بھارت نوں یوم جمہوریہ منان دا حق نہیں

جی۔ این۔ بھٹ

26جنوری نوں بھارت نے اپنا یوم جمہوریت کجھ ایس انداز وچ منایا کہ پہلی واری خود بھارت والیاں نوں افسوس ہویا ہووے گا۔ نئی دہلی جہڑی بھارت دی راجدھانی اے اوتھے کڑے فوجی پہرے وچ یوم جمہوریہ دی فوجی پریڈ ہوئی تے پہلی واری ایہدے وچ کوئی غیر ملکی سربراہ حکومت نے
بطور پروہنا رَلت کیتی۔ سکھاں دی دھمکیاں پاروں پورا دہلی اک محصور کرفیو زدہ حالات وچ سی۔ کسے سکھ یا مسلمان نوں یوم آزادی دی تقریب دی تھاں لال قلعہ دے کول پھٹکن دی اجازت نہیں سی۔ انج اک سہمے سہمے ماحول وچ ایہہ تقریب منعقد ہوئی جہدے وچ وزیراعظم نریندر مودی نے خطاب کیتا مگر’’وہ بات کہاں مولوی مدن جیسی وہ کرود فردہ اکڑفوں‘‘۔ اوہ میزائلاں ‘ ٹینکاں تے طیاریاں دے علاوہ جدید ایٹمی اسلحہ دی نمائش وی خوف دے تاثر نوں زائل نہ کر سکی۔
سیون سسٹرز ست بھیناں کہلان والی مغربی بنگال دے آسے پاسے دی ریاستاں میزورام‘ ناگالینڈ‘ تری پورہ‘ آسام‘ اروناچل پردیش‘ جھاڑکھنڈ‘ اڑیسہ تے چھتیس گڑھ وچ وی ایہہ تقریب خود شرمندہ تے بجھی بجھی جئی سی کیوں جے ایس نام نہاد یوم جمہوریہ منان وچ اوتھے دے عوام نوں کوئی دلچسپی نہیں سی۔ ایہناں علاقیاں دے عوام نوں بھارت نے طاقت دے زور اتے نال رلایا اے۔ ایہہ سارے علاقے یا صوبے بھارت نال علیحدگی چاہندے نیں اوتھے مسلح تحریک آزادی جاری اے۔ ایتھے روزانہ بھارتی فوج دے نال جھڑپ تے فوجیاں اتے حملے ہوندے رہندے نیں۔
ایس دے علاوہ مشرقی پنجاب وچ وی جتھے سکھاں دی کسان تحریک مگروں حالات بھارتی حکمراناں دے قابو توں باہر ہوندے جا رہے نیں۔ خالصتان تحریک فیر سر چکدی نظر آ رہی اے اوتھے وی بھارتی یوم جمہوریہ نہ اوہ موج میلہ سی نہ رنگا رنگی جہڑی پنجاب دے پنجابیاں دا خاصہ ہویا کردی سی۔ ہر پاسے اک خوف سی۔ دنیا بھر وچ جتھے جتھے سکھ تے خالصتان دے حامی رہندے نیں ایہہ دن کشمیریاں وانگوں یوم سیاہ دے طور تے منایا۔سب توں بری حالت ریاست جموں و کشمیر وچ نظر آئی جنہوں دو سال پہلے بھارت نے اپنے اندر بزور طاقت ضم کردیاں ہویاں اعلان کیتا سی کہ ہن کشمیر تے کشمیریاں دے دن پھرن گے۔ ایتھے خوشحالی تے امن دا دور لوٹ آوے گا مگر دنیا ویکھ رہی اے کہ دو سالاں وچ سب توں ودھ قتل و غارت تے مظلوم تے محکوم کشمیریاں دا لہو بہایا گیا۔ بھارت نے راتوں رات 2سال پہلے کشمیر وچ 7 لکھ توں اپنی فوج دی گنتی ودھا کے 9لکھ کردتی یعنی ہر دس کشمیری اتے اک فوجی تعینات کردتا تاں جے کشمیری ڈر جان تے ہمت ہار بیٹھن مگر دنیا گواہ اے کہ کشمیریاں نے بھارت توں علیحدگی دی تحریک نوں اوسے شدت نال جاری رکھیا جیویں اوہ 1947توں جاری سی تے 1989 وچ ایہنوں نویں زندگی ملی سی۔ روزانہ 3توں4کشمیریاں نوں بھارتی فوج مجاہد علیحدگی پسند قرار دے کے شہید کر رہی اے۔ گرفتار کر کے دوردراز بھارتی جیلاں وچ ٹھونس رہی اے۔ حریت کانفرنس دی ساری قیادت پابند سلاسل اے مگر اوہدے باوجود تحریک آزادی ایسے زوروشور نال جاری اے۔
پچھلے دناں وی کشمیر وچ تعینات بھارتی آرمی چیف نے اوہو پرانا بیان دہرایا کہ 350توں لے کے 550تک مسلح علیحدگی پسند جموں کشمیر وچ دراندازی لئی سرحداں اتے تیار بیٹھے نیں۔ ایہ پرانا گھسیا پٹیا بیان اوہ ہر سال جاری کردے نیں۔ جے انج اے تے فیر ایہ 3سو یا 4سو علیحدگی پسند ختم کیوں نہیں ہوندے جد کہ ہر سال سینکڑاں کشمیری شہید کیتے جا رہے نیں۔ ایس سال وی 26 جنوری توں دو ہفتے پہلے ای پوری ریاست وچ زبردست ناکہ بندی کر کے محاصرے تے تلاشیاں دا بدترین سلسلہ شروع کیتا گیا۔ ہر گلی ‘ ہر سڑک اتے فوجی ناکہ لا کے کشمیریاں دی تلاشیاں لیندے رہے۔ ایہدے باوجود 26جنوری نوں حریت کانفرنس دی اپیل اتے پوری ریاست مقبوضہ کشمیر وچ ہڑتال رہی۔ اک وی غیرت مند کشمیری کسے سرکاری تقریب وچ شریک نہیں سی۔ سوائے کجھ مٹھی بھر سرکاری افسراں تے بی جے پی دے ٹکڑیاں اتے پلن والے بندیاں دے۔
انج ہمیشہ وانگوں نہایت خوف دے عالم وچ کجھ درجن بندیاں نے سرینگر وچ منعقدہ یوم جمہوریہ دی پریڈ وچ رلت کیتی۔ ایس تقریب توں اَڈ اک مضحکہ خیز صورتحال لال چوک سرینگر وچ ویکھن نوں ملی جتھے 73ورھیاں توں بھارت نوں حسرت رہی اے کہ اپنا ترنگا لہرائے مگر انج نہ کر سکی۔ ایس واری کرین لفٹر دے ذریعہ دو بندے اتے چڑھے تے جا کے گھنٹہ گھر لال چوک دی چوٹی اتے جھنڈا بنھیا مگر افسوس اوہ وی شرم دے مارے لٹکیا رہیا لہرا نہ سکیا تے افراتفری وچ کجھ سکولاں دے بالاں تے آرمی والیاں نے سڑک اتے پنج چھ جھنڈے لہرا کے اپنا شوق پورا کیتا مگر ادھے گھنٹے مگروں جدوں ایہ سارے چلے گئے تے جھنڈا اک واری فیر غائب سی۔ کشمیری اتار کے لے گئے تے گھنٹہ گھر چوک ویران پیا سی۔ ایس توں اندازہ لایا جا سکدا اے کہ کشمیری بھارت نال کنی نفرت کردے نیں۔