نواز شریف دی واپسی سَوکھی نہیں

طیبہ ضیا

اک امریکی سروے دے مطابق پاک فوج دی مقبولیت وچ 87فیصد وادھا ہویا اے۔ نواز بیانیہ نے عوام دے دل توں فوج دی محبت گھٹ کرن لئی فوج بیانیہ اتے محنت تے بہت کیتی سی مگر زمینی حقائق خود نوں منوا کے رہندے نیں۔ فوج تے پاکستان لازم و ملزوم نیں۔ سیاستدان ایمانداری نال اقتدار چلان تے نہ عوام نوں مسئلہ اے نہ اداریاں نوں۔ مریم نواز اپنے پیو دی تے بلاول زرداری اپنے پیو دی سلیکٹڈ چیئرپرسن نیں۔ جعلی وصیت نال سلیکٹڈ شدہ بلاول زرداری وی جمہوریت دی گل کردا اے؟ تجربہ کار بزرگ رہنماواں نوں غلام بنا کے پارٹی اتے مسلط ہونا کتھے دی جمہوریت اے؟ کیہ مریم نواز ووٹ نوں عزت دے کے پارٹی دی جانشین منتخب ہوئیاں سن؟ نہ الیکشن لڑیا نہ پارٹی نے ووٹ نال جانشین منتخب کیتا‘ بادشاہ دی شہزادی بس محل دے اندر ای سلیکٹ ہو گئی؟ ایہہ نسلی سلیکٹڈ ملک و قوم دی جمہوریت دے مامے پھُپھی بن گئے۔ مثالاں امریکی جمہوریت دی دیندے نیں۔ جہڑا پوری دنیا دا جمہوری ماما بنیا پھردا سی تے جدوں اوہناں دی جمہوریت دا بھانڈا پھٹ جاندا اے تے اوہ وی خاکی وردی والیاں نوں مدد لئی پکاردے نیں۔ واشنگٹن وچ وی جمہوریت بچان لئی فوج نوں مداخلت کرنا پئی۔ 2020دے امریکی الیکشن مگروں جدوں ٹرمپ مافیا نے کیپیٹل ہل اتے قبضہ کر لیا تے امریکی فون نوں مداخلت کرنا پئی۔ امریکی آرمی چیف نوں فوج نوں میمو جاری کرنا پیا اے کہ سیاست وچ مداخلت نہ کیتی جاوے۔ جدوں ایہو جملہ پاک فون دا جرنیل آکھے تے غلاماں دا ٹولہ مذاق بناندا اے؟ امریکہ دا دارالحکومت فوجی وردی دی پناہ وچ دے دتا گیا۔ امریکہ دا آرمی چیف مکمل نگرانی کر رہیا سی۔ ٹرمپ حواریاں دی ات گردی وچ کجھ ریٹائرڈ فوجی افسر وی شامل سن ایس لئی امریکی آرمی چیف نوں اپنی فوج نوں ہدایات جاری کرنیاں ئپیاں کہ جمہوریت نوں بچائو ایہدے وچ مداخلت نہ کرو۔ یاد کرو جدوں بائڈن نومنتخب صدر 20جنوری 2021نوں اپنے عہدے دا حلف چک رہیا سی تے اوس حلف برداری دی تقریب توں پہلے ای واشنگٹن ڈی سی عملاً کسے فوجی چھائونی دا منظر پیش کر رہیا سی۔ ڈونلڈ ٹرمپ دے حامیاں ولوں واشنگٹن ڈی سی وچ کانگریس دی عمارت کیپیٹل ہل اتے ات گردی مگروں دارالحکومت دی سکیورٹی انتہائی سخت سی۔ دارالحکومت دی سکیورٹی لئی ہزاراں پلس اہلکاراں دے نال دس ہزار فوجی اہلکار وی تعینات کیتے گئے سن جد کہ کسے وی ناخوشگوار واقعے دے اندیشے دے پیش نظر خفیہ ادارے وی پوری طرح متحرک سن۔ ایف بی آئی دے مطابق 20جنوری 2021نوں ہون والی تقریب توں پہلے یا اوس دن وی واشنگٹن ڈی سی وچ ہور پرتشدد واقعات دا اندیشہ سی۔ چیتا رہوے کہ نیشنل گارڈز امریکہ دی فوج تے فضائیہ دے ریزرو اہلکاراں اتے مشتمل فورس اے جہدے اہلکاراں دی گنتی ساڑھے چار لکھ دے کول اے۔ ایہناں اہلکاراں نوں کسے وی ہنگامی صورتحال یا قدرتی آفت دی صورت وچ امدادی کارروائیاں یا سول انتظامیہ دی مدد لئی طلب کیتا جا سکدا اے۔ جمہوریت تے آزادی رائے دے چیمپئن امریکہ نوں جمہوریت بچان لئی نیشنل گارڈز دی مدد حاصل کرنا پئی۔ صدر ٹرمپ دے سوشل میڈیا اکائونٹ بند کرنا ملکی سکیورٹی قرار دتا گیا۔ اپنی ریاست دے خلاف گل آئی تے اپنے ای ملک دے صدر دی آواز دبا دتی گئی تے دوجیاں دے ملکاں وچ دخل اندازی تے مخالف پراپیگنڈا آزادی رائے منیا جاندا اے؟ اپنے خالف اپنے ای صدر دی رائے برداشت نہیں ہو پائی تے مسلماناں دے نبی پاکﷺ دے خلاف گستاخانہ خاکے تے توہین آمیز مواد شائع کرنا آزادی رائے قرار دتا جاندا اے؟ ہوس اقتدار خواہ 74 سالہ پاکستانی ہووے یا دو سو ستر سالہ امریکی‘ نظام دی دھجیاں بکھیر کے رکھ دیندی اے۔ پاکستان وچ الیکٹڈ موروثیت ایسے ہوس اقتدار دا نتیجہ اے۔ ایہدا ثبوت ٹرمپ نے وی دے دتا کہ اقتدار نہیں تے فیر ریاست وی نہیں‘ نظام دی اٹ نال اٹ وجا دتی جاوے کہ ناکھاواں گے نہ کھان دیاں گے۔ ساری دنیا فوج دی پشت پناہی نال چل رہی اے۔ پاکستان دے عوام نے فوج مخالف بیانیہ رد کردتا اے۔ جمہوری ڈرامہ باز فنکار بیک ڈور توں ترلے منت وچ لگے ہوئے نیں مگر کوئی مناسب ڈیل نہیں ہو پائی۔ عمران خان نے وی لٹیا ہویا پیسہ کڈان دا ڈرامہ ای کیتا۔ کرپشن دے پروپیگنڈے اتے ووٹ تے مل گئے مگر اک پیسہ نہ کڈوا سکے۔ نواز شریف نے اپنی جان بچان دی فکر کیتی تے لندن نَس گئے۔ نواز فوج مخالف بیانیہ نوں بھارت نے بہت انجوائے کیتا۔ البتہ پاکستان دے عوام عارضی جذباتی پروپیگنڈا توں زیادہ دیر متاثر نہ ہو سکے۔ بے شک عمران خان ڈیلیور نہیں کر سکے۔ مہنگائی دے طوفان نے عوام دی چیخاں کڈوا دتیاں نیں۔ لہور گندا ہو چکیا اے۔ ملکی نظام منجمد اے۔ پی ٹی آئی دے ووٹر وی اپنے ووٹ اتے نوحہ کناں نیں۔ اگے کیہ ہووے گا کسے نوں کجھ علم نہیں مگر ایہہ طے اے کہ نواز شریف دی ملک واپسی اینی آسان تے سادہ نہیں رہی۔ نوے دی دہائی وچ نواز شریف نے پارلیمنٹ وچ دوتہائی اکثریت حاصل کرن مگروں فوج دے اک سربراہ نوں اوہناں دے عہدے توں برطرف کیتا۔ دُجے فوجی سربراہ نوں اوہ برطرف کرن ای والے سن کہ فوج نے اوہناں دی حکومت دا تختہ الٹ دتا تے نواز شریف نوں سعودی عرب وچ جلاوطنی کٹنی پئی۔ نواز دا سادہ لوح ووٹر برین واشڈ اے کہ اوہناں دا لیڈر فوج دے سامنے ڈٹ گیا اے۔ ایہناں بریانی پلیٹ ووٹراں نوں کون سمجھاوے کہ نواز شریف دا سگا بھرا وی جرنیل ہُندا اوہ ایہدے نال وی پنگا لے لیندے کہ کھل کے کھیڈنا چاہندے سن تے فوج کھل کے کھیڈن نہیں دیندی ورنہ پورا ملک جاتی امرا تے سرے محل بنا دتا جاندا۔