے نیں۔ ہن سمیل دے ذریعے میں اوہناں دے نال جڑ گئی آں۔ اجے مینوں پنجابی لئی کم کردیاں ہویاں صرف چھ سال ای ہوئے نیں۔ میں اپنے اخراجات وچ کمی کر دتی اے تاں جے پنجابی دے فروغ لئی ودھ توں ودھ خرچ کر سکاں۔ اوہناں نے آکھیا کہ پنجابیاں نوں اک لڑی وچ پرون دا مدثر اقبال بٹ دا فیصلہ سب دے دلاں دی آواز اے۔ اعجاز تے رشم پنجابی دا سرمایہ نیں۔ سمیل اک دن عالمی سطح اتے نام کماوے گا۔ اوہناں نے آکھیا کہ پنجابی وچ ترجمہ کاری دا مستقبل بہت روشن اے۔ کامیابی دا انحصار نیت اتے اے۔ نیت وچ کھوٹ آ جاوے تے قدرت نوں ایہ چنگا نہیں لگدا۔ پنجابی دے فروغ لئی مسلسل کم کرن والے منے پرمنے صحافی تے دانشور الیاس گھمن نے آکھیا کہ ادبی پرچہ اپنے مدیر دی شخصیت دا آئینہ دار ہوندا اے۔ پنجابی صحافت جان کڈن والا کم اے تے ایہہ اینا عظیم کم اے کہ ایہدے لئے جان دے وی دینی چاہیدی اے۔ اوہناں نے آکھیا کہ مینوں میرے بزرگاں ولوں ورثے وچ سارنگ دے تن پرچے ملے سن جہڑے انتہائی خوبصورت سن۔ میں سنبھال کے رکھے نیں۔ ایس پرچے وچ ہندو‘سکھ‘ عیسائی تے مسلمان سارے کم کردے سن۔ سارے وڈے لوک سن۔ ایہو وجہ اے کہ سارنگ دا پرچہ ہر طرحاں بہترین ہُندا سی۔ سمیل رسالہ ایسے نسبت نال پنجابی دے ہر شعبہ دے رنگ دی عکاسی کرے گا۔اوہناں نے آکھیا کہ مشتاق بٹ نے وی پنجابی لئی بہت کم کیتا۔ اوہ عملی کم اتے یقین رکھدے سن۔اوہناں نے آکھیا کہ ہن تے سپریم کورٹ نے وی آکھ دتا اے کہ سارے صوبے اپنی اپنی زبان وچ پڑھا رہے نیں تے پنجاب وچ پنجابی کیوں نہیں پڑھائی جا رہی۔ ہن اسیں ساریاں نے رل کے پنجابی لئی کم کرنا اے۔ اوہناں نے آکھیا سمیل لئی اک بزنس پلان وی ہونا چاہیدا اے۔ تقریب دے اختتام اتے حافظ ممتاز ملک نے جمیل پال دی اہلیہ دی جلد صحت یابی لئی تے پنجابی میڈیا گروپ دے جنرل منیجر رضوان اصغر بٹ دے والد دے ایصال ثواب تے بلند درجات لئی دعا کیتی۔