محکمہ زراعت دے ملازماں دے مسئلے ترجیحی بنیاداں اُتے حل کیتے جان :پرویز الہی

لہور( پنجابی میڈیا گروپ) چودھری پرویز الہی ہوراں آکھیا کہ محکمہ زراعت، واٹر مینجمنٹ دے ملازماں دی تنخواہ تے ہور مسائل ترجیحی بنیاداں اُتے حل کیتے جان ۔ سپیکر پنجاب اسمبلی چودھری پرویز الہی نے محکمہ زراعت دے واٹر مینجمنٹ ونگ دے پروجیکٹ ملازماں دے 1362رکنی نمائند ہ وفد نے اسمبلی چیمبر وچ ملاقات کیتی۔ ایس موقع اُتے پرویز الہی ہوراں آکھیا کہ ملک وچ روزگار دا پہلاں ای مسئلہ اے، نویں ملازم بھرتی کرن دی بجائے پرانے تربیت یافتہ ملازماں دے تجربے توں فائدہ چُکنا چاہیدا اے، ملازماں نوں محکمہ زراعت دے نیشنل پروگرام فار امپروومنٹ واٹر کورسز II وچ منتقل کر دتا جائے، ایس طرح دی غلطی دوبارہ نہ کرن، جدوں پنڈی وچ ڈینگی آیا تے پرانے ملازما فارغ کر کے نویں بھرتی کیتے گئے ۔ چودھری پرویز الہی ہوراں ہور آکھیا کہ جناں نوں تجربہ وی گھٹ سی، جس پاروں بوہت نقصان ہویا، حکومت محکمہ زراعت، واٹر مینجمنٹ دے پرانے تجربہ کار ملازماں دی تنخواہ تے ہور مسئلے ترجیحی بنیاداں اُتے حل کرے۔