کیہ اسیں واقعی رشتہ کلچر وچ تبدیلی چاہنے آں؟

تابندہ خالد

اک ویلا سی جدوں زندگی سادہ سی۔ نیتاں وچ فتور نہ ہون دے برابر تے معیارات دا گراف اینا ودھیا نہیں سی۔ ہر گھر دی کُڑی اپنی عزت بچا کے رکھدی سی۔ منڈے والے انج آکھیا کردے سی کہ دھیاں سانجھیاں ہُندیاں نیں ایناں نوں کیہہ ویکھنا۔ گھر دے وڈے بزرگ برادری دے تانے بانے ملاندے ہوئے خوش اسلوبی نال گل طے کردیندے یا فریقین اک دُجے دے حسن اخلاق توں متاثر ہو جاندے سن۔
قارئین! مشرقی معاشرے وچ شادی ویاہ لئی راویتی طور تے لوکی اپنے اقربا تے حلقہ احباب‘ میچ میکراں اتے انحصار کردے چلے آئے نیں لیکن مرور ایام رشتہ کروان والی پیشہ ور آنٹیاں بہت اہمیت اختیار کر گئیاں نیں۔ اج وی وڈی تعداد وچ رشتہ ایہناں زنانیاں دے ذریعے طے پاندا اے البتہ کجھ زنانیاں نے رشتے کروان دی آڑ وچ فراڈ دا سلسلہ وی شروع کر رکھیا اے۔ اوہناں دے نال مرد حضرات وی گینگ دی صورت وچ شامل نیں۔ایہہ جماعت کجھ ہزار کمان لئی کسے دی زندگی برباد کرن توں وی نہیں ہچکچاندی۔
مشاہدے وچ اے کہ رشتہ کروان والی زنانیاں دی وڈی تعداد اَن پڑھ اے۔ اوہناں وچوں بعض فون اتے رشتے تے بعض نے باقاعدہ دفتر بنا رکھے نیں۔ ایہناں زنانیاں دا ڈھنگ ای نرالہ اے جیویں ای کوئی پیو اپنی دھی دے رشتے لئی آندا اے تے اوہ دبنگ لہجے وچ صاف گو بندے ہوئے اوہناں نوں اصلی شناختی کارڈ لیان نوں آکھدیاں نیں کہ جی اسیں کسی دے نال فراڈ نہیں کر سکدے بس فیر کیہ…اوہ بیچارا پیو جہدی دھی 20یا 24سال دی اے اوہنوں لگدا اے کہ ہن بہت دیر ہو گئی اے میری دھی دا ویاہ تے اک دو سال پہلے ہو جانا چاہیدا سی۔ گویا اوہناں پریشان حال والدین اتے پریشر پایا جاندا اے۔ بھئی تہاڈی کڑی دی عمر بوہتی ہو گئی اے ہن جہڑا رشتہ اسیں وکھائیے تسیں اوہدے اتے اکتفا کرو۔ والدین جدوں اوہناں دی گل اتے نفی وچ جواب دین تے فیر گاہے بگاہے کڑی دی خامیاں گنوائیاں جاندیاں نیں۔ مضحکہ خیز گل اے کہ ہر رشتہ کروان والی زنانی نے اپنا وکھرا ای ریٹ فکس کر رکھیا اے۔ پاکستانی منڈا 2ہزار توں لے کے 12ہزار روپے‘ دبئی عمان لئی 5توں 25‘ امریکہ تے کینیڈا دے 15توں 50ہزار۔ ایہ رجسٹریشن انج لازمی ہوندی اے جیویں سکول وچ داخلہ ہو رہیا ہووے تے رشتہ پکا ہون تے فیس چارجز وکھرے‘ فوراً ادائیگی ہووے گی۔ خواہ بیل منڈھے نہ چڑھے۔ بعض عقل توں پیدل زنانیاں گریجوایٹ کڑی دے ہاں میٹرک پاس منڈے دا میچ فٹ کروان دی بے تکی کوشش کر کے صرف اپنے نمبر پورے کردیاں نیں۔ میں تہانوں دس رشتے وکھائے‘ مجال اے کوئی اک وی بھایا ہووے۔ اج توں تقریباً 15ورھیاں پہلے اوہناں نوں فون دے بل دا خرچہ وی چکنا پیا سی۔ ہن مطلوبہ سہولت واٹس ایپ نے پوری کردتی اے۔ ایہ گروپ بنا لیندیاں نیں تے پوری دی پوری چین ہوندی اے۔ منڈے‘ کڑیاں دی تصویراں ایہناں گروپاں وچ ویاہ ہون مگروں وی مٹر گشت کردیاں رہندیاں نیں۔ کسے ویلے انج وی ہوندا اے کہ دو رشتہ کروان والی پارٹیاں دا آپس وچ اختلاف ہو جاوے تے رشتہ وچ بدگمانیاں پیدا کردیاں ہویاں رشتہ آپ ای ختم کروا دیندے نیں۔ قارئین ایہہ سارا تماشا اودوں پروان چڑھیا اے جدوں خانداناں دے وچ سٹیٹس دے نام اتے خودغرضی دا دوردورہ ہویا اے تے نتیجتاً ایس طرحاں میچ میکراں دی دکاناں سجن لگیاں نیں۔ ویاہ نوں اوکھا بنایا جا رہیا اے۔ پہلے دور وچ ڈیمانڈاں دی بھرمار نہیں سی۔ افسوس معاشرے دی اکثریت غلط ڈگر اتے چل نکلی اے۔ کڑی والیاں دی ڈیمانڈ ہوندی اے کہ منڈا پڑھیا لکھیا ہووے تے جنا اوہ ہینڈسم ہووے اوہنی سیلری وی ہینڈسم ہووے۔ اپنا گھر‘ لگژری گڈی ہووے‘ چھوٹا خاندان ہووے جد کہ منڈے والیاں دے مطالبے ہوندے نیں کہ کڑی دی عمر 18سال ہووے تے اوہنے ماسٹرز کیتا ہووے۔ گوری چٹی‘ لمی پتلی ہووے تے روٹی تے گول ای بناندی ہووے۔لہٰذا ہن پاکستانی معاشرے وچ ڈیجیٹل عہد وچ ٹنڈر‘ ڈیٹنگ ایپس تے مزمیچ جئی کمپنیاں متعارف کروائی جا رہیاں نیں جتھے نوجوان منڈے کڑیاں نوں گھر بیٹھے سکرین دی مدد نال ای لائف پارٹنر مل جاندے نیں۔ کیہ واقعی ایہناں سائٹاں تے ایپاں اتے اعتماد کیتا جا سکدا اے؟ بلاتردد کڑیاں لئی رشتے والیاں دے سامنے بار بار چاہ ٹرالی سجانا کسے مہم توں گھٹ نہیں ۔ اوہ انج دے رشتہ کلچر توں چھٹکارا چاہندے نیں جتھے لوکی آن تے ویکھ کے جاندے جان۔ لیکن یاد رکھو سوشل میڈیا اتے سب کجھ چنگا نہیں ہوندا۔ انج دے معاملات وچ بہت محتاط ہونا پیندا اے۔ اکثر لوکاں نے غلط بائیو‘ کسے ہور دی تصویر تے فیک مواد شیئر کیتا ہوندا اے جہدا حقیقت نال کوئی واسطہ نہیں ہوندا۔ انج دے لوکاں دے نال گل بات تہانوں ہراسانی دی صورت وچ بھاری پے سکدی اے۔ کجھ سفلہ مزاج لوکی وی ہوندے نیں جنہاں دا مقصد ڈبل پلے دے ذریعے دوجیاں نوں محض بے وقوف بنانا ہوندا اے۔ Skp the rishta aunty مہم چلان دا کوئی فیدہ نہیں جدوں تہانوں ڈیجیٹل پلیٹ فارم اتے الو بنایا جا رہیا ہووے۔ نوجواناں تے اوہناں دے والدین نال گزارش اے کہ رشتہ چاہے ایپاں دے ذریعے طے کرو یا زنانیاں دے ذریعے‘ معلومات دی چھان پھٹک مگروں بس ہم آہنگی نوں ترجیح دیو‘ قابلیت اتے مہر لائو۔ نسلاں دی تعمیر تے مثبت سوچ وچ ای معاشرے دی بقا اے۔