ڈر دی حکمرانی

تنویر ظہور

بنیادی طور تے ڈر اوس پریشانی نوں کہندے نیں جو کسے آن والے خطرے دے احساس توں پیدا ہووے تے حزن اوس غم یاں فکر نوں کہندے نیں جو اوس حادثے دے نتیجے وچ لگا ہووے یعنی ڈر دا تعلق مستقبل وچ واقعہ ہون والے حادثے دے احساس توں ہوندا اے تے حزن دا تعلق ماضی وچ گزرے ہوئے حادثے دی وجہ نال پیدا شدہ نقصان نال ہوندا اے پر بالعموم ڈر کسے محسوس خطرے توں پیدا شدہ پریشانی لئی بولیا جاندا اے۔ ڈر اوہ زہر ہلاہل اے جہدے توں شرف انسانیت تباہ ہو کے رہ جاندا اے دنیا وچ انسان‘ دوجے انسان دے سامنے یاں تے کوئی فائدہ حاصل کرن لئی جھکدا اے یاں کسے خطرے توں بچن لئی۔ طمع دے جذبے تے انسان فیر وی نسبتاً آسانی نال قابو پا لیندا اے پر ڈر تے قابو پانا مقابلتاً اوکھا ہوندا اے ایس لئی کہ تحفظ خویش‘ زندگی دا بنیادی تقاضا اے۔ زندگی دی انتہائی کامیابی ایہہ وے کہ اجہے حالات پیدا نہ ہون جہدے نال انسان تے خوف و حزن طاری رہوے۔ حضور نبی کریمؐ ہوراں دے دور وچ ریاست مدینہ دے بندے خوف و خزن توں مامون رہے۔ ایس توں ودھ کے ہور جنت کیہ ہو سکدی اے کہ کسے نوں کسے قسم دا ڈر نہ ہووے۔ قرآن دی تعلیم تے نبی کریمؐ ہوراں دی سیرت تے عمل کرن نال انسان دے اندر اجیہا انقلاب پیدا ہو جاندا اے کہ اوہ کسے توں نہیں ڈردے۔ اوہ طبعی زندگی دے ہر مفاد نوں قربان دین لئی ہر ویلے تیار رہندا اے تے جدوں انسان دی ایہ کیفیت ہو جاوے تے فیر اوہنوں کسے قسم دا خوف و حزن نہیں لگ سکدا۔ قرآنی معاشرہ دے بندیاں دی خصوصیت ایہ دسی گئی اے کہ قرآن دے الفاظ وچ اوہناں تے کسے قسم دا خوف تے حزن نہیں ہوندا۔ مومن کہندے ای اوہنوں نیں جو آپ وی امن وچ ہووے تے دوجیاں دے امن دا ذمہ دار وی بنے۔ انفردی طور تے اجتماعی حیثیت نال وی۔ اللہ دی صفت المومن (امن دا ضامن) دے نال دوجی صفت السلام وی اے یعنی ہر شے دی نشوونما نال اوہنوں تکمیل تک اپڑان والا۔ ایس اعتبار نال اک مومن‘ مسلم وی ہوندا اے۔ آپ امن وچ تے دوجیاں نوں امن دی ضمانت دین والا۔
ڈر دے حوالے نال ایہ گلاں مینوں نوجوان انقلابی دانشور‘ مورخ تے معلم عمارعلی جان دی کتاب Rule By Fear دی حال ای وچ چھپن والی کتاب دے حوالے نال یاد آئیاں۔ پچھلے دیہاڑیاں ایس کتاب دی تقریب رونمائی نیشنل پریس کلب اسلام آباد وچ ہوئی۔ تقریب نال ممتاز صحافی تے کالم نگاراں حامدمیر‘ ابصارعالم‘ عاصمہ شیرازی تے دوجیاں نے خطاب کیتا۔ کتاب دے لکھاری عمارعلی جان نے اپنی تقریر وچ آکھیا کہ جدوں تہاڈا ماضی نہیں رہوے گا تے تہاڈا حال تے مستقبل وی ٹھیک نہیں ہووے گا۔ لکھنا پڑھنا انقلابی کم اے۔ ایتھے ڈر تے جھوٹ دی حکمرانی اے۔ سانوں نوجواناں وچ شعور پیدا کرنا چاہیدا اے۔ ڈر نو ںختم کرنا ساڈا مشن ہونا چاہیدا اے۔ ڈر دی حکمرانی نوں اسیں بدلنا چاہنے آں۔ ساڈا مقصد لوکاں وچ نفاق پیدا کرنا نہیں سگوں اکٹھا تے جوڑنا اے۔ عمارعلی جان نے امریکہ وچ تعلیم حاصل کیتی۔ اوہدی بیوی امریکن اے۔ امریکہ وچ اوہنوں جاب دی آفر ہوئی پر اوہنے اپنے ملک وچ آ کے ایتھوں دے نوجواناں وچ اپنا علم منتقل کرن نوں ترجیح دتی۔ امریکہ دی نسبت بہت گھٹ تنخواہ تے اوہ ایف سی کالج یونیورسٹی وچ پڑھا رہیا اے۔ اوہ ایہدے تے خوش اے۔ اوہنوں اپنے فیصلے تے کوئی پچھتاوا نہیں۔ تعلیم دے نال نال اوہ لیبرپارٹی نال وابستہ اے۔ ایس طرح اوہنوں عملی کم وی کرن دا موقع ملدا اے۔ عمارعلی جان معروف انقلابی شاعر‘ رائٹر تے دانشور ڈاکٹر خالدجاوید جان دا بیٹا اے۔ ڈاکٹر صاحب دی ایہ نظم میں باغی ہوں کافی مقبول ہوئی جہنوں محترمہ بینظیر بھٹو وی جلسیاں وچ اکثر سناندیاں سن۔ ڈاکٹر خالد جاوید جان نے تقریب نال خطاب کردے ہوئے آکھیا کہ میرے نقش قدم تے میرا بیٹا چل رہیا اے ایہدے بعد اوہدا بیٹا‘ ایہ مشن اوس ویلے تک جاری رہوے گا جدوں تک جبر دا پہاڑ ہٹ نہ جاوے۔ میری اک نظم اے خوف تراہ دے پہرے
اسیں وچارے
اسیں نکارے
دھر درگاہوں
کرماں مارے
اندروں لگے باہروں لگے
ساڈے اتے
خوف، تراہ دے پہرے لگے
ڈر دوزخ دی بھا دا سانوں
نالے ات عذاب قبر دا
روز حشر دا
ایہہ ڈر سارے
ساڈے دشمن
انج لگ دا اے ایہناں سانوں
اک دن رل کے کھا جانا ایں
٭٭٭